MARCOS 16
16
Jesús causarishcami
(Mt 28.1-10; Lc 24.1-12; Jn 20.1-10)
1Samana punlla chishiyashpa tucurijpica, Magdalamanta Mariapish, Jacobopaj mama Mariapish, Salomepishmi mishquijllata ashnacujta, Jesuspaj cuerpopi churagringapaj randircacuna. 2Semana callari tutamanta, inti ña llujshicujpimi, pambashcaman shamurcacuna. 3Paicunaca:
–¿Jutcu pungupi churashca rumitaca pitaj anchuchingari?– ninacurcacunami.
4Ashtahuanpish paicuna ricunapajca, chai jatun rumitaca ña anchuchishca cashcatami ricurcacuna. 5Chaimanta jutcuman yaicushpaca, alli ladomanca yurajlla suni churanata churashca, shuj moso tiyacujta ricushpami mancharircacuna. 6Ashtahuanpish chai mosoca:
–Ama mancharichijchu. Nazaretmanta chacatashca cashca Jesustami mashcacunguichij. Paica causarishcamari, mana caipichu. Paita maipi churashca cashcapi ricuichij. 7Paipaj yachacujcunamanpish, Pedromanpish huillagrichij. Cancunapaj ñaupami Galileaman ña rirca. Chaipimi pai nishca shinallataj ricunguichij– nircami.
8Chaimi chai huarmicunaca manchaihuan chujchushpa, jutcumanta llujshishcahuan rircacuna. Manchaihuan cashcamantami piman imata mana nircacuna.
Magdalamanta Mariaman Jesús ricurishcami
(Jn 20.11-18)
9Semana callari tutamanta Jesús causarishpaca, Magdalamanta Mariamanrajmi puntaca ricurirca. Chai huarmimantami Jesusca, canchis supaicunata llujshichishca carca. 10Paimi Jesushuan purijcunamanca Jesusca causarishcami nishpa huillarca. Paicunaca llaquirishpami huacacushcacuna carca. 11Jesús causarishcata María huillajpipish, Jesusca causacushca canata, María ricushca canatapish paicunaca mana crircacunachu.
Ishqui yachacujcunaman Jesús ricurishcami
(Lc 24.13-35)
12Chai q'uipaca, ishqui yachacujcuna shujtaj puebloman ricujpimi, Jesusca shujtaj shina ricurirca. 13Paicuna tigrashpa yachacujcunaman huillajpipish mana crircacunachu.
Jesusca apostolcunata huillagrichun mandashcami
(Mt 28.16-20; Lc 24.36-49; Jn 20.19-23)
14Chai q'uipaca paipaj yachacujcuna micucujpimi chunga shuj yachacujcunamantaj ricurirca. Chaipimi Jesusca:
–Ñuca causarishcata ricujcuna huillajpipish rumi shungu cashpami mana crircanguichij– nishpami sinchita rimarca. 15Cashnapishmi nirca:
–Alli huillaita tucuicunaman huillangapaj tucui cai pachata richij. 16Alli huillaita maijanpish crishpa bautizarijtaca quishpichishcami canga. Ashtahuanpish mana crijtaca, jatun llaquiman cachashcami canga. 17Ñucata crijcunaca, pi mana rurai tucushca caicunatami rurangacuna: Ñuca shutipimi supaicunataca llujshichingacuna, shujtaj rimaicunatapishmi rimangacuna. 18Culebracunata maquihuan japijpipish, ima huañuipajta ubyajpipish imata mana rurangachu. Ashtahuanpish ungushcacunapaj jahuapi maquita churashpa alliyachingacunami– nircami.
Jahua pachaman Jesús rishcami
(Lc 24.50-53)
19Shinallataj Mandaj Jesús tucuita rimajpica, paitaca jahua pachamanmi aparca. Chaipica, Taita Diospaj alli ladopimi tiyarirca. 20Yachacujcuna chaimanta rishpaca, tucui llajtacunapimi huillarcacuna. Chashna huillacujpica Mandaj Jesusmi paicunataca ayudarca. Milagrocunata rurachishpami paicuna huillacushcaca Jesusllataj huillachicushca cashcata ricuchirca. Chashna cachun.
Currently Selected:
MARCOS 16: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.