1 Timoteo 4
4
Ukeneri nëëghokëe Asëyi va uregheeghe
1Itungwee Mwahu Mweru ugurighëëtya daaji mwino matiku a umpeo antu vangëja vëjie ureka uhuvëi. Veeso vëjie uhonga nkhoo ya uregheeghe na masëyo nëëgwetwa na vinyonyinyonyi. 2Anyalakuno va ureegheeghe unë samiri yawe yakuree, gënya mwino yarighiwe moto. 3Antu avaa vëuvaghëëya antu vëkeuroghoa na uvaghëëya antu vekeula malëwa angëja angëja unë Muungu wayatundie ëdahe ughenyifwa itambëëmwe na ufunya asi gwa avoo në vëhuvëe na umanya tutë. 4Gusoko mu gëntu në Muungu wagëtundie në gëja. Na gutie gëntu nëginjëujughutwa nësa antu vinjë ugëghenyifa gwa ufunya asi. 5Gusoko malëwa ëguforiwaa gwa ukhani wa Muungu na marombi.
6Veve ugutenda u mutumami muja wamwa Kiristo Yesu, nësa ugufwaghëëra uvakumbukëya auna vako masëyo ayaa. Utarekee gëlësya veve mughonjo gwa nkhani ya sayu a Gëkiristo na masëyo a tutë në veve wayahongie. 7Rekanuka na mantu nëmavaya nanë mahumo a gëfutu. Veve isëye mughonjo uduva uduvi nëuguraghëëra ikuryo kunë Muungu. 8Uusëya mwëërë gwina sao, ëgweeso masëyo a gënkhoo ëgwetaa sao gwa njëa yoong'e. Gusoko ufuma itungwee faka matiku nëëjie veve uguhanga ufanga unë Muungu waraghanie. 9Ukhani urui në watutë na unoneye uyanjwa. 10Gusoko gwa mpeo ëyëë sese gugikunkunyaya na utenda mwëmo gwa nguu, gusoko sese gukweti ighonje ritu nërëvëkiwe kunë Muungu nëuduvie khae na khae. Muungu uyuu unë Mutyoi wa antu voong'e, ino ino avoo unë vëmuhuvëe mweeso.
11Raghëëya na sëya mantu ayaa. 12Utarekee muntu woong'e aguhorye veve atë gusoko wë mubalanda. Ëgweeso tendeka wë gëloleyo usonge a ahuvëi mukhatë a uduvi, uyanjo, uhuvëi, mung'ë a uja. 13Faka fana nene nëjie, fwaghëëra usoma maandëko, utanantya, usëya usonge a antu. 14Veve inoneye ufwaghëërë ugëtumëa gëfewa nëugëkweti, unë wendie ufewa gwa nkhani ya udaghui itungo nënaa barasa ra anyampaa vaguvëkëe mëkhono. 15Tenda mëëmo ëyëë, iduye veve mughonjo mung'ë a mëëmo ëyëë. Gusoko antu voong'e vëdahe goona mwino veve wakuraa mung'ë a uduvi wako. 16Ighoje veve mughonjo nanë masëyo nëuguyasëyaa. Fwaghëëra utenda uyi, gusoko gwa utënda uyi winjë gityoa veve mughonjo nanë antu nëvëgutëgheeye.
Currently Selected:
1 Timoteo 4: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.