Isaías 3
3
Judá dawak Jerusalén yakat wah dianin yulna
1¡Yamni talah! Dawan parasni nuhni duwa kidika
yaklauwi dakyakna karang Judá dawak Jerusalén yakat bik,
muih balna di duwi uiwa kidika,
kasnin dini dawak was bik.
2Kalawak disna karang kulnin dadasni muihni kidika, war kalbauyang kidika,
wihta kidika, prapit kidika, sukiah kidika dawak muih barak kidika bik,
3kalbauyang balna taninatuna kidika, muih nuhni kidika,
la sumalyang kidika, sitan karak yulbauwa muihni,
4dawak walabis ahal kat tunan muihni balna kidika āna karang;
kaput laih walabis kidika kabamint tunan balna karang.
5Tawan yakat laih kaput karang,
biri biri, dawak kaltalyang yamni karang bik kalbabauna karang.
Wawahma kidika muihbararak balna niningna yakat yaklalauna karang,
muih dauh dikukulwa balna kidika, rispik muihni balna niningna yakat yaklalauna karang.
6Wirahni as yaklauwi, wirahni ūk papangni ūnikau likyakat
kalyulwarang: “Man laih prakma āwanam dutaman bahang, matakituna awah;
tunan dutah adika di daukalna balna kidika.”
7Dawak as kidika yaklauwi nangnitlawarang:
“Yang sip-awasyang dutni balna kidika barangni ānik,
yang ūki yakat kasnik dini bik disyang, dawak prak āwinik bik disyang.
Tawan tunan yaahawinih.”
8Rahm palni laih Jerusalén kidika bahwi uhwi,
dawak Judá kidika laih daukalna,
bahang kidika yakat yuyulwi dawak bik yayamwi Dawan niningkauh,
bahang kidika laih king yakat uhuswi.
9Witingna asalnina dis kidika yaklauwi yulnina yaklauwi;
dutnina balna kidik mamalwaski;
Sodoma yamna dai kapat muih bitik yakat niningna kakawi.
¡Alakaih witingna kidika, witingna dalani wauhnin kidika alas ridi yayamwi!
10Yamniki#3.10 Yamniki: kaput kidika yamni ulna. Hibru kau laih yultanauh. lā kat muihni kidika, kat witing nining yakat yamni karang bahang
dawak witing warkni balna minik kalahwa kidika.
11¡Alakaih muih dutni kidika, witing nining yakat dutni karang!
Papang yaklauwi witing warkni balna minit kalana karang.
12Muihbin as king kawi, yang tawanki yakat bahang kidika kingni laih muih taihyang;
kabamint kidika laih yayal tingnina yakat ki.
Tāmatuna muihni balna alas mayuyulwi, yang tawanki,
ta dutni yakat maduwi uiwi.
13Dawan ridi kalna, la yamna atnin,
ridi kalna witing tawanni#3.13 Witing tawanni: sara mani kau ulna kidika kaput ulna. Hibru kau laih tawan balna. lani yamna atnin.
14Dawan yaklauwi la yakat diduwi kiuna karang,#Mi 6:2.
dawak muihbararak yakat dawak tawan tunan muihni balna yakat bik diyulwarang:
“Manna lawa wainki yamak daukaltamana;#Is 5:1-7.
muih miniknakunni yakat dinina malnamana,
dawak maltamana kidika ūmana yakat apaktamana.
15¿Angdika rahmni kau duta tawanki taihtamanah
dawak muih minikunni muhni ataktamanah?”
Dawan parasni nuhni duwa kidika kaput yulwi.
Jerusalén yayalni balna yakat wah dianin yulna
16Dawan aput bik yulwi:
“Sayan yayalni balna, witingna manah kapat kaldakawa kidika,
dawak tunanina wauhlauwi lapapakwa kidika,
dawak miniknapa dadasni tatalwa kidika,
bikis lapapakwa kidika,
dawak lanina kau disisitwa kilingwa kidika,
17wah diaki kidika laih, basnina bitik uhwarang mara dilaihwakat,
dawak wahnina dis, laih diyakki.”
18Kidika mani
Dawan yaklauwi yamwak, paknin dini yaksihni balna kidika didiswarang
kalnina yakat ahawa kidika, tunanina paknin bik:
19tingnina yakat ānin dini, tunanina muknin dini,
20tunan kau iriban sitwa kidika kalni kau sēn sitwa kidika,
bamak sitnin, di walapni, dawak di kalyamtamana kidika,
21dawak ting-ānin, nangtak ānin,
22prak yayamni, kalsuruhmnin dini, dawak lalah uni,
23wayatal, asna yayamni,
tun sitnin, dawak tun muknin,
24di walapni pāni yakat, siknis karang;
bamak sitnin kidika pāni yakat, wahlabu karang;
basni yaksihn kusna kidika pāni yakat, basni bitik uhlana karang;
asna yaksinh pāni yakat, asna babahni tubakni kidika karang;
yaksinh kidika pāni yakat, ayan daihni markni dutanama.
25Ahalma balna kidika wār yak dadauwarang,
kalbauyang balna kidika kalbabauwa yakat dadauna karang.
26Tawan nuhni kidika kaidarang dawak kulnin bukna karang,
dawakat alas palni kalna karang ruhmwi dadawak.#Jr 14:2; Lm 1:4.
Currently Selected:
Isaías 3: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998