ZACARÍAS 3
3
Curacunata mandaj Josueta muscuipi shina ricushcamanta
1Mandaj Diosca ñucamanca, curacunata mandaj Josué curatami ricuchirca. Paica, Mandaj Diospaj angelpaj ñaupajpimi shayacurca. Josué curapaj alli maquimanca, Satanasmi juchachingapaj shayacurca. 2Mandaj Diosca, Satanastaca cashnami nirca: “Riqui Satanás, cantaca Mandaj Diosllataj llaquichishca cachun. Jerusalén pueblota agllaj Mandaj Diosllataj cantaca llaquichishca cachun. Caica, lunyacuj ninamanta llujshichishca brazusmi” nircami. 3Josueca, Mandaj Diospaj angelpaj ñaupajpica, yallitaj mapa churanata churashcami shayacurca. 4Chaita ricushpami, chai angelca paipaj c'uchupi shayacujcunataca: “Chai mapa churanata llujshichichij” nishpa mandarca. Chai q'uipaca Josuetaca: “Riqui, chai mapa churanacunata anchuchishpami, bodaman rina sumaj churanata churachini” nircami. 5Chai q'uipaca: “Limpio turbanteta Josuepaj umapi churachichij” nishpami mandarca. Chashna nijpimi, paicunaca limpio turbanteta umapi churachishpa, sumaj achij nicuj churanatapish churachircacuna. Paicuna Josueman churanata tucui churachingacamaca, Mandaj Diospaj angelca shayacurcallami.
6Chai q'uipami, Mandaj Diospaj angelca, Josuetaca cashna nirca: 7“Tucuita Mandaj Diosca cantaca cashnami nin: Ñuca yachachishcacunata, mandashcacunata punllanta allita rurashpaca, ñuca huasitaca canmi mandangui. Shinallataj huasi canllacunatapish canmi ricungui. Huasi ucupi imalla tiyajcunata caicunahuan ricuchunpish canmanmi cusha. 8Curacunata mandaj Josué, cunanca alli uyapangui. Canpish, cambaj ñaupajpi tiyacuj runacunapish yuyarina runacunami canguichij. Riqui, ñucata servijtaca, Retoñacuj yurata shinami apamuni. 9Josuepaj ñaupajpi ñuca churashca rumita ricuichigari. Chai rumillapimari, canchis ñahuicuna tiyacun. Riqui, ñucami pai ima shina cashcataca rurashpa churasha. Shinallataj cai llajtapi causajcunapaj juchatapish, shuj punllallapimi anchuchisha. Mandaj Dios ñucatajmi chashna nini. 10Chai punllapica cancunaca caishujta, chaishujta cayanacushpami uva yuracuna ucupi, higo yuracuna ucupi tiyaringuichij ninmi tucuita Mandaj Diosca” nishpami huillarca.
Currently Selected:
ZACARÍAS 3: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.