2 Samuel 23
23
David ii Kammal Khakbelte
1Jesse ii tapa, David sia Pathian ii mi thupi tu in a vawt, Jacob te ii Pathian in kumpipa tu in a teal hi a, Israel atu in la hoite a phuakpa ahi hi. Hi teng sia David ii a khakbel a pau kammalte ahi hi:
2 Topa ii thaa in kei tungtawnin pau hi;
ama ii thu puak sia ka muk tungah om hi.
3Israel ii Pathian pau zo hi;
Israel a dal pa in kei tungah hong ci hi:
“Thutang khenna taw a uk kumpipa,
Pathian thu ni in a uk pa sia,
4meeikaai om ngawl zing khuavak tuung nitaang taw kibang hi,
ngua theau zawkciang lopate a teesak vasip ni taw kibang hi.
5Pathian ii ka suan ka paalte
thupha a piak tu zia sia tuabang ahi hi,
banghang ziam cile ama in
kei taw tawntung thuciamna khat hong vawt hi,
a kipaltan ngawl tu thukimna khat,
a kikheal ngeingawl tu kamciam piakna khat ahi hi.
Kei dei sia tua teng lian ahi hi;
tua in ka zawna hi tu a,
Pathian in taangtungsak nanak tu hi.
6Ahihang Pathian a selte sia, a kivawk lingte taw kibang hi;
Kuama in khutnguak taw amate tham thei ngawl hi.
7Thik vanhzak ahibuale tei khat na zak kul tu a;
amate kaanghtum tu hi.
David ii Ngalkap Minthangte
(1 Khangtaanghthu 11:10-41)
8David ii a minthang ngalkapte sia hite ahi hi: a masa phitbel sia Tachemon pan Josheb Basshebeth hi a, ama sia “Thum teng” ii lampui pa ahi hi; ama in ngal kisimna khat sungah a teipi taw ngalte 800 do in thatlum siat hi.
9A minthang thum sung pan a niina sia Ahoh phung sung pan Dodo ii tapa Eleazar hi. Ni khat ni in ama le David in ngaldo tu a kikhawmtua Philistine te thato uh hi. Israel te nungkin a, 10ahihang ama ding topin do in, a khut khikcip ahikom namsau tha thei nawn ngawl hi. Topa in tua ni in zawna lianpi nga hi. Ngal a zaw zawkciang Israel te Eleazar kungah heak kikin a thite ii ngaldalna teng suut uh hi.
11A minthang thum sungah a thumna sia Harar pan Agee ii tapa Shammah hi. Philistine te sia be ciinna lo khat omna Lehi ah kikhawmtua uh hi. Israel te Philistine te mai panin tai keak uh a, 12ahizong Shammah ahile lo sungah a dinmun nusia ngawlin ngalnang a, Philistine te that hi. Topa in tua ni in zawna lianpi nga hi.
13Anlaak hun kipat nai ciang, “Sawmthumte” sung pan thum sia David omna Adullam suanghawng sungah pai in, Philistine te ahile Rephaim Kuam ah ngiaphual saat uh hi. 14Tua hun laitakin David sia ngalnanna tu in a ki uum mualtung khat ah om a, Philistine te pawlkhat in Bethlehem khua la uh hi. 15David in inn sang ngai mama in, “Bethlehem kongpi hui tuikhuk panin ka dawn tu tui, mi khat po in hong paipui le paw uuk na peu ing!” ci hi. 16Ngalkap minthang thumte in a pai natu Philistine te phual nawkkeak in, tuikhuk pan tui tawm a laak zawkciang David kungah paipui uh hi. Ahihang David in a dawn nuam bua hi; tua sangin Topa tungah piakkhiatna in lei ah sung zaw a, 17tuaciang, “Topa awng, hi tui ka ne thei ngei buatu hi! A nuntakna a khaam mite ii chi a ne taw ka kibang tu hi,” ci hi. Tua ahikom ama in tui a neak tu nial hi.
Ngalkap minthang thumte ii ngalhan nasepnate tuabang ahi hi.
18Joab ii suapuipa Abishai (a nu sia Zeruiah hi) sia “A minthang Sawmthumte” ii lampui ahi hi. Ama in tei taw a ngalte zathum do a, that siat hi, tuabangin ama “Sawmthumte” sungah minthang hi. 19Ama sia “Sawmthumte” sungah a minthangbel hi a, amate ii lampui hong suak hi, ahihang tua “Thumte” za in minthang ngawl hi.
20Kabzeel pan Jehoiada ii tapa Benaiah sia ngalkap minthang dang khat hi; ama in ngalhang nasep lian tam mama a seamsa hi a, tuasung pan Moab ngalhang kiciante nii a thalup kihel hi. Vuuk taak ni khat in, dum khat sungah ama tuaksuk in tawpi khat thatlum hi. 21Ama in a thatang lian mama Egypt te tei toai khat that hi. Benaiah in a molpum taw Egypt pa sim a, a tei sutin tua taw that hi. 22“Sawmthumte” sungah khat ahi Benaiah ii ngalhan nasepnate tuabang ahi hi. 23Ama sia “Sawmthumte” sung panin kician a, ahihang “Thum teng” za in minthang zo ngawl hi. David in ama a cingte ukpa in koi hi.
24-39“Sawmthumte” sungah a kihel dang teng sia:
Joab ii suapui Asahel,
Bethlehem pan Dodo ii tapa Elhanan,
Harod pan Shammah le Elika
Pelet pan Helez
Tekoa pan Ikkesh ii tapa Ira
Anathoth pan Abiezer
Hushah pan Mebunnai
Ahoh pan Zalmon
Netophah pan Maharai
Netophah pan Baanah ii tapa Heleb
Benjamin ngam Gibeah pan Ribai ii tapa Ittai
Pirathon pan Benaiah
Gaash ngamnai kuamte sung pan Hiddai
Arabah pan Abialbon
Bahurim pan Azmaveth
Shaalbon pan Eliahba
Jashen ii tapate
Jonathan
Harar pan Shammah
Harar pan Sharar ii tapa Ahiam
Maacah pan Ahasbai ii tapa Eliphelet
Gilo pan Ahithophel ii tapa Eliam
Carmel pan Hezro
Arab pan Paarai
Zobah pan Nathan ii tapa Igal
Gad pan Bani
Ammon pan Zelek
Beeroth pan Naharai Joab ii ngaldalna puapa
Jattir pan Ira le Gareb
Hit mi Uriah, ahi uh hi.
A vekpi in ngalkap minthang sawmthum le sali pha hi.
Currently Selected:
2 Samuel 23: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016