Malakae 3
3
1Nighe, mi ji ikọn mẹ rọ ra rhuẹrẹ idjerhe hẹrhẹ ovwẹ, Ọrovwohwo rẹ ovwan guọnọ na cha rhe uwevwi rọye kpregede; ọyinkọ rẹ ọphọ na rọ vwerhe ovwan oma na, nighe, ọ rọ cha, eriyin Ọrovwohwo rẹ otuofovwi na tare. 2Ẹkẹvuọvo kono che se yivwi hẹrhẹ ẹcha rọye na, ono ri se mudia vwẹ ọke rọ da rhe?
Kidie ọ họhẹ erhanre rẹ ogu kugbe odja rẹ a vwọ fọnrhọ emwa; 3o che tidia kerẹ odjogun rọ hworhẹ idọnọ, kọ cha hworhẹ emeshare ri Lẹvi fuanfon yoyovwi kerẹ idọnọ vẹ oro, bẹsiẹ rẹ ayen cha vwọ vwẹ omamọ rẹ ẹkpẹvwẹ ro fori kẹ Ọrovwohwo na. 4Kẹsiẹye ẹkpẹvwẹ ri Juda vẹ ọ ri Jerusalẹm ke vwerhe Ọrovwohwo na kirobo rọ dia vwẹ ọke rẹ awanre vẹ ọke rẹ ẹsosuọ.
5Ki mi che si kẹre owẹ vwẹ orhiebro; ke me cha dia oseri rẹ okpakpa kpahe ebuepha na, kugbe igberadja na, kugbe otu ri duvwu iyori rẹ ogbarogba na, vẹ otu re ghwa otu re durhie iruo ria na, vẹ otu ri kpokpo eme-phrorivwi vẹ eyauku, otu ri gerẹ erhorha phihọ akakọ, ri jẹ oshọ mẹ ẹdjẹ na; eriyin Ọrovwohwo rẹ otuofovwi na tare.
Ẹhwa rẹ Ẹkẹ Ihwe
6Kidie mẹvwẹ rẹ Ọrovwohwo na rhẹriẹ-ẹ; fiki rẹ ọtiọye na E emọ ri Jekọp, ọye e vwo jẹ ovwan eghwọrọ na. 7Rhanvwe ọke rẹ esẹ rẹ ovwan rhe ọye ovwan vwo ku erhọn fia kẹ irhi mẹ rẹ ovwan vwo jẹ ayen ẹyọnrọn. Rhivwi bru vwe rhe, rere mi rhivwi bru ovwan rhe, enẹ Ọrovwohwo rẹ otuofovwi na tare. Ẹkẹvuọvo ovwan ra ta nẹ, Komavọ mi rhivwi vwo? 8Ohwo rẹ akpọ na se cho Ọghẹnẹ? Yẹ ovwan re cho vwe. Ẹkẹvuọvo ovwan tare nẹ, idjerhe rhọ me vwo cho we? Vwẹ ẹkẹ ihwe wẹn vẹ ẹkpẹvwẹ wẹn. 9E duvwu ovwan iyori nure, kidie we ro cho vwe; ovwan ẹgborho na ejobi. 10Wa gba ghwa ẹkẹ ihwe na ejobi rhe erhu mẹ, rere emuọre vọn uwevwi mẹ, rere wa davwe ovwẹ ni, eriyin Ọrovwohwo rẹ otuofovwi na tare; si mi gbi che rhie evakpo rẹ odjuvwu na phihọ kẹ wẹ ri mi de ku oburhuhu rẹ ebruphihọ mẹ kẹ ovwa-an. 11Ke me cha ghwọ ku ife vẹ eghwọghwọ re ghwọrọ emu ejobi fiki wẹ re ayen vwo je unu edje te obo rẹ ovwan kọnre ejobi, udju ri vain wẹn kọ mọ ọ gbe fa-a, eriyin Ọrovwohwo rẹ otuofovwi na tare. 12Egborho na ejobi ki che se we ebruphihọ, kidie ku wọ cha dia otọ rẹ omavwerhovwẹ, eriyin Ọrovwohwo rẹ otuofovwi na tare.
Ofẹnẹ rọ Hẹ Uvwre rẹ Ọvwata vẹ Oruimwemwu
13Wọ ta eta rẹ arueywwo kpahe ovwẹ gangan, eriyin Ọrovwohwo tare. Dede na yu wọ tanẹ, Mavọ me ta eta rẹ arueyivwo kpahe owẹ? 14Wọ tare nẹ, Ọghẹnẹ ẹgọ fi emuọvo-o. Didi erere ri te ohwo rọ yọnrọn iji rọye eyẹ re vwo muomaphihọ yan vwẹ obaro rẹ Ọrovwohwo rẹ otuofovwi na? 15Avwanre rhe mrẹ vughe nẹ otu ri jẹ erhọn ẹdavwọ na ri me vwo ebruphihọ; ọ dia erhuvwu ọvo iruimwemwu mrẹ-ẹ ọke rẹ ayen da davwẹ Ọghẹnẹ ni dede ayen me djẹ vabọ.
16Etiyin ayen otu re djẹ oshọ rẹ Ọrovwohwo na kẹ ta kẹ ohwohwo, Ọrovwohwo na da kerhọn o de nyo ayen, o de si ọbe rẹ ekarophihọ vwẹ obaro rọye kpahe ayen ihwo re djẹ ọshọ rẹ Ọrovwohwo na ri roro iroro rẹ odẹ rọye na. 17Ayen cha dia ọmẹ, eriyin Ọrovwohwo rẹ otuofovwi na tare, ayen ke cha dia oghere rẹ ihwo kẹ vwẹ vwẹ ẹdẹ ri mi de che ru obo re me ta na, ke me cha vwẹ obọ pẹpẹ kirobọ rẹ ohwo da vwẹ obọ pẹpẹ ọmọ rọ ga. 18Ọke yena re kẹ ovwan che vughe ofẹnẹ rọ hẹ ohri rẹ ọvwata vẹ oruimwemwu, vwẹ uvwre rẹ ohwo rọ ga Ọghẹnẹ vẹ ọ ro jẹ ẹga.
Currently Selected:
Malakae 3: UBV77
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.