MARCOS 15
15
Pilatopajman Jesusta pushashcami
(Mt 27.1-2, 11-14; Lc 23.1-5; Jn 18.28-38)
1Ñalla pacarimugrijpimi, curacunata mandajcunaca, cunaj yuyajcunahuan, mandashcacunata quillcajcunahuan, mandajcunapuralla tandanacushcacunahuanpish tandanacushpa parlanacurcacuna. Chai q'uipami Jesustaca huatashcata Pilatopajman pusharcacuna. 2Pilatoca Jesustaca:
–¿Canca, judiocunata jatun Mandajchu cangui?– nijpi, Jesusca:
–Ari, canllataj ña chashna ninguica– nirca.
3Chaimi curacunata mandajcunaca, Jesustaca caita chaita nishpa ashtahuan juchachircacuna. 4Cutinmi Pilatoca:
–Riqui, cantaca achcata juchachicujpipish ¿manachu imata cutichingui imamí?– nirca.
5Ashtahuanpish Jesusca, imata mana nircachu. Chaimantami Pilatoca achcata mancharirca.
Jesustaca huañunatajmi nishcami
(Mt 27.15-31; Lc 23.13-25; Jn 18.38–19.16)
6Pilatoca pascua fiesta punllapica, paicuna maijanta cacharichun nishca shuj prezutami cacharij carca. 7Chaipica Barrabás shuti shuj runami tiyarca. Paica quiquin llajtamanta macanacungapaj jatarichishpami shujta huañuchishca carca. Chaimantami paihuan jatarijcunandij prezu tiyacurca. 8Pilatopajman achcacuna shamushpaca, paicuna ima shina ruraj cashca shinallatajmi shuj prezuta cacharichun mañai callarircacuna. 9Chaimi Pilatoca:
–¿Judiocunapaj jatun Mandajtachu cacharichun ninguichij?– nirca. 10Curacunata mandajcunaca, Jesustaca envidiallamanta huañuchichun nishcatami Pilatoca yacharca. 11Ashtahuanpish curacunata mandajcunaca, Barrabasta cacharichun nichij nishpami, gentecunataca caparichun yachachircacuna. 12Cutinllatajmi Pilatoca:
–Cancunallataj judiocunata jatun Mandaj nicushcataca ¿imatataj rurachun ninguichij?– nijpi,
13paicunaca:
–¡Paitaca chacatachun ninchijmi!– nishpami caparircacuna. 14Cutinllataj Pilatoca:
–¿Ima mana allitataj rurashcari?– nircami. Ashtahuanpish paicunaca:
–¡Chacatachun ninchijmi!– nishpami ashtahuan caparircacuna.
15Pilatoca gentecunapi alli ricurisha nishpami, Barrabasta cacharirca. Jesustaca azotichishca q'uipami, chacatachun curca.
16Chaimi soldadocunaca, Pilato mandana huasi canllaman Jesusta pushashpa, chaipi caj tucui soldadocunata tandachircacuna. 17Paicunaca amsa puca capata p'achallichishpami, umapica cashamanta ahuashca coronata churachircacuna. 18Chashna rurashpaca:
–¡Judiocunapaj jatun Mandaj allimari cangui!– nij tucunatami callarircacuna.
19Chaipica shuj carrizohuan umapi garrotishpami, ch'ucashpa, paipaj ñaupajpi cungurishpa adoraj tucurcacuna. 20Chanzata rurashca q'uipaca, p'achallichishca amsa puca capata anchuchishpami, paipaj churanallatataj cutin churachishpa, chacatanaman pushangapaj llujshichircacuna.
Jesusta chacatashcami
(Mt 27.32-56; Lc 23.26-49; Jn 19.17-30)
21Jesusta chacatanaman pushacushpaca, chagramanta shamucuj Cirenemanta Simonhuanmi tuparca. Paitaca cai cruzta apari nishpami mandarcacuna. Paica Alejandropaj, Rufopaj yayami carca.
22Jesustaca Gólgota shuti urcumanmi pusharcacuna. (Gólgota nishcaca: “Uma Tullu” nisha ninmi). 23Chaipica, mirrahuan chagrushca vinotami ubyachishun nircacuna. Jesusca mana ubyarcachu. 24Jesusta chacatashpaca maijanlla imata apana cashcata ricungapajmi Jesuspaj churanacunataca sorteashpa chaupircacuna.
25Jesustaca iscun horas tutamantatami chacatarcacuna. 26Imamanta huañuchishcata huillaj quillcapica: “Judiocunapaj jatun Mandajmi” nishcami tiyacurca. 27Jesushuanca ishqui shuhuacunatapishmi chacatarcacuna. Shujtaca alli ladoman, caishujtaca lluqui ladomanmi chacatarcacuna. 28Paicunahuan chacatajpimi: “Millaita rurajcunata shinallatajmi paicunahuan llaquichishca canga” nishpa Quillcachishcapi nishcaca pajtarca. 29Chaita puricujcunaca, paicunapaj umata cuyuchishpami cashna nishpa c'amircacuna:
–¡Jajai! Canca, Taita Diospaj huasita urmachishpa, quimsa punllallapica cutin shayachishami nircanguica. 30Canllataj quishpirishpa cruzmanta uricuiyari– nircacunami.
31Chai shinallatajmi curacunata mandajcunapish, mandashcacunata quillcajcunapish Jesustaca chanzata rurashpa, caishuj chaishuj cashna ninacurcacuna:
–Shujtajcunataca quishpichircami, ashtahuanpish paillatajca manamari quishpiri tucunchu. 32¡Israelcunapaj jatun Mandaj Cristo cashpaca, ñucanchij ricushpa cringapaj, cruzmanta cunanllataj uriyachun!– nircacunami.
Jesushuan chacatashcacunapish c'amircacunami.
33Chaupi punllamanta quimsa horas chishicamami tucui cai pacha amsayarca. 34Chai horallatajmi Jesusca:
–¡Eloi, Eloi!, ¿lama sabactani?– nishpa sinchita caparirca. (Chaica: “Ñuca Dioslla, ñuca Dioslla, ¿ima nishpataj ñucallata saquihuanguiyari?” nisha ninmi).
35Chaipi cajcunamanta maijancuna chaita uyashpaca:
–Riquichij, Eliastamari cayacun– nircacunami.
36Chaita uyashpaca chaipi cajcunamanta shujmi, callpashpa rishcahuan shuj esponjata japishpa vinagrepi satishpaca, carrizo puntapi churashpa Jesusman ubyachirca. Chashna rurashpaca:
–Ricushunchij, ¿cruzmanta Elias uriyachij shamunchu, imamí?– nircami.
37Jesusca, sinchita caparishpa huañurcallami. 38Jesús huañujpica, Taita Diospaj huasi ucupi jarcachishca linsoca jahuamanta urimanmi chaupirirca. 39Jesusta chacatashca ñaupajpi caj patsaj soldadocunata mandajca, caparishpa huañujta ricushpami:
–¡Caica Taita Diospaj Churitajmari cashca!– nirca.
40Jesusta chacatashcataca achca huarmicunami carullamanta ricucurcacuna. Chai huarmicunapurapica, Magdalamanta María, q'uipa Jacobopaj, Josepaj mama Mariapish, Salomepishmi carca. 41Paicunaca Galileapi Jesús puricujpimi, paipajta rurashpa catimurcacuna. Jerusalenman Jesushuan huichiyamuj achca huarmicunapishmi carca.
Jesusta pambashcami
(Mt 27.57-61; Lc 23.50-56; Jn 19.38-42)
42Samana punllapaj allichina punllaca ñami chishiyarca. 43Chai chishimi mandajcunalla tandanacushcapuramanta Arimateamanta caj José shamurca. Paica paicunapurapica alli nishcami carca. Paipish Taita Dios mandana punllata shuyacujmi carca. Paimi mana manchashpa, Pilatopajman shamushpaca Jesuspaj cuerpota pambangapaj mañarca. 44Jesusca ñami huañushca nijta Pilato uyashpaca, mancharishpami huañurcatajchu imashi nishpa yuyacurca. Patsaj soldadocunata mandajta cayashpa, ñachu huañun nishpa, 45tapujpimi patsaj soldadota mandajca:
–Ari, ñami huañun– nijpi Pilatoca: Shinashpaca Jesuspaj cuerpotaca pambagrichun Joseman cugrichij nirca. 46Joseca shuj linsota randishpami, Jesuspaj cuerpota uricuchishpaca linsohuan pilluchirca. Chaimantaca sinchi q'uillinpi quinriman jutcushcapi churashpami, jatun rumita singuchishpa jutcutaca huichcarca. 47Jesusta maipi churajtaca, Magdalamanta Mariapish, Josepaj mama Mariapishmi ricurcacuna.
Currently Selected:
MARCOS 15: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.