PHUNGCHIMTU 11
11
Mifim Nih Zeidah An Tuah?
1Na tangka cu chawlehnak ah hmang law
ni khatkhat cu a miak na
hmuh ko lai.
2Na tangka rianṭuannak cu hmun
tampi ah chia hna,
Zeitintiah vawlei cungah hin
zei ṭhat lonak dah a tlung lai,
na hngal lo.
3Khuadawm cu ruahti in a khah tikah
vawlei cungah a rung sur,
Thingkung cu khuazeilei hoih paoh
hmanh in tlu hmanh seh law
a tluknak ah khan a ril ko.
4Thlitu le nikhua an ṭhat tiang na ngan
peng ko ahcun, thlaici zeihmanh
na tuh bal lai lo i zeihmanh
na zun bal pek fawn lai lo.
5Nu nih fa an pawimi ruh chungah zeitindah thlarau kha a luh ti kha na hngalh lo bantukin zeizong vialte a sertu Pathian rian ṭuannak cu na hngal kho ve bal lai lo.
6Zinglei ah thlaici tuh ko, zanlei zongah ngol hlah; zeicahtiah an dihlak in an ṭhat lai le an ṭhat lai lo kha na hngal lo i a zei kha dah a ṭha deuh lai ti zong kha na hngal lo.
7Chun ceunak i nuamhpi khawh hi
a ṭhami a si,
8Na nun chungte hi cu na nun rihmi
kum paoh caah khan i lawm ko,
Zeicahtiah zei can na nun hmanh ah
na nun chung nakin na thih hnu cu
a sau deuh ṭheo lai ti kha hngal ko.
Hmailei thil zeihmanh i ngaih awk
a um lo.
Mino Mi Hna Caah
9Maw tlangval hna, nan tlanvalnak kha lawmhnak in hmang ko u, nan tlanval lioah hin nan lung nih lawmhnak hmu ko seh. Nan duhmi kha tuah ko u, nan lung a duh mi kha hmu ko u. (Sihmanhsehlaw nan tuahmi thil paoh ah khan Pathian nih bia a kan ceih lai, ti kha hngal ko u.)
10Zeihmanh nan lungre i theihter hlah u, zeihmanh fahnak i pekter hlah u. Saupi na no ti lai lo.
Currently Selected:
PHUNGCHIMTU 11: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006