1 Tim 3
3
Bann levek
1Mo donn enn parol sir: si kikenn anvi vinn levek pou vey lor lafwa, li pe dezir fer enn travay nob. 2Levek bizin enn dimoun ki san repros, enn mari fidel, enn dimoun sinp, rezonab e respektab, ki ena lespri ouver e fodre li kapav donn lansegnman. 3Fodre pa ki li enn soular, ni kontan lager, ni fer koze vinn long ek kontan larzan. Li bizin enn dimoun trankil ki pena enn lintere personel. 4Li bizin konn diriz so prop fami, bien elve so zanfan ki obeir li avek respe. 5Kimanier enn dimoun pou kapav pran sarz Legliz Bondie si li pa kapav diriz so prop fami? 6Fodre pa osi ki li fek konverti, ki li pa ankor fer so prev. Lorgey kapav mont dan so latet e li fini kouma diab. 7Bizin ki dimoun andeor ena boukou lestim pou li, pouki li pa tom dan laont e anmemtan pa may dan lak diab.
Bann diak
8Mem zafer pou bann diak. Zot bizin respektab ek sinser, pa servi doub langaz, pa soular, ni atase ar larzan. 9Zot bizin gard laverite lafwa dan enn konsians kler. 10Bizin teste zot avan. Si pena nanye pou reprose, lerla zot kapav servi kouma diak. 11Zot fam osi bizin respektab, pa koz zafer dimoun, viv dan sinplisite ek azir kouma enn dimoun ki merit konfians dan tou kiksoz. 12Bann diak bizin fidel ar zot madam e gid bien zot zanfan ek zot fami. 13Seki fer so travay bien pou gagn enn bon repitasion e so lafwa dan Zezi Kris pou solid.
Mister lafwa
14Mo pe ekrir twa sa let la, e mo espere zwenn twa biento. 15Si zame mo tarde, to kone asterla ki fason to bizin konport twa dan lakaz Bondie, samem Legliz Bondie ki vivan, kouma enn kolonn ek enn sipor ki tini laverite. 16Wi, vremem, mister nou lafwa, li gran.
Lekris finn paret kouma enn imin,
Lespri Sin finn rann li zis,
Bann anz finn kontanple li,
Finn anons li kot tou bann pep
lemonn krwar dan li
E li finn mont dan laglwar.
Currently Selected:
1 Tim 3: NTKM2009
Highlight
Share
Copy
Want to have your highlights saved across all your devices? Sign up or sign in
Mauritian Kreol New Testament © Bible Society of Mauritius, 2009.