Isaías 2
2
Dawan yaklauwi yamna karang, sau muihni balna bitik pasyakat kulnin aslah duduna karang
(Mi 4:1-3)
1Adika prapit Isaías, Amoz walanibis dai kidika yulni balna, bahang adika yulni balna laih Papang yaklauwi niningkawa dai, Judá dawak Jerusalén minit yakat di kalahwarang dai kidika:
2Mani witni yakat asang tuna kau
Dawan ūni sakkidika yakat pāni kalana karang.
Kidika asangni laih tanit maluihni karang,
asang ūk balna karak.
Nisan balna bitik witing yakat aina karang;
3tawan mahni aiwarang, dawak yuyulwarang:
“Aiwanangkat Dawan asangni yakat mailmawanang,
Jacob Papangni ūni yakat,
bahang witing tāni balna kidika manikingkawarang,
dawakat kaput laih, kidika tani yakat lapakdarang.”#Is 56:6-7; Zac 8:20-22.
Kat Sayan asangni kaupak Dawan sumalwa balna kidika kalahna karang,
dawak witing yulni balna kidika Jerusalén kaupak kaiwarang.
4Dawan yaklauwi sau muihni balna kidika lanina yamna karang.
Witingna isninaparah kidika sau sahnin dini yayamna karang,
dawak langninasa balna kidika laih di minik bahnin dini yayamna karang.#Jl 3:10.
Tawan muihni as bik kalbaunin dini kidika laihwi muih nining yakat dulauwas karang,
dawak war kalbaunin bik sumalnin-awas karang.
5¡Jacob tawanni mawanang,
Dawan yaringni yakat lapakdanang!
Witingna manah kapat kaldakakawa yakat wah diana
6Dawan, man wanaihma balna kidika ruhmta danaman, Jacob tawanni balna kidika;
adika sauni laih ditalyang#Lv 20:27; Dt 18:10-11. balna manah banghna witingna kidika laih ma kilwa kaupak aina,
filisteo balna paskau sukyah balna kapat,
dawak sau ūk muihni balna karak pramis yayamwi.
7Sauni kidika laih gol dawak lalah karak banghna,
di minit nuhni kidika laih mahni palni;
dawak sauni kidika laih aras balna kidika banghna,
dawak kar balna bik kapat.
8¡Kaput bik laih, dawan dauh wayani balna kidika banghna!
Muih balna kidika dawan dauh wayani
muih tingnikau yamna kidika yakat minitna yuyulwi.
9Kidika kalni dinit yakat bubukna.
¡Dutnina datang disnin awas ki!
10Muih balna kidika kipala walsah yakat kakawarang,#Rib 6:15.
sau dinit yakat kakawarang;
Dawan kaiwa yamadangni kidika yulni yakmamaldarang,
witing king yaringni nuhni karak kaiwa kidika.#2 Ts 1:9.
11Witingna manah kapat kaldakakawa kidika muhnina abuk dadawarang;
praut muihni balna bik sau yakat bubukwarang.
Kidika mani yakat Dawan manah witing nuhni kidika muih niningyakat yakna karang,
12ma as kat Dawan parasni nuhni duwa kidika warkni yamwarang mani kat,
muih witingnamanah kapat kaldakakawa balna niningna yakat,
bahang kidika muihni balna sau yakat lakna karang;
13Líbano suhunni kapat kaldakakawa balna niningna yakat,
maluihni naini,
kidika awaskat Basán iniban kapat kaldakakawa balna yakat;
14muih bitik witingna asang maluihni kapat kaldakakawa kidika yakat,
15makau kilwi talnin pāni tanit maluihni kapat kaldakakawa balna yakat,
kidika awaskat daklana tanit parasni kapat kaldakakawa kidika balna yakat,
16Tarsis kumani kuring balna kapat kaldakakawa balna yakat,
kuma kuring tanit yayamni.
17Witingna manah kapat kaldakakawa balna kidika
sau yakat lakmukna karang.
Kidika mani Dawan manah witing nuhni kidika muih balna yakat niningna kāna karang, kidika mani,
18dawak dawan dauh wayani balna kidika bitik dahnyamwarang.
19Dawan yaklauwi, sau yakat bilnilauwarang yakat,
muih balna kidika kipala sulihni yakat kakana karang,
dawak sau sulihni balna yakat bik;
yakmamaldana karang Dawan yamadangni kaiwa kidika yulni,
dawak yaringni nuhni karak king kaiwa kidika.
20Kidika mani, muih balna daninawan dauh wayani balna kidika ruhmna karang
matis balna yakat dawak, umis balna yakat bik,
kidika wayani gol dawak lalah kau witingna yayamna dai kidika,
witingna minitna yuldang atwi,
21kipala sulihni yakat kakawarang,
Dawan yamadangni kaiwa kidika yakmaldinin yulni,
witing king yaringni karak kaiwa kidika,
witing yaklauwi sau bitik yakat bilnilauwakat.
22Muih yakat rahm kultamana kidika datanauh,
di dibin as kapat ki.
Muih sangnika kidika laih wingnita puhna as kapat ki.
Currently Selected:
Isaías 2: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998