2 Crónicas 4
4
Ti c'usitic ta xtun ta yut ch'ulnae
(1 R 7.23-51)
1Ti Salomone laj smeltsan xtoc jun c'anal taq'uin altar#Ex 27.1-2. ti yich'oj baluneb (9) metro snatile, ti co'ol yich'oj baluneb (9) metro ti sjamleje, ti yich'oj o'lol yo'obal (4.50) metro ti stayleje. 2Laj smeltsan xtoc jun muc' ta c'anal taq'uin pila sventa yavil vo'. Setel laj yich' meltsanel, ti yich'oj o'lol yo'obal (4.50) metro sjamalil ti sti' ta joyobe. Yich'oj buluch-ch'ix xchi'uc oxc'ob (2.25 m.) ti stayleje. Yich'oj o'lol xchanlajunebal (13.50) metro ti setelul ta joyobe. 3Ta joyob xocon ti pilae, loc'tabil cha'jil lajuncot (10) tot vacax ti yilojan sbaic cha'ch'ix xchi'uc oxc'ob (45 cm.) ti jujucote, ti jun no'ox snitoj sba xchi'uc ti pilae. 4Taj une, ic'bil c'ot yu'un lajcheb (12) c'anal taq'uin loc'tabil tot vacax. Oxib sq'ueloj batel ta yac'ol ti yolon xocon sloq'ueb c'ac'ale. Oxib sq'ueloj batel ta yolon ti yolon xocon sloq'ueb c'ac'ale. Oxib sq'ueloj batel ta stuq'uil sloq'ueb c'ac'ale. Oxib sq'ueloj batel ta stuq'uil smaleb c'ac'al. Tiq'uil ochel ti svalopat oquic ta yolone. 5Spimil meltsanbil ti pilae, yich'oj chanc'ob (8 cm.) ti co'ol s'elan lirio nichim ti loc'tabil ta svelbenal sti'e. Vaquib xchanvinic mil (66,000) ta litro x'och yu'un ti vo'e.
6Laj smeltsan xtoc lajunbej (10) c'anal taq'uin pila.#Ex 30.17-21. Vo'bej (5) laj yac' ta stuq'uil bats'i c'ob. Vo'bej (5) laj yac' ta stuq'uil ts'et c'ob. Taj une, c'ot ta sventa sapobil scotol ti c'usi ta xich' chiq'uele. Ja'uc ti muc' ta pilae, c'ot ta yavil vo' sventa ta spoc sbaic ti paleetique.
7Ta oro laj smeltsan xtoc lajuneb (10) spajleb cantila#Ex 31—40. ti laj yac' ta ch'ulna jech c'u cha'al albil sc'oplale. Vo'ob (5) laj yac' ta stuq'uil bats'i c'ob. Vo'ob (5) laj yac' ta stuq'uil ts'et c'ob. 8Ma'uc no'ox taje, laj smeltsan lajuneb (10) mexa,#Ex 25.23-30. ti laj yac' ta ch'ulnae. Vo'ob (5) laj yac' ta stuq'uil bats'i c'ob. Vo'ob (5) laj yac' ta stuq'uil ts'et c'ob. Laj smeltsan xtoc vo'vinic (100) muc' ta lech-lech ti naca oroe.
9Laj smeltsan xtoc amac' yu'un ti paleetique, xchi'uc ti jamal amaq'ue. Naca bonbil ta c'anal taq'uin laj yac'beic ti sti' nailtaque. 10Ti muc' ta pilail vo'e, laj yac' ta stuq'uil bats'i c'ob yu'un ti ch'ulnae, ti sq'ueloj batel juteb ta xocon yolon ti yac'ol xocon sloq'ueb c'ac'ale.
11Ti Hirame laj smeltsan xtoc ti binetique, ti spulobiltaque, ti lech-lech taq'uinetique, ti c'ot ta pasel tsuts ti yabtel ta xch'ulna Dios ti ac'bat smeltsan yu'un ti Salomone. 12-16Ti yabteltaque, xi s'elane:
Ti chib balajtic va'al muyele
Ti xnichimaltac sjol set-set pasbil ta toyole
Ti chib chaj-chaj taq'uin smacobbailtac ti xnichimaltac sjol ti oy ta joyobe
Ti chib chaj-chaj taq'uin ti laj yich' cha'chol sloc'obbail granada ti jujune
Ti chanib ciento (400) ta bej ti c'ot ta xchibal ta smac xnichimaltac sjol ta toyol ti balajtic va'anbil muyele.
Ti lajuneb (10) scajtaque
Ti lajunbej (10) pila ti chotol ta sba ti scaje.
Ti muc' ta pila sventa yavil vo'e
Ti lajcha'cot (12) loc'tabil tot vacaxetic ti oy ta yolone.
Ti binetique, ti spulobiltaque, xchi'uc ti stsacobiltaque.
Scotol taje, naca ta lequiquil c'anal taq'uin laj yunijesan ti jchanubtasvanej Hiram ti laj spasbe ti Salomón ta sventa xch'ulna ti Diose. 17Ti bu laj yich' unijesele, ta yi'al lum ti oy ta yosilal Jordán ta o'lol yu'unic ti Sucot xchi'uc ti Saretane. 18Ep ti c'usitic laj smeltsan ta c'anal taq'uinetic ti Salomone. Mi ja'uc xa laj snop ti bisbil to c'u yepal yalal ta xich' tunesele.
19Ti Salomón xtoque laj yac' ta meltsanel ti c'usitic ta xtun ta xch'ulna ti Diose, ti altar ti meltsanbil ta oroe, ti mexaetic sventa xcholobil pan ti c'otem ta yu'un ti Diose, 20ti co'ol s'elan pajleb cantila ta naca lequil oro meltsanbile, xchi'uc ti slamparailtac ti ta xich' aq'uel ta yeloval Bats'i Cuxul Ch'ul Cuartoe, ti ta xich' tsanel jech c'u cha'al albil ono'oxe, 21ti sloc'obbail nichim une, ti lamparaetique, ti slots'obiltaque, naca ta lequil oro laj yich' meltsanel. 22Naca ta lequil oro laj yich' meltsanel un, xulobil ti sc'aq'uemal xnich ti mechae, ti lech-lech taq'uinetique, ti spulobiltaque, xchi'uc ti xchic'obil pome. Ti ochebal yu'un ti ch'ulnae, ti jujupech sti'tac ti oy ta yut ti bu oy ti Bats'i Cuxul Ch'ul Cuartoe, ti sti'tac xtoc ti ch'ulna stuque, naca bonbil ta oro xtoc un.
Currently Selected:
2 Crónicas 4: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000