ZACARÍAS 4
4
Curi candelerotapish olivos yuracunatapish muscuipi shina ricushcamanta
1Ñucahuan parlanacuj angelca ñucapajman shamushpami, ñucataca rijchachirca. Shuj runa muscucushpa rijcharij shinami rijcharircani. 2Chai angelca ñucataca: “¿Imatataj ricungui?” nishpami tapurca. Shina nijpica ñucaca cashnami nircani: “Curi candelerotami ricuni. Chai candelero jahuapica, aceiteta churanatapishmi ricuni. Shinallataj chai jahuapica, canchis lamparacuna tiyacujtapishmi ricuni. Chai lamparacunaca canchis tubocunatami charin. 3Candelero c'uchupica, ishqui olivos yuracunami shayacun. Shujca aceiteta churana alli ladoman, caishujca lluqui ladomanmi shayacun” nircanimi.
4Chai q'uipaca, ñucahuan parlanacucuj angeltaca: “Ñuca amito ¿caica imatataj ricuchinri?” nishpami tapurcani. 5Chashna tapujpimi, chai angelca ñucataca: “¿Manachu ima cashcata yachangui?” nirca. Shina nijpimi ñucaca: “Ñuca amito, mana yachapanichu” nircani.
6Chaimantami chai angelca, ñucamanca cashna nirca: “Zorobabelmanmi Mandaj Diosca cashna nin: Mana soldadocunallahuanchu, mana c'ari c'ari macanacushpallachu mishangui. Ashtahuanpish ñuca Espirituhuanmari mishangui. 7Jatun urculla, canca ¿pitaj canguiyari? Zorobabelpaj ñaupajpica, pugru pamba tucushpami saquiringui. Paimi punta rumitaca llujshichinga, chashna ruracujpica paihuan caj runacunaca: Sumajmari, sumajmari nishpami caparingacuna ninmi” nircami.
8Chai q'uipapish, Mandaj Diosca cashnapishmi nirca: 9“Diospaj huasita ruranata callaringapajca, Zorobabelmi, paipaj maquicunahuan callari rumita churashpa callaringa. Chai huasitaca paillatajmi tucuchinga” nircami. Chashna rurashcacunata ricushpami, ñucataca tucuita Mandaj Diosllataj cancunapajman cachashcataca yachanguichij. 10“Diospaj huasita ruranata Zorobabel callaricujpi p'iñajcunapish tucuchishcata ricushpaca cushicungacunami. Zorobabel plomadata maquipi charicujtapish ricungacunami. Chai canchis lamparacunaca, Mandaj Diospaj ñahuicuna cai pachata tucuita ricucujtami ricuchin” nircami.
11Cashnapishmi ashtahuan tapurcani: “Candeleropaj alli ladoman shayacuj olivo yurapish, lluqui ladoman shayacuj olivo yurapish ¿imatataj ricuchin? 12Lamparaman chayana aceite tubo c'uchupi shayacuj ishqui olivo ramacunamanta curi shina llujshicuj aceiteca ¿imatataj ricuchin?” nishpami tapurcani. 13Shina nijpimi chai angelca: “¿Manachu ima cashcata yachangui?” nirca. Shina nijpimi ñucaca: “Amito, mana yachapanichu” nircani.
14Chashna nijpimi chai angelca: “Caicunaca tucui cai pachata ricucuj Jatun Dios aceitehuan churashca ishqui runacuna paipaj ñaupajpi shayacujtami ricuchin” nircami.
Currently Selected:
ZACARÍAS 4: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.