1 Timoteo 6
6
Masëyo nëëvagokee Atughwa
1Atughwa voong'e nëvëvagheme aküü vawe mwino vënoneye ikuryo roong'e, gusoko atadwëëre muntu mba umwe nëugurighëëtya mantu në mavë kunë Muungu nanë u masëyo a Gëkiristo. 2Atughwa avoo në vëkweti aküü nëvëmuhuvëe Kiristo inoneye vata vahorye atë gusoko veeso noo ahuvëi. Ëgweeso veeso inoneye vëtumame vija nanguu ukëra mwandyo gusoko avoo unë vëuhanga sao gwa mwëmo wawe në ahuvëi nanë ayanjwi.
Ukeneri ungëja nëëvaghokee asëyi va weegheeghe
Sëya na susutëya mantu ayaa. 3Nësa muntu woong'e ugusëya masëyo në hiya nanë atikhuvëe na masëyo a tutë a Müküü witu na masëyo në ëtikhweti na uduvi në uja, 4mweeso wijue nkhoo a gëdida mweeso atimanyie intu. Mweeso wëna nkumbu nküü nëti a ntundo gusoko a wikungumi na wikhuvi itambëëmwe na antu vangëja nëëghokee nkhani në itina ryana. Ntendo ëyëë ëgufafa wiru, wibaghui, urighëëtya mantu në mavë nëëvaghokee antu angëja, magheme në a gëntonto, 5na wikungumi nëutina mpeo mukhatë a antu angëja. Antu mwino avaa mahaa awe ëruvëkie na vëumëfentua tutë, vëughema mwino utendeka Mukiristo në njëa a utendeka u mughwarë.
Ukeneri nëuvaghokee Akiristo në aghwarë
6Gwina sao nküü gwa muntu neumuhuvie Muungu, gusoko atiuwuria intu mba rëmwe në ija. 7Gusoko sese gwinajaa na intu mba rëmwe mu urëmi nënaa gwafafwa. Nane daaji mwino gutiudaha uhora intu mba rëmwe ufuma mu urëmi nëikwe gwakuya. 8Uvii, nësa sese gukweti malëwa nanë masaa itambëëmwe na ayaa sese gutiuhanga ra ufëfa. 9Ëgweeso avoo unë vëufenja utendeka aghwarë vëugwëëraa mu maghemwa, na ukwatiwa gënya mutegho nëuguvasachaa veeso uhanga nkumbu nyingë ya gëfutu na ya uvaria. Nkumbu iyii yiuvajubulëya antu mu uruvëki në uvë. 10Gusoko uyanja hela, në mwiiri wa uvë woong'ë. Në ukëërëa nkumbu ëyëë nëti a ntundo antu vangëja vadahie urekanuka kurengë na uhuvëi, na nkhoo yawe yahomiwe itambëëmwe na uvavi në wingë.
Maraghëëyo amwa Faulo kunë Timoteo
11Ëgweeso mwino kunë veve Timoteo, mutumami wa Muungu, rekanuka na mantu ayaa oong'e në mavë. Ikunkunyaye utënda tutë, utënda nëëgumuyanjisya Muungu, umuhuvëa Kiristo nanguu nanguu, uvayanja antu vangëja, ughimu na untu në uja. 12Ihome wihomi në uja wa uhuvëi. Kwatëëra ufanga wa khae na khae në Muungu wagwëtanie veve uduve uduvi mwino urui. Ukëërëa uhuvëi urui ukumwue ukumwui në uja nëwautëndie usonge a masudanga vingë. 13Usonge a Muungu në ugusachaa ufanga u mantu oong'e, na usonge amwa Kiristo në mung'ë a usudanga wakwe usonge amwa Fontio Filato agatenda ukumwui në uja. 14Nene nguguraghëëya veve ukwatëëra maraghëëyo në nene nagufie vee, faka itiku në Yesu ujie udwëëra. Nësa utende vii, gutie muntu mba umwe në ugurighëëtya ivë. 15Muungu wamudwëëya muforiwa nanë Mwibali në müküü në umwedu mu itungo në rënoneye. Uyui unë Mutemi wa atemi na Müküü wa akuu. 16Mweeso imwene unë atiukuyaa na uguduvaa mu weru në gutie muntu nëudahëtë uhumbeera. Mweeso unë gutie muntu nëwadahie umwona mba ugudaha umwona. Kunë mweeso ëtendeke üküü nanë udaho khae na khae. Amini.
Maraghëëyo angëja gwa Akiristo në aghwarë
17Mwino gwa aghwarë va mu urëmi urui, varaghëëye veeso vëtaje gijaghumbua, mba uvëka ighonje rawe gunto a ughwarë nëukëanëye. Ëgweeso uvëka ighonjë rawe kunë Muungu në ugugufaa sese ughwarë itambëëmwe na mantu oong'e nëëgugutëndaa sese guduve gwa uyanjo. 18Veeso nëvëtende vija. Vëtendeke aghwarë gwa utënda ntendo në njija, vekegisëmëa ufunya maari awe gusoko a antu vangëja. 19Uvii veeso vëgivëkëye mpamba nküü gwa matiku në ëjie usonge, gusoko veeso vëdahe ukwatëëra ufanga unë ufanga wa tutë. 20Timoteo, ghoja rasëë në Muungu wagufie veve. Utategheeye sang'ida në ëtina ikuryo kunë Muungu na sang'ida a gëfutu mwino antu vangëja vëutaana ihaa, ëgweeso ti ihaa ra tutë. 21Gusoko gwa utanantya ërëë antu vangëja varekie uhuvëa masëyo në a tutë a uhuvëi.
Mboto itendeke kunë veve.
Currently Selected:
1 Timoteo 6: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.