2 CHANRELNAK 28
28
Ahaz Pennak
(2Sia 16.1-20)
1Ahaz cu pen hram a thawk ah kum kul a si i Jerusalem in kum hleiruk a pen. A hringsortu David bangin Bawipa mithmuh ah thil ding a tuah ve lo, 2sihmanhsehlaw Israel siangpahrang hna lam tu kha a zul. Baal hna caah khan thletmi milem hmanh a ser hna; 3Hinnom fapa nelrawn ah khan zihmui a khangh i Bawipa nih Israel mi hna hmai in a dawimi miphun hna nih fihnung phunglam an tuahmi hna ning khan a fapale hna cu raithawinak ah a khangh hna. 4Cun khuahrum bo hna le tlang hna le thingkung hring tang kip ah raithawinak kha a tuah i zihmui kha a khangh.
5Cucaah Bawipa a Pathian nih amah cu Siria siangpahrang kut chungah a pek i amah nih cun a tei i a mi tampi hna cu sal ah a tlaih hna i Damaskas ah a kalpi hna. Israel siangpahrang kut chung zongah amah cu pek a si i Israel Siangpahrang nih cun a tei i tampi a thah hna. #Isa 7.1 6Bawipa, an pupa hna Pathian kha an hlawt caah Remaliah fapa Pekah nih khan ni khatte ah Judah ram chungah cun sing khat le sang hnih a thah hna, an dihlak in miralṭha lawngte an si. 7Cun Efraim miṭhawng Zikhri nih siangpahrang fapa Maaseiah le siangpahrang inn uktu Azrikam le nawl ngeihnak leiah siangpahrang a hun dottu Elkanah kha a thah hna.
8Israel mi hna nih cun an rualchan hna chung cun nu le fapa le fanu hna sing hnih sal ah an tlaih hna; cun an sin cun hranchaw zong tampi an lak i hranchaw cu Samaria ah an kalpi. 9Sihmanhsehlaw khika ah khan Bawipa profet pakhat a rak um i a min cu Oded a si; Samaria i a kalmi ralkapbu ton awkah cun a chuak i annih cu a thawh hna i, “Bawipa, nan pupa hna Pathian cu Judah cungah a thin a hun caah annih cu nan kut chungah an pek hna, sihmanhsehlaw nannih nih van tiang a phanmi thinhunnak in nan thah hna. 10Cun atu cu nannih nih Judah mi hna le Jerusalem mi hna cu pa he nu he nan sal i zuat hna awkah nan i tim. Nannih tah Bawipa nan Pathian cungah nan sualnak a um ve lo maw? 11Cucaah ka bia ngai u, Bawipa thinhunnak ṭihnung cu nan cungah a um caah, nan rualchan hna chungin nan tlaihmi sal hna cu kua ṭhan hna u,” tiah a ti. 12Efraim mi hna chung i bawi a cheu hna Johanan fapa Azariah le Meshillemoth fapa Berekhiah le Shallum fapa Jehizkiah le Hadlai fapa Amasa hna zong nih raltuknak in a rami kha an rak donh hna i, 13annih cu an thawh hna i, “Nan ral tlaihmi hna cu hika ah hin nan runpi hna hnga lo, zeicahtiah atu lio kan sualnak le mawhnak lengah hin nannih nih Bawipa cungah mawh phorhter chin nan kan timh. Kan mawhnak cu a ngan cang i Israel mi cungah thinhunnak ṭihnung a um cang,” tiah an ti. 14Cucaah hriamnam aa putmi hna nih khan hrengtangmi hna le hranchaw hna cu bawi hna le aa pummi vialte hna hmaiah khan an kaltak hna. 15Cun an min in an thiahmi hna nih khan an tho i hrengtangmi cu an lak hna i an lak i hnipuan lo i a ummi cu hranchaw chung khan hnipuan an aih hna; hnipuan an aih hna, kedan an pek hna, ei awk le din awk an pek hna i sathau an thuh hna; cun annih lak i a derthawmmi vialte kha laa an citter hna i ungkung khua an timi Jeriko khua ah cun an unau hna sinah an kalpi hna.
16Khi caan ah cun Siangpahrang Ahaz nih Assiria siangpahrang sinah bawmhhal awkah mi a thlah hna. 17Zeicahtiah Edom mi nih Judah ram cu an chim ṭhan hoi i an tei hna i sal ah an i kalpi diam hna. 18Cun Filistin mi hna nih Judah ram chung chimram le Negeb i a ummi khua hna kha an hranh hna i Beth-shemesh, Aijalon, Gederoth, Soko le a khuate hna, Timnah le a khuate hna, Gimzo le a khuate hna kha an lak hna i khika ah cun an um colh. 19Bawipa nih Israel siangpahrang Ahaz#28.19 Ahaz: Ahaz hi Judah siangpahrang a si nain Israel siangpahrang hna bantukin a sual ve caah Israel siangpahrang tiah bia-eng in an tinak a si. thawngin Judah cu a ṭumchukter, zeicahtiah Judah ram chungah khan thlahthlam in a um i Bawipa sinah khan zumhawktlak in a nung lo. 20Cucaah Assiria siangpahrang Tiglath-pileser nih khan a rathnawh i ṭhawnter lei loin hremnak tu kha a pek. 21Ahaz nih khan Bawipa inn le siangpahrang le bawi hna inn khan a ramh hna i Assiria siangpahrang kha ngunkhuai a pek; sihmanhsehlaw cu nih cun a bawm lo.
22Hi Siangpahrang Ahaz ṭhiamṭhiam cu, a lung retheih caan ah hin Bawipa sinah khan zumhawktlak lo chinchin in a um. 23Zeitintiah amah a teitu Damaskas pathian hna sinah khan rai a thawi i, “Siria siangpahrang hna pathian hna nih an bawmh hna caah, keimah zong an ka bawmh ve nakhnga an sinah raithawinak ka tuah lai,” tiah a ti. Sihmanhsehlaw annih cu amah le Israel mi vialte rawhralnak an si. 24Cun Ahaz nih Pathian inn i umkheng hna kha a khawmh hna i Pathian inn i umkheng hna cu a den dih hna i Pathian inn i innka hna cu a phih dih hna; cun Jerusalem khua a kenkip ah khan biakṭheng aa serh hna. 25Judah ram chung khua kip ah khan pathian dang hna sin i zihmui khanghnak caah khuahrum bo a ser hna i Bawipa, a pupa hna Pathian cu a thin a phawh. 26A tuahsernak a tang rihmi hna le a lam zulhmi vialte cu a hramthawk in a donghnak tiang Judah le Israel Siangpahrang hna Cauk chungah an i ṭial. 27Cun Ahaz cu a pupa hna sinah a it i khua chungah, Jerusalem khua chungah cun an vui; Israel siangpahrang hna thlan ah khan cun an ratpi lo. Cun a fapa Hezekiah cu amah hmun ah khan a hung bawi. #Isa 14.28
Currently Selected:
2 CHANRELNAK 28: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006