2 CHANRELNAK 29
29
Hezekiah Pennak
(2Sia 18.1-3)
1Hezekiah cu kum kul le kum nga a ti ah pen hram a thawk i Jerusalem in kum kul le kum kua a pen. A nu min cu Abijah a si, Zekhariah fanu a si. 2A pa David nih a rak tuah bantuk khan amah nih Bawipa mithmuh i a dingmi kha a tuah.
Hezekiah Nih Biakinn A thianh
3A bawi a kum khatnak, thla khatnak thla ah Bawipa inn i innka kha a hun hna i a remh hna. 4Tlangbawi hna le Levi mi hna kha a ratpi hna i nichuahlei kam tual ah khan a pumh hna i, 5annih cu a thawh hna i, “Levi mi hna, ka bia thei tuah u! Atu cu i thianh u law Bawipa nan pupa hna Pathian inn kha thianhhlimh tuah u, hmunthiang khan hmunthur kha hlonh u. 6Zeicahtiah kan pupa hna cu zumhtlak loin an um i Bawipa kan Pathian mithmuh ah a ṭha lomi thil kha an tuah; amah cu an hlawt i Bawipa umnak hmun cu kaa dang an hoihtak i an hnulei an chit. 7Innleng innka zong kha an khar hna i meiinn kha an hmih hna i Israel Pathian sinah khan zihmui zong an khang lo i khangh thawinak zong an pechan lo. 8Cucaah Bawipa thinhunnak cu Judah le Jerusalem cungah a tlung i tuksapur, khuaruahhar le serhsat awk thil ah, nannih nih nan mit hrim i nan hmuh bang hin a ser hna. 9Cucaah zohhmanh u, hi ruangah hin kan pupa hna cu vainam in an rak thi i kan fapa le kan fanu le kan nupi hna cu sal ah an rak tang. 10Ṭih a nungmi thinhunnak cu kan sinin aa mer nakhnga, Bawipa, Israel Pathian sin i biakamnak ser cu atu cu ka lung i a ummi a si. 11Ka fapale hna, atu cu thluarthlap in um hlah u, zeitintiah Bawipa nih nannih cu a hmai i dir awk le amah rianṭuan awk le amah rianṭuantu si awk le amah sinah zihmui khangh awkah an thim hna,” tiah a ti.
12Khi tikah Levi mi cu an tho, Amasai fapa Mahath, Azariah fapa Joel, Kohath mi hna fapa hna; cun Merari fapa hna chungin, Abdi fapa Kish, Jehallelel fapa Azariah; cun Gershon mi hna chungin Zimmah fapa Joah, Joah fapa Eden; 13Elizafan fapa hna chungin, Shimri le Jeuel; cun Asaf fapa hna chungin, Zekhariah le Mattaniah; 14Heman fapa hna chungin, Jehuel le Shimei; Jeduthun fapa hna chungin, Shemaiah le Uzziel. 15An unaule kha an pumh hna i anmah kha an i thianh i Bawipa bia in siangpahrang nih nawl a pek hna bangin, Bawipa inn thianh awkah cun an lut. 16Tlangbawi hna cu Bawipa inn chungchin thianh awkah khan an lut i Bawipa biakinn chungah thurhhnawmhnak an hmuhmi vialte kha Bawipa inn inntual ah an chuahpi hna i Levi mi hna nih khan an lak i Kidron tivarek ah khan an kalpi. 17Thianhhlimh cu thla khatnak thla a ni khat ni ah an thawk i cu thla ni riat ni ah cun Bawipa innleng kha an phan; cun ni riat chung Bawipa inn cu an thianh i cu thla ni hleiruk ni ah cun an lim. 18Cun Siangpahrang Hezekiah sinah cun an va lut i, “Bawipa inn kha kan thianh dih cang, khangh thawinak biakṭheng le a umkheng vialte, hun camcinmi changreu cabuai le a umkheng vialte, kan thianh dih hna. 19Cun zumhtlaklo a si tikah Siangpahrang Ahaz nih a hlawtmi umkheng vialte kha kan timh dih hna i kan thianh dih hna; cun zohhmanh, Bawipa biakṭheng hmaiah an um,” tiah an ti.
20Cun Siangpahrang Hezekiah cu zingka tein a tho i khua chung bawi kha a pumh hna i Bawipa inn ah khan a hung kal. 21Cun ram le hmunthiang le Judah ca i sual thawinak caah cawtum pasarih, tuukawng pasarih, tuufa pasarih le mehehtum pasarih an rak put hna. Cun Aaron fapa tlangbawi hna kha Bawipa biakṭheng cung i pekchanh awkah nawl a pek hna. 22Cucaah cawtum kha an thah hna i tlangbawi nih an thi kha an lak i biakṭheng kha an theh; cun tuukawng kha an thah hna i an thi khan biakṭheng kha an theh; cun tuufa kha an thah hna i an thi khan biakṭheng kha an theh. 23Cun sual thawinak ca mehehtum kha siangpahrang le aa pummi hna sinah khan an ratpi hna i an cungah an kut an chuan i 24tlangbawi hna nih khan an thah hna i an thi cun Israel mi vialte ca i remnak sernak ah biakṭheng cungah khan sual thawinak an tuah. Zeitintiah siangpahrang nih khan khangh thawinak kha le sual thawinak kha Israel mi vialte caah tuah awk a si lai tiin nawl a pek hna.
25Cun David le siangpahrang i a hmutu Gad le profet Nathan nawl peknak ning khan, Levi mi cu Bawipa inn chungah khan sumsel le tingtang le thonglawi he tiah a chiah hna; zeitintiah nawlbia cu Bawipa sinin a profet hna hmang in a ra. 26Levi mi hna cu David thilri he khan an dir i tlangbawi hna cu muko he khan an dir. 27Khi tikah Hezekiah nih, khangh thawinak cu biakṭheng cungah pekchanh si seh tiah nawl a pek. Cun khangh thawinak cu thawk a si tikah, Bawipa sin hlasak le muko tum cu David nih a sermi hlasaknak thilri he khan an thawk ve. 28Aa pummi nih cun an zapi in an biak, hlasatu nih khan hla an sak, muko tumtu nih khan muko an tum; mah vialte hi khangh thawinak a dih hlantiang an tuah. 29Cun pekchanhnak kha a dih tikah, siangpahrang le a sin i a ummi vialte nih khan an lu an khun i an biak. 30Cun siangpahrang Hezekiah le bawi hna nih khan Levi mi hna cu David bia le hmutu Asaf bia in Bawipa cu hla in thangṭhat u, tiah nawl an pek hna. Cun annih nih lunglawmhnak in thangṭhatnak hla kha an sak i an kun i an biak.
31Khi tikah Hezekiah nih, “Nannih nih Bawipa sinah nan i thianh cang; ra u law raithawinak le lawmhnak thawinak cu Bawipa inn ah rak pu tuah hna u,” tiah a ti. Cun aa pummi nih raithawinak hna le lawmhnak thawinak hna kha an rak put i duhnak lungthin a ngeimi paoh nih khan khangh thawinak an rak put. 32Aa pummi nih khangh thawinak an rak putmi cu cawtum sawm sarih, tuukawng za khat le tuufa za hnih an si; mah vialte hi Bawipa sin i khangh thawinak caah a si. 33Cun thilthiang pekchanhmi cu cawtum za ruk le tuu thong thum an si. 34Sihmanhsehlaw tlangbawi cu an tlawm tuk caah khangh thawinak sa vialte cu a phaw an hawk cawk hna lo, cucaah tlangbawi dang hna nih an i thianh hlantiang, an unau Levi mi hna nih khan rian cu a dih tiang an bawmh hna — zeicahtiah Levi mi hna cu lungthin ah tlangbawi hna nih an i thianhnak nakkhan an ding deuh. 35Khangh thawinak tampi lengah cun daihnak thawinak ca i sathau le khangh thawinak ca i thletmi an um. Cuticun Bawipa inn i rianṭuannak cu umter ṭhan a si. 36Cun Pathian nih mi zapi ca i a tuahmi caah khan Hezekiah le mi vialte cu an i lawm; zeicahtiah cu thil cu duak tiah a hung ummi a si ko.
Currently Selected:
2 CHANRELNAK 29: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006