MARCOS 14
14
Jesusta huañuchinata yuyarishcacunami
(Mt 26.1-5; Lc 22.1-2; Jn 11.45-53)
1Levadura illaj tandata micuna Pascua fiestapajca, ishqui punllami illarca. Chaipimi curacunata mandajcuna, mandashcacunata quillcajcunapish ima shinataj Jesustaca, umashpalla japishpa huañuchinchij nishpa yuyarinacucurcacuna. 2Ashtahuanpish paicunaca:
“Cai fiesta punllacunapica ama japishunchijchu, ñataj gentecuna ñucanchijtaraj imata ninman” nircacunami.
Betaniapi Jesús cajpi mishquiman ashnacujta umapi tallishcami
(Mt 26.6-13; Jn 12.1-8)
3Jesusca Betaniapi cashpaca lepra ungüihuan cashca Simonpaj huasipimi mezapi micushpa tiyacurca. Chaipi cajpimi, shuj huarmica, alabastro botellapi achca valij mishquijllata ashnacuj nardota apashpa Jesuspajman shamurca. Chaipimi alabastro botellata p'aquishpa, Jesuspaj umapi tallirca. 4Chaipica maijancunaca paicunapuralla p'iñarinacushpami, cashna ninacurca:
–¿Ima nishpataj cai mishquijllata ashnacujtaca, yanga tallin? 5Chaitaca quimsa patsaj yalli denariocunapi c'atushpa huajchacunaman cushpachari alli canman carca– nishpami, chai huarmitaca huashalla rimarcacuna.
6Chaimi Jesusca cashna nirca:
–Saquichij ¿ima nishpataj chai huarmitaca chashna rimanguichij? Paica ñucapajca allitamari ruran. 7Huajchacunaca mana illangachu, paicunapaj allita ruranata munashpaca ruracunguichijlla. Ashtahuanpish ñucaca, ña mana cancunahuan causacushallachu. 8Cai huarmica, pai tucui rurai tucushcatami rurashca. Pambanapaj ñuca cuerpo allichishca cachunmi, cashna rurashca. 9Tucui cai pachapica, maipipish cai alli huillaita huillacushpaca, cai huarmi imata rurashcatapishmi huillangacuna. Chaipica, allitamari rurashca nishpami yuyaringacuna. Chashnatajmi canga– nircami.
Judas Iscariote Jesusta entregasha nishcami
(Mt 26.14-16; Lc 22.3-6)
10Chai q'uipami, chunga ishqui yachacujcunapuramanta Judas Iscarioteca, Jesusta japichisha nishpa curacunata mandajcunahuan parlanacugrirca. 11Jesusta japichisha nijta curacuna uyashpaca, achcata cushicushpami cullquita cushun nircacuna. Chai pachamantami Judasca, ima shinapish Jesusta japichinata yuyacurca.
Pascua micuita Mandaj Jesús micushcami
(Mt 26.17-29; Lc 22.7-23; Jn 13.21-30; 1 Co 11.23-26)
12Pascua fiesta callari punllapica, levadura illaj tandata micuna, malta c'ari ovejata Taita Diosman cushpa rupachinapishmi carca. Chaipimi Jesustaca yachacujcunaca:
–Pascua fiestapi quiquin micuchunca ¿maipitaj allichigrichun ningui?– nijpi,
13Jesusca paipaj yachacujcunamanta ishquita cashna nishpa cacharca:
–Puebloman richij. Chaiman chayashpaca, puñu yacu aparishca shuj runahuanmi tupanguichij. Paihuan tupashpaca paita catishpa ringuichijlla. 14Pai maiman yaicujpica, huasiyuj runataca: “Ñucanchij yachachijca: ¿Mai ucupitaj Pascua micuitaca ñuca yachacujcunahuan micusha? ninmi” ninguichij. 15Paica, altibajopi ña allichishca shuj jatun ucutami ricuchinga. Chaipica, ñucanchij micunata allichinguichij– nishpami cacharca.
16Yachacujcuna rishpa puebloman chayajpica, Jesús nishca shinallatajmi pajtarca. Chaipimi Pascuapi micunataca allichircacuna.
17Ña tutayamucujpica, chunga ishqui yachacujcunandijmi Jesusca chayarca. 18Mezapi ña micucushpami Jesusca:
–Cancunapuramanta ñucahuan micucuj shujmi, ñucataca huañuchichun entregagrin. Chashnatajmi canga– nircami.
19Chaimi paicunaca llaquirishpa caishuj chaishuj:
–¿Ñucachu cani? ¿Ñucachu cani?– nishpa tapunacui callarircacuna.
20Chaimi Jesusca cashna nirca:
–Chunga ishquipuramanta shuj, ñucahuan cai platopi tandata jucuchijmi japichinga. 21Runa Aichayujtaca, quillcachishcapi nishca shinallatajmi huañuchigrin. ¡Aij, Runa Aichayujta huañuchichun entregaj runalla! Cai runaca mana huacharishca cashpachari, alli canman carca– nircami.
22Chashna micucushpami Jesusca tandata japishpa, Taita Diosta pagui nirca. Chaita chaupishpaca:
–Japichij, caica ñuca cuerpomi– nishpami curca. 23Tandata micushca q'uipaca copata japishpa, Taita Diosta pagui nishpa cujpimi, chai copamantaca tucuicuna ubyarcacuna. 24Chaipimi Jesusca:
–Caica, achcacunata quishpichingapaj mushuj ruranata callarichishcata ricuchij ñuca jichana yahuarmi. 25Taita Dios mandacujpi mushujta ubyangacama, uvamanta capishca vinotaca cutinca mana ubyashachu. Chashnatajmi canga– nircami.
Pedroca Jesusta mana rijsinichu nina cashcata Jesús huillashcami
(Mt 26.30-35; Lc 22.31-34; Jn 13.36-38)
26Cantota cantashca q'uipa chaimanta llujshishpaca, Olivocuna tiyan urcumanmi rircacuna. 27Chaipimi Jesusca:
–Quillcachishcapica: “Michijtaca huañuchishami, oveja canllaca caita chaitami ringacuna” ninmi. Chaipi nishca shinallatajmi cunan tutallataj ñucataca mana crishpa tucuicuna shitashpa ringuichij. 28Ashtahuanpish Taita Dios causachishca q'uipaca, cancunapaj ñaupami Galileaman risha– nijpimi, 29Pedroca:
–Tucuicuna shitashpa rijpipish, ñucaca manataj saquishachu– nirca.
30Chaimi Jesusca:
–Cunan tutallataj gallo manaraj ishqui cutin cantajpimi, ñucataca quimsa cutin mana rijsinichu ningui. Chashnatajmi canga– nirca.
31Ashtahuanpish Pedroca:
–Canhuan huañuna cajpipish, ñucaca manataj chashna nishachu– nijpica, caishuj yachacujcunapish tucuicunami chashnallataj nircacuna.
Jesusca Getsemanipi Taita Diosta mañashcami
(Mt 26.36-46; Lc 22.39-46)
32Chai q'uipami Jesusca paipaj yachacujcunandij Getsemaní shuti huertaman chayashpaca:
–Taita Diosta ñuca mañangacama, cancunaca caillapi tiyacuichij– nirca. 33Chaimantaca Pedrota, Jacobota, Juantapish pushashpa ricushpaca, Jesusca yallitajmi llaquiri callarirca. 34Chaipica:
–Ñuca almaca llaquihuan huañucunmari. Cancunaca caipi saquirishpa ama dormishpa yuyaihuan caichij– nircami.
35Jesusca chaimanta ashallata rishpaca, pambacama cumurishpami, ima shinamanta llaquita mana apana cajpica, chai llaquita apanata jarcachun nishpami, Taita Diosta cashna nishpa mañarca: 36“¡Yayitu! Cambajca tucui imapish jahuallami. Ima shinamanta jayajta ubyanata ñucamanta anchuchina cajpica anchuchipai. Ñuca chashna nijpipish ama ñuca munashca shinaca rurapaichu, ashtahuanpish can munashca shina rurapai” nircami.
37Jesús tigramushpaca dormicujta japishpami, Pedrotaca:
–Simón, ¿dormicunguillachu? ¿Manachu shuj horallatapish mana dormishpa chapai tucungui? 38Llaquicunapi ama urmangapaj chaparaichij, mañaraichij. Espirituca mañanata yuyanmi, ashtahuanpish aichaca shaicushcami– nirca.
39Cutin rishpaca, ñaupaman shinallatajmi Taita Diosta mañarca. 40Cutin tigramushpapish dormicujtami japirca. Paicunapaj ñahuicunaca, yallitaj dorminaihuan cashcamantami, imata mana cutichi tucurcacuna. 41Caihuanca quimsa cutin tigramushpaca, cashnami nirca:
–¡Cancunaca ashtahuan dormishpa samaricunguichijllachu imamí! ¡Ña chailla dormichij! Riquichij, Runa Aichayujta juchayujcunapaj maquipi entreganaca ñami pajtashca.
42¡Jatarichij, jacuchij! Riquichigari ñucata huañuchichun entregajca, ñami c'uchuyamucun– nircami.
Jesusta prezu japishcami
(Mt 26.47-56; Lc 22.47-53; Jn 18.2-11)
43Jesús chashna rimacujpirajmi, chunga ishquipuramanta caj Judasca ña chayamurca. Paihuanca achca runacunami espadacunahuan, caspicunahuan shamurcacuna. Chaicunaca curacunata mandajcuna, mandashcacunata quillcajcuna, cunaj yuyajcunapish cachashcacunami carca. 44Jesusta japichij Judasca: “Maijantami muchani, chaimi canga. Paita japishpaca, alli huatashpa pushanguichij” nishpami yachachishca carca. 45Ña chayamushpa, Jesuspajman c'uchuyashpaca:
–¡Yachachij, Yachachij!– nishpami mucharca. 46Judas chashna rurajpica, paicunaca huaicashpami japircacuna.
47Ashtahuanpish Jesushuan cajcunamanta shujca, espadata surcushcahuanmi, curacunata mandajpajta rurajtaca, rinrinta p'itirca. 48Chaipimi Jesusca paicunataca:
–¿Shuhuata shinachu espadacunahuan, caspicunahuan ñucataca japij shamunguichij? 49Ñucaca Taita Diospaj huasipica, punllantami yachachishpa cancunallahuantaj carcani. Chaipica mana japircanguichijchu. Ashtahuanpish Quillcachishcacunapi nishca shina pajtachunmi, cashnaca ruracunguichij– nircami.
50Yachacujcunaca tucuicunami Jesusta saquishpa miticushpa rircacuna.
Shuj moso miticushcami
51Jesusta pushacujpica shuj mosomi linsohuan pillurishca caticushca carca. Paitapish japircacunami. 52Paitapish japijpica, llushpirishpami pillurishca linsotapish shitashpa lluchulla miticushpa rirca.
Jesusca mandajcunapuralla tandanacushcapaj ñaupajpi cashcami
(Mt 26.57-68; Lc 22.54-55; Jn 18.12-14, 19-24)
53Curacunata mandajpajmanmi, Jesustaca pushamurcacuna. Chaipica curacunata tucui mandajcuna, cunaj yuyajcuna, mandashcacunata quillcajcunapishmi tandanacurcacuna. 54Jesusta pushajpica Pedroca, huasha huashalla catishpami curacunata mandajpaj huasi canllacama rishca carca. Chaipimi huasita cuidajcunahuan, ninapi cunushpa tiyacurca. 55Curacunata jatun mandajcuna, tucui mandajcunapuralla tandanacushcacunapish tandanacushpami, Jesusta huañunami cangui ningapaj Jesusmanta llullashpa huillachun mashcarcacuna. Ashtahuanpish ima juchachinata mana japircacunachu. 56Achcacunami Jesusmantaca, llullashpa huillarcacuna. Chashna huillashpapish shujtaj shujtajtami huillarcacuna. 57Cutin maijancuna shayarishpaca cashnami Jesusmantaca llullashpa huillarcacuna:
58–“Maquihuan rurashca Taita Diospaj huasitaca urmachishpami, quimsa punlla q'uipaca maquihuan mana rurashca shujtaj huasita shayachisha” nijtami ñucanchijca uyarcanchij– nircacunami.
59Ashtahuanpish chashna huillashpapish shuj shinallaca manataj huillarcacunachu. 60Chaimi curacunata mandajca, chaupipi shayarishcahuan Jesustaca:
–Canta caicuna juchachicujpipish ¿manachu imata cutichingui?– nishpa tapujpipish,
61Jesusca imata mana cutichishpa upalla carcallami. Chaimi curacunata mandajca:
–¿Canca tucuicuna alli nishca Taita Diospaj Churi, Cristochu cangui?– nishpa cutin tapujpi,
62Jesusca:
–Ari, ñucaca chaimi cani. Runa Aichayujtaca, tucuita rurai tucuj Taita Diospaj alli ladoman tiyacujtapish, jahua pachamanta p'uyupi shamucujtapishmi ricunguichij– nircami.
63Chaimi curacunata mandajca, yallitaj p'iñarishpa paipaj churanacunata lliquirishpa cashna nirca:
–Ña mana ashtahuan huillajcunata ninchijchu. 64Dios tucushpa mana manchashpa c'amijtaca, cancunallataj uyanguichijmi. Cunanca ¿imatataj yuyanguichij?– nijpimi, tucuicuna paica huañunatajmi can nircacuna.
65Chashna nishpaca maijancunaca ch'ucashpami, ñahuita linsohuan huatashpa huajtarcacuna. Chaimantaca: “¡Maijantaj huajtanchij huillaiyari!” nircacunami. Huasita cuidajcunapish ñahuipimi c'hajyachircacuna.
Pedroca Jesusta mana rijsinichu nishcami
(Mt 26.69-75; Lc 22.56-62; Jn 18.15-18, 25-27)
66Ucu huasi canllapi Pedro cajpimi, curacunata mandajpajta rurajcunamanta shuj servij huarmi shamurca. 67Chai huarmica Pedro cunucujta ricushpami:
–Canpish Nazaretmanta Jesushuanmi carcangui– nijpi,
68Pedroca:
–Paitaca mana rijsinichu. Can pimanta rimacushcatapish mana entendinichu– nirca. Chashna nishpa huasi canllaman yaicuna punguta llujshicujpica galloca cantarcallami.
69Chai servij huarmillataj cutin Pedrota ricushpaca, tucui chaipi cajcunamanca:
–Cai runapish, paicunapurallatajmari– ni callarijpimi,
70Pedroca cutinllataj, mana rijsinichu nirca. Chai asha q'uipaca chaipi cajcunaca cutinmi Pedrotaca:
–Canpish paicunapurallatajmi cangui. Galileamantatajmi cangui. Chaitajmari paicuna shinallataj rimangui– nircacuna.
71Chaimi Pedroca, ñuca llullajpica Taita Dios ñucata llaquichichun:
–¡Chai runataca mana rijsinichu. Pitachari nicunguichij!– nirca.
72Pedro chashna nincami, galloca cutin cantarca. Chaimi Pedroca: “Gallo manaraj ishqui cutin cantajpimi, ñucataca quimsa cutin mana rijsinichu ningui” nishpa, Jesús nishcata yuyarishpa huacarca.
Currently Selected:
MARCOS 14: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.