ZACARÍAS 2
2
Medina cordelta muscuipi shina ricushcamanta
1Chai q'uipami, ñahuita huichilla alzarcani. Chaipica medina cordelta maquipi aisashpa shayacuj shuj runatami ricurcani. 2Chai runataca: “¿Maimantaj ricungui?” nishpami tapurcani. Chashna nijpimi paica: “Ñucaca, Jerusalén pueblotami mashna ancho cashcata, mashna largo cashcata medinaman ricuni” nirca.
3Chaimantaca ñapish ñucahuan parlanacuj ángel llujshijpica, shujtaj angelmi paita tupanaman llujshirca. 4Chai tupanaman llujshij angelca, chaishuj angeltaca cashnami nirca: “Callpashpa chai mosoman cashna nigri: Jerusalén pueblopica achca runacunapish, achca animalcunapishmi jundaringa. Jerusalenca, pircacuna illajllami canga. 5Jerusalentaca, ñucami lunyacuj ninahuan muyundijta pircashca shina jarcasha. Ñucaca jatun cashcata ricuchingapajmi, paicunapaj chaupipica cashna ninmi nigri” nishpami huillarca.
Diosca paipaj agllashcacunataca tigramuichij nishcamanta
6Mandaj Diosca cashnami nin: “Riquichij, ñucami caipi chaipi causagrichun cacharcani. Cunanca janaj lado llajtapi causajcuna miticuichigari” ninmi Mandaj Diosca. 7“Babilonia llajtapi causaj Sionlla, miticuyari” ninmi.
8Tucuita Mandaj Diosca cashnami nin: “Ñucataca jatunyachishca q'uipami, cancuna imalla charishcacunata quichujcunapaj llajtacunamanca cachanga. Maijanpish cancunata llaquichishpaca, paipaj ñahuita ricucujta tujsicuj shinami llaquichicun. 9Chaimantami ñuca maquita alzashpa, paicunataca llaquichigrini. Paicuna imalla charishcacunatapish, servijcunallatajmi tucuita quichushpa apangacuna. Chashna rurajpimari ñucataca, tucuita Mandaj Dios cachashcata yachanguichij” ninmi.
10Mandaj Diosca cashnami nin: “Siónpi causajcunalla, cushicushpa cantaichigari. Ñucaca, ñallami cancunapajman shamugrini. Ñuca shamushpaca, cancunahuanmi causasha. 11Chai punllapica, Mandaj Dios ñucapajmanca, achca llajtacunamantami tandanacumungacuna. Chaimantaca ñucapajllami tucungacuna, ñucapish paicunahuanmi causasha” ninmi. Chashna rurashcata ricushpami, tucuita Mandaj Diosllataj ñucata cancunapajman cachashcataca yachanguichij. 12Mandaj Diosca, jucha illaj llajtapimi, pai japina cashca Judá llajtataca japinga. Jerusalén pueblotapish agllangami.
13Tucui cai pachapi causajcuna, Mandaj Diospaj ñaupajpica, upalla caichigari. Paipajlla caj jucha illaj causanamantami paica jatarishca.
Currently Selected:
ZACARÍAS 2: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.