2 Crónicas 2
2
Ti Salomone ta xac' strate xchi'uc ti Hiram ajvalil yu'un ti Tiroe
(1 R 5.1-18; 7.13-14)
1Ti Salomone c'ot ta nopel yu'un ta sva'anbel xch'ulna ti Diose, xchi'uc jbej na ti bu ta xchoti ta xventainvane. 2Ta sventa taje, lic xchapan lajuneb xchanvinic mil (70,000) ta vo' jcuch-icatsiletic, xchi'uc chanvinic mil (80,000) ta vo' j'an-tonetic ti ta x'abtejic ta yut te'tique. Oy oxmil xchi'uc vaquib ciento (3,600) ta vo' ti jq'uel-abteletic ta xalic mantal ti c'usitic sc'an pasele.
3Ta ts'acal to un, ti Salomón une xi laj stac batel mantal ta stojol ti Hiram ajvalil yu'un ti Tiroe: “Jech xapas ta jtojol ec jech c'u cha'al laj apasbe ti jtot Davide, ti ta xatacbe talel te'etic ti naca ch'ut te'e, yo' jech ta xich' va'anel jbej na ti bu xu' ta xinaquie. 4A'yio ava'i, ta jva'an jbej ch'ulna sventa ta xc'ot ta yu'un ti Ajvalil Dios cu'une, ti ta jchic'be ti muil poxetic ta sventa ti stoyel xi'ele. Staoj yav ta xcac' ti cholbil pane. Ta xcac' ti chic'bil matanal ta jujun xmal sacube, ta jujun sc'ac'alil ti cuxob o'ntonale, ta sq'uinal ti jujun ach' ue, xchi'uc ti yan q'uinetic ti xlic xcaj no'ox ta xich' spasel yu'un Israel sventa stoyel xi'el ti Ajvalil Dios cu'uncutique.#Ex 25.30; 29.38-42; 30.7; Nm 28.9-10. 5Ja'uc ti ch'ulna ta jva'ane, tsots sc'oplal muc' ta jmeltsan. Ti Dios cu'uncutique, stuc no'ox ech'em cajal c'otem yu'unic ta scotol ti yan diosetique. 6Manchuc mi jech un, ¿buch'u ono'ox la xu' yu'un ta smeltsanbe ti xch'ulnae,#1 R 8.27; 2 Cr 6.18. ti c'alal smacoj ta yutsilal slequilal ti c'u sjamlej oy ti vinajele xchi'uc scotol ti c'usitic oy yu'une? ¿Buch'uun la ya'yel un mi ta xnaqui caloj ti bu ta jmeltsanbe ti xch'ul nae, c'alal ja' no'ox ta xtun ta xchic'obil pom sventa ti yich'obil ta muq'ue? 7Tacbun talel un cha'e, junuc buch'u xojtiquin lec ta yabtelanel ti oroe, ti platae, ti c'anal taq'uine, ti tsatsal taq'uine, ti xojtiquin ta yabtelanel ti yax'elan xela poq'ue, ti tsajal poq'ue, ti yax'elantic stsajale, ti sna' lec sloc'tael xluchel xnichimal ti c'usitic ta xtun jmoj xchi'uc ti cajchanubtasvanej ta xtunic cu'un ta Judae, xchi'uc ta Jerusalén jech c'u cha'al scaj-c'anoj ono'ox comel ti jtot Davide. 8Tacbun talel xtoc te'etic ti naca ch'ut te'e, ti oq'uil te'e, xchi'uc ti muc'tic muil te' ta xch'i ta Líbanoe. Jna' lec, ti avajtuneltaque sna'ic lec c'u s'elan ta lomesel te' ta Líbanoe. Ti cajtuneltaque ta scolta sbaic xchi'uc ti avajtuneltaque. 9Busul no'ox ta jchapan ti te'e. Ti ch'ulna ta jmeltsane, tsots sc'oplal lec muc' ta xich' meltsanel, ti stucuc xa no'ox spajeb ti yutsile. 10Mu xch'ay xava'i un, ti ta xcac'be chanib ciento ta yo'obal millon (4,400,000) litro trigo sventa sve'elique. Ja' jech yepal xcac'beic xtoc ti jchop o ta trigoe. Ta xcac'be xtoc chanib ciento xchi'uc cha'vinic mil (440,000) ta litro ti vinoe. Ja' jech yepal ta xcac'beic xtoc ti aceite ti j'abteletic avu'une, xchi'uc ti jcuch-si'etic yu'un ti jtuch'-te'etique.”
11Va'i ti Hiram une, ajvalil yu'un ti Tiroe, laj stac batel jlic vun ta stojol Salomón ti xi ta xale: “Ti Diose lac'ot ta Ajvalil yu'un ti Israele. Oy syail xc'uxul yo'nton ta stojol ti steclumale.” 12Xi to laj sts'ac batel ti slo'il ya'yeje: “¡Lequil c'optabiluc ti Ajvalil Dios yu'un ti Israele, ti c'ot ta meltsajel yu'un ti vinajele, ti banomile, ti laj yac'be jun xnich'on ti ajvalil David ti ech'em sbijile, ti lec tojobtasbile, ti xa'i sbae, ti ta smeltsanbe xch'ulna ti Diose, xchi'uc ti ta smeltsan jbej na bu ta xventainvane! 13Ta jtacbot talel un cha'e, jun vinic ti oy lec sbijile, ti lec xojtiquin ta spasel ep ta tos ti c'usi sc'an pasele, ja' ti jchanubtasvanej Hirame. 14Taje, squerem ol jun ants liquem talel ta snitilul ti Dane, ti voq'uem ta Tiroe. Bats'i xtojob ta yabtelanel ti oroe, ti platae, ti c'anal taq'uine, ti tsatsal taq'uine, ti tone, ti te'e, ta yabtelanel ti yax'elan poq'ue, ti yax'elantic sba stsajal poq'ue, ti saquil poq'ue, ti tsajal poq'ue, Jech xtoc sna' lec xluchumaj ta sloc'tael ti c'usitic sc'an loc'taele, ti xtojob ta sliquesel scotol ti c'usitic xlic ta lum stac' pasele. Ta xchi'in sbaic ta yaq'uel iluc abtel jmoj xchi'uc ta stojol ti jq'uel-abteletic avu'une, xchi'uc yaj'abteltac to ox ti atot Davide, ti co'ol s'elan c'ot ta jtot ya'luque. 15Jech o xal un, yojtot, taco talel ta stojol avajtunel ti trigoe, ti jchop o ta trigoe, ti aceitee, xchi'uc ti vino ti avaloj ta xavaq'ue. 16Ti vu'uncutic une ta jliquescutic ta slomesel ti te' ti jaytos ta xtun avu'un ti oy ta Líbanoe. Ta cajancutic ech'el ta nab, ti c'otuc ta Jopee. Ta jech yepal un, lic xa baino ti bu taj une yo' ta xa'ich'bat ech'el ta Jerusalén.”
17Ta ts'acal to, ti Salomón une lic sliques jun tsacob-biil ta stojol scotol ti jyanlumetic ti nacalic ta Israele co'ol s'elan jech c'u cha'al laj stsaquic ta ba'yel yu'un ti David ti ja' stote. Loc' ta chapel oxlajuneb xvaxacvinic mil xchi'uc vaquib ciento (153,600) ta vo'. 18Ti va'i yepal taje, laj xch'ac loq'uel lajuneb xchanvinic mil (70,000) ta vo' ta xtunic ta cuch icatsil, xchanvinic mil (80,000) ta vo' ta xtunic ta an ton ta vits, oxmil xchi'uc vaquib ciento (3,600) ta vo' jq'uel-abteletic ti ta spasic ta mantal ti j'abteletique.
Currently Selected:
2 Crónicas 2: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000