PHUNGCHIMTU 12
12
1Cucaah nan tlanval lioah nanmah an sertu kha philh hlah u, ni ṭhalo hna an phak hlan le, “An chungah nuamhnak zeihmanh kan ngei lo,” nan timi kum hna an nai hlanah hin. 2Cu caan cu ni le thlapa le arfi hna an ceunak a dulh i ruah minmei na caah a ṭian ti lo caan kha a si lai. 3Khi tikah himnak an pe tawntu na ban kha an ther lai i atu i a ṭhawngmi na khuk cu an der lai. Na rawl khainak ding caah na ha cu an tlawm tuk lai i na mit cu an muih lai caah fiang tein khua na hmu kho lai lo. 4Lam i thawngpang kha na hna a kut caah na thei kho lai lo. Rawl rialnak seh thawng kha a thei kho menmen na si lai i aw dawh zong an tum tikah a thei kho menmen na si lai. Sihmanhsehlaw vate onh thawng hmanh nih naa hngilhnak in an hlauh khawh lai. 5Hmun sang kha na ṭih hna lai i chawh kha na caah ṭihnung a si lai. Na sam kha a par lai i nu le pa duhnak na ngeihmi kha a lo lai i zeihmanh nih a umter ṭhan kho ti lai lo. Kannih cu kan umnak ding zungzal kan inn ah khan kan kal lai i khua chung lampi ah ṭahnak a um lai. 6Ngun cikcin kha a cat lai i sui meiinn kha a tlu lai i a kuai lai. Tikhor i hri kha a cat lai i ti thannak um kha a kuai dih lai. 7Kan pum cu vawlei leidip ah a kir ṭhan lai i kan thaw cu a kan petu Pathian sinah a kir ṭhan lai. 8Pakpalawng lawngte, pakpalawng lawngte, zeizong vialte hi pakpalawng lawngte an si dih, tiah Phungchimtu nih ka ti.
Biatlang Kawmnak
9Phungchimtu cu a fim caah a hngalhmi kha mi cu a cawnpiak lengmang ko hna. Phungthluk bia kha a cawn hna i biatak an si maw si lo ti kha fel tein a hneksak hna. 10Phungchimtu nih hnangamnak bia kha ka kawl hna, sihmanhsehlaw ka ṭialmi bia hi lihchim lo tein ka ṭial hna. 11Mifim mi hna bia cu tuukhal nih tuu khalhnak caah an hmanmi fung zum bantuk an si, kan dihlak in a kan zohkhenhtu Tuukhal a simi Pathian nih khan annih cu a pek hna.
12Ka fapa, naa ralrin awk thil a um rih. Ca uk ṭial luaimai hi dongh a thiam lo i cawn lengmang zong hi batnak men a si.
13Hi thil vialte hna hnuah hin chim awk pakhat lawnglawng a um rih: Pathian cu ṭih law a nawlbia kha zul hna, zeicahtiah minung cu hi nawlbia hna tuah awk caah hin pei rak ser a si cu. 14Pathian nih kan tuahmi thil paohpaoh hi, a thli tein kan tuahmi si hna seh, a ṭha kan tuahmi si hna seh, a chia kan tuahmi si hna seh, bia a ceih dih hna lai.
Currently Selected:
PHUNGCHIMTU 12: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006