2 CHANRELNAK 30
30
Lanhtak Puai Tuahnak
1 Bawipa, Israel Pathian i Lanhtak Puai cu ulh awkah annih nih Bawipa inn ah Jerusalem ah an rat nakhnga, Hezekiah nih Israel ram le Judah ram ah mi a thlah hna i Efraim le Manasseh ram zongah ca a kuat hna. 2Zeicahtiah siangpahrang le a bawi pawl hna le Jerusalem i aa pummi vialte nih Lanhtak Puai cu thla hnihnak thla i ulh dingin bia an khiah — #Nam 9.9-11 3zeicahtiah tlangbawi hna kha a za in an i thianh kho lo i mi zong kha Jerusalem ah an i pumh lo caah a caan ah khan an ul kho lo — 4cu khuakhannak cu siangpahrang le aa pummi vialte nih a ding tiah an ruah. 5Cucaah Israel ram chung dihlak khan, Beersheba in Dan tiang thawng thanh i Jerusalem ah nan ra lai i Bawipa, Israel Pathian i Lanhtak Puai cu nan hman lai tiin mizapi kha thawngthanh awkah khan bia an chuah; zeicahtiah an tining bang khan tampi nih an hmang lo. 6Cucaah siangpahrang nawl peknak bang khan ca phortu kha Israel le Judah ram vialte ah khan siangpahrang le a bawi pawl hna ca kha an i phorh i an kal, siangpahrang nih cun, “Maw Israel mi hna, Bawipa, Abraham, Isak le Israel Pathian sinah cun kir ṭhan u law Assiria siangpahrang hna kut in a luatmi nannih a tangmi hna leiah hin aa mer ṭhan ve lai. 7Nan pupa hna le nan unau hna, Bawipa, an pupa hna Pathian sinah zumhtlaklo an si ca i nannih nih nan hmuh bangin, a hrawhmi hna bantuk hi si hlah u. 8Nannih cu nan pupa hna bantuk khan hngawngṭhawng si hlah u, sihmanhsehlaw Bawipa sinah khan i pe u law zungzal ca in a thiantermi a hmunthiang ah khan ra u, cun a thinhunnak ṭihnung cu nan sinin aa mer nakhnga Bawipa nan Pathian cu a rian ṭuan u. 9Zeitintiah nannih nih Bawipa sinah khan nan kir ṭhan ahcun nan unau hna le nan fale hna nih khan annih a tlaitu hna sin khan zaangfahnak an hmuh lai i hi ram ah hin an kir ṭhan lai. Zeicahtiah Bawipa nan Pathian cu velngeih thiam le zaangfah thiam a si i amah sinah nan kir ṭhan ahcun nannih kha khuadang an hoitak hna lai lo,” tiah a ti.
10Cucaah ca phortu hna cu khua khat hnu khua khat in Efraim le Manasseh ram ah cun, cun Zebulun ram tiangin an kal; sihmanhsehlaw an rak nihsawh hna i zeihmanh ah an rel hna lo. 11Asher mi tlawmte, Manasseh mi tlawmte le Zebulun mi tlawmte lawng nih toidornak lungthin an ngei i Jerusalem ah cun an ra. 12Bawipa bia in siangpahrang le a bawi pawl nih an chimhmi hna tuah awk i lungthin khat ngeih awkah Pathian kut cu Judah cungah khan a um fawn.
13Cun thilnu telh lo changreu puai cu thla hnihnak thla i hman awkah Jerusalem ah mi tampi an ra, aa pummi cu an tam ngaingai. 14Cun rian cu an thawk i Jerusalem i a ummi biakṭheng vialte kha an ṭhial i zihmui khanghnak biakṭheng vialte kha an lak hna i Kidron horkuang ah an hlonh hna. 15Cun Lanhtak tuufa kha thla hnihnak thla i ni hleili ni ah khan an thah. Cun tlangbawi hna le Levi mi hna cu an ning a zak i cucaah an i thianh i Bawipa inn chungah khan khangh thawinak kha an rak put. 16Pathian mi Moses phungbia ning khan annih nih an umnak tawn hmun ah khan an um; Levi mi kut in an hmuhmi thisen cu tlangbawi hna nih khan an hlonh. 17Zeicahtiah aa pummi chungah khan aa thianh lomi tampi an um; cucaah a thiang lomi ca paoh ah khan Levi mi nih Lanhtak tuufa kha thah a herh, tuufa cu Bawipa sinah a thiang i ser awkah. 18Zeicahtiah mi tampi, Efraim mi, Manasseh mi, Issakhar mi le Zebulun mi tampi hna cu an i thianh lo i asinain a ningcang si lo khan lanhtak puai cu an ei ve ko. Zeitintiah Hezekiah nih annih cu thla a campiak hna i, 19“Pathian, Bawipa an pupa hna Pathian cu a lungthin in kawl aa timmi paoh cu, hmunthiang chung i i thianhnak phung ningin a tuah lo hmanh ah, a ṭhami Bawipa nih cun ngaithiam ko seh,” tiah a ti. 20Cun Bawipa nih Hezekiah cu a theih i mi cu a damter hna. 21Cun Jerusalem i a ummi Israel mi hna nih cun thilnu telh lo changreu puai cu ni sarih chung lunglawm ngaingai in an hman; cun Levi mi hna le tlangbawi hna nih khan Bawipa cu ni fate an thangṭhat i Bawipa cu an thazang dihlak in hla in an hlorh. 22Cun Bawipa rian ṭuannak i thiamnak ṭha a langhtertu Levi mi kha Hezekiah nih a forh chin hna. Cucaah cu puai rawl cu mi zapi nih khan ni sarih an ei i Bawipa an pupa hna Pathian sinah khan daihnak thawinak an pekchanh i lawmhnak kha an pek.
23Cun aa pummi nih cun an ningpi in puai cu a dang ni sarih tuah rih awk kha an hna a tla; cucaah lunglawmhnak in ni sarih an tuah rih. 24Zeitintiah Judah siangpahrang Hezekiah nih aa pummi cu cawtum thong khat le tuu thong sarih, pekchanh awk caah a pek hna i bawi pawl nih aa pummi cu cawtum thong khat le tuu thong hra an pek hna. Cun tlangbawi kha tam piin an i thianh. 25Judah mi aa pummi an ning piin, tlangbawi hna le Levi mi hna he, cun Israel ram in a rami mipem hna, cun Judah ram i a ummi miphun hna cu an i lawm. 26Israel siangpahrang David fapa Solomon chan hnu khan hi bantuk hi Jerusalem ah a um ti lo caah Jerusalem ah lunglawmhnak nganpi a um. 27Cun tlangbawi hna le Levi mi hna kha an dir i mi kha bongmal an sawmh hna i an aw cu theih a si i an thlacamnak cu vancung i a umnak hmunthiang kha a phan.
Currently Selected:
2 CHANRELNAK 30: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006