1 Tim 4
4
Tou seki Bondie kre, li bon
1Lespri Sin dir li klerman: dan dernie tan, ena pou abandonn lafwa. Zot prefer swiv bann lespri ki desevwar e ekout bann lansegnman demoniak. 2Pou ena predikater manter, bann ipokrit ki zot konsians finn nepli sansib komsi finn brile ar feray so. 3Zot pou ansegn ki fode pa marye, e zot defann manz sertenn nouritir. Pourtan Bondie finn kre sa bann nouritir la afin ki bann krwayan ki konn laverite kapav rann li gras. 4Tou saki Bondie kre, li bon. Nanye pa bizin zete, me akeyir plito avek remersiman. 5Avek parol Bondie ek lapriyer, nouritir vinn sin; samem fer plezir Bondie.
Enn bon serviter Zezi Kris
6Si to expoz tou sa bann parol la ar bann frer ek ser, to pou vinn enn bon serviter Zezi Kris. Zot pou trouve ki to pe nouri twa avek parol lafwa e ki to pe swiv bon lansegnman avek serye. 7Les dekote bann zistwar payin, bann palab e tou sort komeraz. Abitie twa viv dan latasman avek Bondie.
Latasman avek Bondie pli itil
8Li pa sitan itil ki to okip to lekor, me li pli bon ki to met to latet pou swiv Bondie parski li promet twa lavi zordi ek pou leternite. 9Sa enn parol sir ki tou dimoun bizin aksepte dan fon zot leker. 10Kan nou lite, kan nou debat nou montre ki nou lesperans baze dan Bondie vivan ki Sover tou dimoun, Sover bann ki ena lafwa.
11Lor sa bann zafer lamem ki to bizin insiste ek ansegne.
Enn lexanp
12Mo napa oule ki personn souzestim twa akoz to enn zenes. Okontrer, vinn enn lexanp pou zot par to parol, to lamour, to lafwa, to manier viv. 13Ziska ki mo vini, konsakre to letan pou etidie Lekritir, fer bann predikasion ek donn lansegnman. 14Pa negliz don lagras ki to finn resevwar kan bann profet ti pronons parol dan to faver e group bann ansien ti inpoz lame lor twa. 15Pran tousala aker, donn twa afon dan to travay, persevere. Lerla, tou dimoun pou trouv to progre. 16Vey lor twa ek lansegnman ki to done. Persevere. Koumsamem to pou sov tomem anmemtan ki to sov bann ki ekout twa.
Currently Selected:
1 Tim 4: NTKM2009
Highlight
Share
Copy
Want to have your highlights saved across all your devices? Sign up or sign in
Mauritian Kreol New Testament © Bible Society of Mauritius, 2009.