PHUNGCHIMTU 10
10
Hruhnak Kong
1Tho thi nih zihmui cu a thawl ning
piin a thutter khawh,
Cu bantukin hruhnak hmete nih
fimnak ngan bik kha
a hrawh khawh.
2Mifim nih a hmaanmi thil tuah kha
a phung a si ko i mihrut nih
a hmaan lomi thil tuah kha
a phung a si ve ko.
3Mihrut cu khual hmanh nih a hruhnak
kha an hngalh i mihrut ka si ti kha
a mi kip a hngalhter hna.
4Uktu bawi kha na cungah a thin
a hun ahcun na dir hmun kha
va chuahtak hlah;
Dai tein na um ko ahcun, palhnak
a fakmi kha ngaihthiam khawh a si.
5Vawlei cungah hin thil ṭhalo ka hmuhmi pakhat a um. Cucu uktu bawi hna nih an chuahtermi hi a si. 6Mihrut mi hi hmunsang le nawlngeihnak kha an pek hna i mirum kha an thlei hna le 7sal nih rang an i cit i bawi nih sal bantukin an ke in an kal hi a si.
8Khor a comi cu a chungah
amah a tla lai,
Kulhnak vampang a pemmi cu
rul nih a cuk lai. #Slm 7.15; Phut 26.27
9Lung a khoihmi cu lung nih
a hliam lai,
Thing a cekmi cu thing nih harnak
a pek lai.
10Na hreitlung cu a hnawl i
na tat lo ahcun
Tha tam deuh chuah na hau lai.
A hlankan in rak i timhtuah hi
a ṭha deuh.
11Rul camh cu thiam hmanh law
na camh ṭung lo ahcun zeihmanh
a ṭhahnem lo,
An cuk ṭhiamṭhiam ko lai.
12Mifim cu a kaa chungin a chuakmi
bia nih upatnak a pek,
Sihmanhsehlaw mihrut cu amah
bia lila nih a hrawh.
13Bia pakpalawng chim in aa thawk i
a donghnak ahcun hruh taktak in
a dong ko.
14Mihrut cu dong loin bia a chim.
Ahohmanh nih hmailei ah zei thil a um lai ti kha kan hngal lo, cun kan thih tikah zeitindah kan um lai ti kha ahohmanh nih an chim kho fawn lo.
15A hruh tuk ruang i inn lam hmanh a hngal ti lomi lawng nih ba cikcek in rian a ṭuan lai.
16A siangpahrang a lung fawi tein
tei khawh a simi ram cu harnak
a phan tawn,
A bawile hna zan khuadei in puai ah
aa nuammi ram cu harnak
a phan ṭheo.
17Sihmanhsehlaw mah lungthin tein
ruahnak a thlekmi siangpahrang
a ngei i
A bawile hna cu a caan hmaante ah
rawl a ei i anmah le anmah aa sum
khomi a si i zu a ri lomi a simi hna
ram cu ram vanṭha a si.
18Thathut ruangah inncung a cim,
Daithlan ruangah inn a zut.
19Puai nih an lawmhter khawh,
zu nih an nuamhter khawh,
Sihmanhsehlaw tangka loin a zei
paohpaoh hmanh cu na ngeih
khawhmi an si lo.
20Siangpahrang cu a thlite hmanh in
congoih hlah,
Mirum cu nan ihnak khan chung
hmanh ah congoih hlah,
Zeicahtiah thli lak i a zuangmi va nih
na aw cu an kalpi lai i na chimmi
cu an va chimh sual ko hna lai.
Currently Selected:
PHUNGCHIMTU 10: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006