2 Samuel 24
24
David in Misimna Vawt
(1 Khangtaanghthu 21:1-27)
1 Topa sia Israel te ii tungah khatvei ma thin uuk kik a, amate tungah David in ngim piasak hi. Topa in ama mun ah, “Va pai ta'n a, Israel te le Judah te mi phaza sim ta'n,” ci hi. 2Tua ahikom David in ngalkaphonpi ukpa Joab munah thupia hi: “Na uliante taw Israel nam theampo sung, ngam mong khat pan mong khat dong paitan a, mi phaza sim tavun. Bangza pha ziam he nuam khi hi.”
3Ahihang Joab in kumpipa munah, “Kumpipa awng, Topa na Pathian in Israel mite, tu a zaa sangin a zaa zakhat a tamzaw in hong pungsak tahen a, tuaciang tuabang a punsakna sia a mu tu in nangma hong nungtasak tahen. Ahihang, kumpipa awng banghang hisia vawt nuam ni ziam?” ci in zo hi. 4Ahihang kumpipa in Joab le a uliante in a thu nisak a; amate in kumpipa omna nusia a, Israel mite a phakza sim tu in pai uh hi.
5Amate in Jordan ngun kaantan a, Gad ngamkuam laizang a Aroer khuapi ii thang sangah ngiaphual saat uh hi. Tua mun panin amate in saksang Jazer ah, 6tua mun pan Hit te ngamsung Gilead le Kadesh ah pai uh hi. Tua zawkciang amate in Dan ah pai in, Dan pan nitumna sangah Sidon zuan uh hi. 7Tua mun pan amate thangsang zuan a, kulh taw a ki uum Tyre khuapi, Hiv le Canaan te khuapi theampo, a khakbel in Judah ngam thangsang Beersheba ah pai uh hi. 8Tuabangin amate ngamsung buppi ah khualhaw uh a, tha kua le ni kul zawkciang Jerusalem ah heak kik uh hi. 9Amate in kumpipa tungah, ngalkap seam thei pasal sia: Israel ngam ah 800,000 om in, Judah ngam ah 500,000 om hi, ci in son uh hi.
10Ahihang David in mi simna sazian a laaksak zawkciang ama kithasungin a thin hong ngim a, Topa munah, “Hi nasep ka sep sia maw mama khi hi! Nong hesuakna in hong maisak ta'n. Mawmawt nasep a seam hi thong khi hi,” ci hi.
11-12 Topa in David ii kamsaang Gad munah, “David kungah pai in son ta'n, ama ii teal tu thu nam thum pia khi hi. Ama teal po vawt tu khi hi,” ci hi. A zing ciang zingsang, David ii thaw zawkciang, 13ama kungah Gad pai a, Topa ii sawl teng son hi, tuaciang ama in, “Koisia teal tu ni ziam? Na ngam sungah kum thum kialpi tungsak tu ni ziam, ahibuale na ngalte mai pan tha thum sung tai zaw tu ni ziam, tua ahibuale ni thum sung na ngam sungah natsia tungsak nuam zaw ni ziam? Tu in ngaisun ta'n a, Topa munah ka puak kik tu na zona hong son ta'n,” ci in dongh hi.
14David in, “A heehuai mama dinmun ah om khi hi! Ahihang mihingte ii daan hong piak tu uuk ngawl khi hi. Topa khat bek ma ko daan hong pia tu pa hi hen, banghang ziam cile ama sia ngual hesuakna thin nei hi,” ci in zo hi. 15Tua ahikom tua ni zing pan kipan ama ii tealna hun a cin dong Topa in Israel tungah natsia tungsak hi. Ngam mong khat pan mong khat dong Israel mi tul sawmsali thi uh hi. 16Topa ii vantunglalang in Jerusalem lalcipsak tu in a kipat ciangin Topa in mihingte daan a piak huvau a thin kheal kik a, amate a that vantunglalang munah, “Tawp in! Pha zo!” ci hi. Vantunglalang sia Jebus mi Araunah ii ancilna nai theng hi.
17David in mite a that vantunglalang sia mu a, Topa munah, “A maw sia keima khi hi, a seam khialpa sia keima khi hi. Hi a khuangai huai mihingte in bang seam thong na ziam? Keima le ko innkuan daan nong piak tu hi zaw khu hi,” ci hi.
18Tua ni ma in Gad sia David kungah hong pai a, “Araunah ii ancilna munah va pai ta'n a, tua munah biaknatau khat Topa atu sa ta'n,” ci hi. 19David in Topa ii thupiak ni in Gad ii sawl bangin pai hi. 20Araunah in a etsuk le kumpipa le a uliante ama kungah hong paito mu hi. Ama in David ii mai lei ah kisepsuk in, 21“Kumpipa awng, banghangin hi sungah hong om ni ziam?” ci in dongh hi.
David in, “Na ancilna mun a lei tu le, natsiatna a thai natu in. Topa atu biaknatau khat sa tu hong pai khi hi,” ci in zo hi.
22“Tuasia la in, kumpipa awng, tuaciang Topa tungah na uuk babangin biakpiakna pia in. Hi sung biaknatau tungah na biakpiak natu in khuital te om hi, tuaciang hi munah khuite ii kanhakte le ancilna thingpheakte om hi, mei thu natu in zangh in,” Araunah in ci hi. 23Araunah in kumpipa tungah a vekpi in pia siat hi, tuaciang ama munah, “Topa na Pathian in na biakpiakna hong saang tahen,” ci hi.
24Ahihang kumpipa in zo a, “Hi ngawl hi. Tuate ii man hong pia tu khi hi. Topa ka Pathian tungah keima ii man piak ngawlin ka nga sangaw biakpiaknate pia ngawl tu khi hi,” ci in zo hi. Ama in ancilna mun le khuitalte ngunntang 50 taw lei hi. 25Tua zawkciang ama in Topa tungah biaknatau sa in, meihal biakpiakna le kipawlkhop biakpiakna pia hi. Topa in a thungetna saang a, Israel ngam sungah tua natna kamh hi.
Currently Selected:
2 Samuel 24: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016