Malakae 2
2
1Asakiephana, E irherẹn na, ovwan e ji urhi nana kẹ. 2Wa gbe rha kerhọ-ọn, wa gbe vwẹ udu roro-o re wa da vwẹ urinrin kẹ odẹ mẹ-ẹ, eriyin Ọrovwohwo rẹ otuofovwi na tare, ke me cha harhe ovwan ekan ki mi che duvwu iyori phihọ ebruphihọ rẹ ovwan, uyota me tobọ harhe ovwan nure, kidie wa vwẹ udu rẹ ovwan roro-o. 3Nighe, me cha ghwọ ku uvwiẹ wẹn, me cha vwẹ isọn ghworo uwe opharo; isọn rẹ ẹkpẹvwẹ wẹn na, ke me djẹ wẹ nu obaro mẹ. 4Kọye wọ cha vwọ riẹn nẹ mi jẹ urhi nana kẹ wẹ, rere ọphọ re me vẹ Lẹvi rere vwọ sẹ, enẹ Ọrovwohwo rẹ otuofovwi na tare. 5Ọphọ re me vẹ ọye gba re na ọphọ rẹ arhọ vẹ ufuoma, me da vwẹ ayen kẹ, rere oshọ vwo muo; ọ da ghine djẹ oshọ mẹ, udidi mẹ de muo. 6Uyono rẹ uyota da hẹ unu rọye, a mrẹ efian vwẹ unu rọye-e. O nabọ yan nene uvwe vwẹ ọsoso vẹ ufuoma, o de si ihwo buebu nẹ orukuruku rayen. 7Kidie ẹbẹrunu rẹ orherẹn ọye re sẹro rẹ erianriẹn, ihwo ke guọnọ uyono nẹ unu rọye cha, kidie ọyinkọ rẹ Ọrovwohwo rẹ otuofovwi na o ruẹ. 8Ẹkẹvuọvo wo kurhẹriẹ nẹ idjerhe na; wọ da nẹrhẹ ihwo buebu she fiki rẹ uyono wẹn; we gbe ọphọ ri Livae ku, eriyin Ọrovwohwo rẹ otuofovwi tare, 9kọye mi de ru we kueku, me da vwẹ owẹ gbe otọ kẹ ihwo buebu mrẹ, fikiridie wọ nene idjerhe mẹ-ẹ ẹkẹvuọvo abọ ọvo kọye uyono wẹ nuẹ nene.
A Ghwọku Ijesegbuyota rẹ Izrẹl
10O dia ọsẹ ọvo avwanre na ejobi vwori? Ọ dia Ọghẹnẹ ọvo na ma avwanre? Kidie sorọ rẹ avwanre vwọ jẹ ohwohwo eseghuyota, rẹ avwanre vwo miovwo ọphọ rẹ esẹ rẹ avwanre? 11Juda vwo esegbuyota-a, e gbe ẹgua rode na vwẹ Izrẹl vi Jerusalẹm, kidie Juda gbe ẹshẹ rẹ Ọrovwohwo na ẹgua, rọ guọnọre na, ọ da ra rọvwọ ọmọtẹ rẹ ọghẹnẹ ọfa. 12E jẹn Ọrovwohwo rhe nyavwe utughẹ ri Jekọp kufia, fiki rẹ ohwo ro ru emu nana, ono ri se oseri eyẹ kono re kpahe ota, eyẹ kono re vwẹ ẹkpẹvwẹ rhe Ọrovwohwo rẹ otuofovwi na!
13Ọna kọye wọ rhọma ru. Wọ da ra viẹ ku enu rẹ agbada rẹ Ọrovwohwo na, vẹ oma ebere kugbe enuebro fikiridie ọ gbe vwẹ evun esiri reyọ ẹkpẹvwẹ rẹ ovwa-an. 14Wọ da nọ nẹ, Die sorọ o vwo jẹ reyọ? fikiridie Ọrovwohwo na oseri rẹ ọphọ re wọ vẹ aye wẹn rẹ ọke-emọ rere, aye yena wo gbe ọfanrhiẹ rhurhu dede na ọye otu wẹn kugbe aye rẹ ọphọ wẹn. 15Ọ dia Ọghẹnẹ ọvuọvo na rọ ma avwanre na ọye je vwẹ erhi rẹ arhọ na yọnrọn avwanre na? Kidie ọ guọnọre? Omamọ ẹkpẹvwẹ rẹ uyota. Gba kẹnẹ oma wẹn, rere ohwo kohwo vwo jẹ ọfanrhiẹn e gbe rhurhu aye rẹ ọke-emọ rọye. 16Kidie aye re siobọ nẹ na tu vwe oma eriyin Ọrovwohwọ Ọghẹnẹ re Izrẹl tare, re vwẹ ozighi e gbe chobiẹ amwa, eriyin Ọrovwohwo rẹ otuofovwi na tare. Vwẹ ọtiọye na gba kẹnẹ oma wẹn wo gbi gbe ọfanrhiẹ-ẹ.
Iroro Kpahe Ẹdẹ rẹ Ẹdjọeguo re Siẹkẹrẹ
17Wọ vwẹ eta wẹn ghwọrọ Ọrovwohwo oma. Yo wọ tanẹ, Mavọ avwanre vwọ ghwọrọ owẹ oma? Wọ vwọ tanẹ, kohwo kohwo ro ru umwemwu vwẹ obaro rẹ Ọrovwohwo yẹ oyoyovwi o ruru, oma rọye kọ vwerhọ. Eyẹ kọ nọ nẹ, Tivọ Ọghẹnẹ rẹ uyota na epha?
Currently Selected:
Malakae 2: UBV77
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.