2 Crónicas 3
3
Ta sliques smeltsanel ch'ulna ti Salomone
(1 R 6.1-38)
1Ti Salomone lic sliquesbe smeltsanel xch'ulna ti Dios ta vits Moria ti oy ta Jerusalén ti bu laj yac' sba iluc ti Dios ta stojol ti David ja' ti stote, ta osil ti laj xchapanbe yavil ti David ta smajob trigo ti Ornán ti jebuseo xcaltique. 2Laj sliques abtel ta xchibal c'ac'al yu'un ti xchibal u ta xchanibal xa jabil stic'lej ta ajvalile.
3Ti sliqueb yoc ch'ulna ti laj sliques ta smeltsanel ti Salomone, xi s'elan sbisol jech c'u cha'al li'e: vucub xcha'vinic (27) metro ti snatile, baluneb (9) metro ti sjamleje. 4Yamaq'uil sti' ti ch'ulna ta yelovale, yich'oj baluneb (9) metro ti snatile. Co'ol sjamlej yich'oj jech c'u cha'al ti ch'ulnae, jech c'u cha'al ti staylej yich'oj baluneb (9) metroe. Ti Salomone laj sbon lec ta naca lequil oro yamaq'uil ochebal yu'un ti ch'ulnae. 5Naca pechajtic tojal tenel-te' laj spac'be ti ta yutile, xchi'uc laj sbon lec ta bats'i oro. Laj sloc'ta ta ch'alel ta sloc'obbail xanetic, xchi'uc sloc'obbail carinaetic. 6Laj xnichimtas ta c'upil sba bax tonetic. Spajeb xa no'ox yutsil ti oro laj yich' tunesele. 7Xi s'elan laj sbon ta oro scotol yut ti ch'ulnae: ti ts'am-te'etique, ti scaj ti'naetique, ti pac'baletique, xchi'uc ti ti'naetique. Laj sloc'taan ta loc'tael ta pac'bal na ti c'usi oy xiq'uique.
8Ta yut ti ch'ulnae, laj xcha'c'alta ta meltsanel bu ta xcom ti Bats'i Cuxul Ch'ul Cuartoe,#Ex 26.33-34. ti yich'oj baluneb (9) metro ti snatile, co'ol sjamlej jech c'u cha'al ti ch'ulna ti yich'oj baluneb (9) metro ti sjamleje. Ta jech yepal un, lic sbon ta bats'i lequil oro, ti jutuc mu laj yich' jtob ta mil (20,000) kilo ti oroe. 9Yalal ti jujun lauxetique, x'ech' jutuc ta o'lol kilo. Laj yich' bonel ta oro xtoc c'u sjamalul yut ta xcha'cojal na.
10Ti bu oy ti Bats'i Cuxul Ch'ul Cuartoe, laj yac' ta luchel ta loc'tael chib ti c'usi oy xiq'uique ti laj yich' bonel lec ta oroe. 11Ti c'u sjamlej smacoj xic' ti c'usitic oy xiq'ue, yich'oj baluneb (9) metro. Ti jun xiq'ue yich'oj buluch-ch'ix xchi'uc oxbej c'ob (2.25 m.) ti snatile, ti tijil c'otem ta spac'balil yut nae. Ja' no'ox jech snatil yich'oj ti jun xiq'ue, ti snupoj sba c'otel xchi'uc sba xic' ti jun oy xiq'ue. 12Mu yanuc snatil xic' ti june, co'ol snatil ti tijil c'otem ta pac'bal nae. Ti jun xiq'ue co'ol snatil ec, ti snupoj sba c'otel sba xic' xchi'uc ti june. 13Smacoj baluneb (9) metro ta scotol ti c'usi oy xiq'uique. Va'alic lec, xchi'uc yac'oj yalel satic ta stuq'uil o'lol ti yut nae.#Ex 25.18-20. 14Laj smeltsan xtoc lich'-lich' muc' ta poc'#Ex 26.31. ti yax'elantic sba stsajale, ti yax'elan sbae, xchi'uc ti saquil poq'ue, ti laj sloc'taic ta luchel ti c'usitic oy xiq'ue.
Ti chib c'usi balajtic va'anbil muyele
(1 R 7.15-22)
15Ti Salomone laj smeltsan chib ti c'usi balajtic va'anbil muyele, ti yich'oj nan vaclajuneb (16) metro ti snatile, ti va'al muyel ta yeloval ti ch'ulnae, ti yich'oj buluch-ch'ix xchi'uc oxc'ob (2.25 m.) volol ti xnichimal sjole. 16Laj smeltsan xtoc scarinailtac co'ol s'elan uil ti laj sjoc'anan ta toyol yu'un ti c'usi balajtic va'anbil muyele. Laj xch'al ta loc'tael vo'vinic (100) ta bej xnich' granada ti laj stsoyanan ta carinae. 17Ti chib balajtic va'anbil muyel ta yeloval ti ch'ulnae, jun laj yac' ta stuq'uil bats'i c'ob, jun laj yac' ta stuq'uil ts'et c'ob. Ti jun ti va'al muyel ta stuq'uil bats'i c'obe, Jaquín laj yac'be sbi. Ti jun va'al muyel ta stuq'uil ts'et cobe, Boaz laj yac'be sbi.
Currently Selected:
2 Crónicas 3: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000