1 Tim 2
2
Lapriyer litirzik
1Mo fer enn lapel pouki, avan tou, zot fer lapriyer, zot sipliy Bondie ek zot fer aksiondegras pou tou dimoun, 2pou bann lerwa, tou bann ki ena lotorite, pouki lape ek trankilite regne e ki nou kapav viv dan lapiete ek dan dignite. 3Sa li enn gran zafer e li agreab pou Bondie nou Sover 4ki oule sov tou dimoun pouki zot arive konn laverite. 5Kouma ena enn sel Bondie, ena osi enn sel mediater ant Bondie ek limanite, Zezi Kris limem enn imin 6ki finn met so lavi angaz pou liber tou dimoun. Bondie pe rann so temwagnaz dan ler ki ti fixe. 7Li finn swazir mwa pou proklam so mesaz e li avoy mwa kouma enn apot pou pran sarz ek pou instrir tou bann ki pa Zwif dan lafwa ek laverite; seki mo pe dir li vre.
Zom ek fam dan lasanble
8Ala kifer, mo pe demande ki dimoun priye partou e touletan, ki zot lev zot lame lao dan lesiel, san fer koler, san lager.
9Lor kestion bann madam dan lasanble, fode ki zot teni korek, abiy zot avek respe ek sinplisite; pa fer bann kwafir konplike, pa orn zot lekor ar bizou, perl, e pa met linz extravagan. 10Kouver zot plito ar bann bonaksion; koumsamem enn fam fer kan li respekte Bondie. 11Kan pe donn lansegnman, madam bizin res trankil dan limilite. 12Mo pa permet enn madam donn lansegnman dan bann sesion, ni dominn zom. Li bizin gard silans. 13Adam ti kre anpremie, apre lerla Ev. 14Pa Adam ki ti rant dan piez Satan, me fam la ki ti finn tom dan piez ek finn dezobeir Bondie, 15me so maternite pou sov li. Selma fodre ki bann madam persevere dan lafwa, lamour ek amenn enn bon lavi ek gard enn bon zizman.
Currently Selected:
1 Tim 2: NTKM2009
Highlight
Share
Copy
Want to have your highlights saved across all your devices? Sign up or sign in
Mauritian Kreol New Testament © Bible Society of Mauritius, 2009.