Malakae 4
4
Echa rẹ Ẹdẹ rẹ Ọrovwohwo na
1Gbe nighe, ẹdẹ cha, ọ tuabọ kerẹ enyerhanre, ọke yena ihwo ri herẹ vẹ i ri ruẹ umwemwu ejobi ke cha dia kerẹ ehẹbẹ; ẹdẹ ro cha na kọ cha torhẹ ayen ejobi, eriyin Ọrovwohwo rẹ otuofovwi na tare, ọtiọye na o gbi che jẹ o vwo owọ eyẹrẹ eghọ-ọn. 2Ẹkẹvuọvo vwọ kẹ ovwan re djẹ oshọ mẹ na uvo rẹ ọvwata cha bẹrẹ mu ayen, ọ vẹ esivwo vwẹ ibekpe rọye. Ku we che pho kerẹ upene rẹ erhuẹn ro nẹ urhuẹn rọye cha. 3Ku wo che chiyi iruimwemwu na muotọ, kẹ ayen cha dia kerẹ iwurhie vwẹ obotọ rẹ ẹhẹrhowọ wẹn, vwẹ ẹdẹ ri mi che vwo ru ọnana, ọtiọye Ọrovwohwo rẹ otuofovwi na tare.
4Karophihọ urhi ri Mosis odibo mẹ na, irhi kugbe iji ri mi ji kẹ vwẹ ugbenu ri Horẹb vwọ kẹ ihwo rẹ Izrẹl ejobi. 5Nighere, mi che ji Elaija rẹ ọmraro na bru ovwan rhe tavwe rẹ ẹdẹ ro muoshọ rẹ Ọrovwohwo na ki rhi te. 6Kọ cha rhẹriẹ udu rẹ esẹ na bru emọ rayen ọ me rha rhẹriẹ udu rẹ emọ na bru esẹ rayen, ọ rha dia ọtiọye-e me da rhe vwẹ obọ ke me cha vwẹ ekan guọghọ otọ na.
Currently Selected:
Malakae 4: UBV77
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.