1 Timoteo 5
5
Mwëmo wa Ahuvëi
1Utamukenee muntu në munyampaa ëgweeso musëye mweeso mpampoa mwino veve aja udahëtë utenda kunë tata wako. Vatendee abalanda mwino auna vako, 2vatendee akheikuu mwino vanyokwe, na vatendee akhema në anyughuu gwa irika mwino ahaja ako.
Mwëmo nëuvaghokee Ahimbë
3Vakurye ahimbë, në ahimbë tutë tuutë. 4Nësa muhimbë ukwete vana mba vijukuu, reka veeso visëye tanju uvatendea antu va ukhao në maja na uvatendea afafi vawe në maja, nënaa arë veeso noo vatendewe. Ntëndo ëyëë ëgumuyanjisya Muungu. 5Mweeso në muhimbë tutë tuutë na atikweti muntu wa umughondanëya, mweeso uvëkie ighonje rakwe kunë Muungu na ufwaghëëre ginenera na umuromba Muungu utiku nanë mumwë; 6ëgweeso mweeso në atiumëghiya nkhoo akwe utenda mantu a uwuyanjisya mwëërë wakwe mweeso ukure unkhoo akwe na mbesa mweeso mufanga umwëërë. 7Raghëëya ërëë, gusoko veeso vëdahe utenda vëtina inang'anwa. 8Nësa muntu woong'e wadëa uvaghondanëya anyandughu vakwe, na ino gusoko avoo në va ukhaao mughonjo, mweeso waukhana uhuvëi në muvë nanguu ukëra muntu nëatimuhuvëe Kiristo.
9Reka muhimbë andëkwe mu gëtabu ga iburi ra ahimbë në wina mëakha makumi mutandatu, na waroghowe gamwedu. 10Na mweeso inoneye antu sa vamusudangëe gwa utenda ntendo në njija, mwino muntu nëwareire vana, nëwaraghëëre gëhe nanë waoyiye mëghuu a antu në veru. Kangë sa wendie uvarëeya antu nënaa vina makhasëko, na sa wifunyiye gwa utenda ntendo në njija gwa njëa yoong'e. 11Ëgweeso utavaandëke mu gëtabu ahimbë nëvëtifichiye mëakha makumi mutandatu a ufafo. Gusoko në veeso vendagingëwa na nkumbu nküü ya mwëërë hiya amwa Kiristo veeso vinjë ufenja uroghowa. 12Na uvii veeso vinjë uhanga ikuuriwa gusoko a uhita gwa nguu iraghano rawe ra mwandyo. 13Gunji a asaa, veeso vinjë utendeka atoto na gingëa mu khaya na khaya. Na ti atoto gutufu ëgweeso uvatëta antu na gingëa mu mantu a antu vangëja nëëtivanoneye veeso uyarighëëtya. 14Nene aja ngoona vija ahimbë nëkëë vinaficha mëakha makumi mutandatu vëroghowe. Veeso nëvaroghowa vëudaha ufafa vana, vibale antu va ukhaao na vekeuvafa arughu vitu iyoma ra ugutuka. 15Gusoko ahimbë vëgëtunga nëkëë vinafichaa mëakha makumi mutandatu vayaghee gwa umuhonga Setani. 16Nësa gwina muntu nëumuhuvëe Yesu Kiriso wina anyandughu në ahimbë, mweeso nëavarëëye veeso. Kanisa nëreke gitwëka murigho, gusoko rëdahe uvarëëya avoo në ahimbë tutë tuutë.
Mwëmo nëuvaghokee Anyampaa va Kanisa
17Anyampaa nëvëutendaa mwëmo vija antu inoneye vëvafe ikuryo na gënyamwëmo nëgënoneye, ino avoo në vëutanantya na usëya. 18Gusoko maandëko ëguhanya, “Veve utamëtungee njiku momo nëëgufura#5:18 Nëëgufura: Gwa Ayahudi ng'ombe na igufura viyo ugiharwa hiya na sese në gwa arëmi. viyo mu gehawa,” na “Munyautenda mwëmo unoneye gënyamwëmo gakwe.” 19Utayanje isitaka roong'e kunë munyampaa ëgweeso gwa usudanga wa masudanga vavëë mba vatatu. 20Mwino gwa avoo në vëfwaghëëre utenda mahutye, vakenee usonge a antu voong'e, gusoko avoo nëvësaghie vëdahe googhofa. 21Usonge a Muungu na amwa Kiristo Yesu na usonge a vamalaëka unë Muungu wavahwaniye nene nguguraghëëya veve ukwatëre seria iyii gwa udëa gënamëa uvaru rumwedu mba gihenga usyu wa muntu.
Mantu angëja
22Utagikhakhatëye umwëkëa muntu mëkhono, mba utakhuvëe mu mahutye a antu vangëja. Veve ighoje mughonjo ufuma u mantu në mavë. 23Ufuma itungwee na matiku nëëgwenda ëjie usonge utanywee majë matufu. Ëgweeso nywa muvinyo nduvëngë gusoko a ndaa ako nanë mauvavi nëëguguhangaa tëkëtëkë. 24Mahutye a antu vangëja igheete daaji, na adahie ufika usonge a Muungu mweeso uyaramwua. Ëgweeso mahutye a antu vangëja ëjeudwëëra amite. 25Uvii noo ntendo në njinja igheete daaji; na mbesa itinje gighea itungwee, nyeeso itigifiha khae na khae.
Currently Selected:
1 Timoteo 5: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.