Malakae 1
1
Ẹguọnọ rẹ Ọrovwohwo vwo Kẹ Jekọp
1Ena eta rẹ epha rẹ Ọrovwohwo rẹ Malakae bọ kẹ Izrẹl.
2Mẹvwẹ re guọnọ owe, eriyin Ọrovwohwo tare. Ẹkẹvuọvo wọ tare nẹ, Mavọ wọ guọnọ avwanre te? Isọ dia oniọvo ri Jekọp? eriyin Ọrovwohwo tare. Dede na ye me guọnọ Jekọp, 3ẹkẹvuọvo Isọ tu vwe oma; me guọghọ orho rọye rọ obo ugbenu na mi de jẹ uku rọye vwo vwọ kẹ erha rẹr aton. 4Idọm da ta nẹ, a guọghọ avwanre ẹkẹvuọvo avwanre cha bọn ẹdia rọ guọghọre na ejobi, Ọrovwohwo rẹ otuofovwi na tare nẹ, Ayen che ghine bọn, ẹkẹvuọvo mi che kporo kuotọ, bẹsiẹ rẹ ihwo vwo mu odẹ kẹ ayen nẹ orho rẹ iruimwemwu, ihwo rẹ Ọrovwohwo mu kpahe bẹdẹ. 5Ẹro wẹn cha mrẹ ọnana, wọ me rhe ta nẹ, Ọrovwohwo na ghine rhọ vrẹ ughwru rẹ Izrẹl.
Ọrovwohwo Ghwoku Irherẹn na
6Ọmọ mu ọghọ kẹ ọse rọye, odibo mi rhe mu ọghọ kẹ onini rọye. Me da dia ọsẹ, kẹ ọghọ mẹ rhọ? Me da rha dia onini, kẹ oshọẹdjẹ mẹ rhọ? eriyin Ọrovwohwo rẹ ọgba rẹ ofovwi na ta kẹ wẹ, E irherẹn, re jẹ odẹ mẹ fia na? Wọ rọ ta nẹ, idjerhe vọ ma vwọ jẹ odẹ wẹn fia? 7Wa vwẹ emu rẹ ẹgua ze izobo vwẹ enu rẹ agbada mẹ. Yẹ ovwan ta nẹ, idjerhe vọ me vwo gbe ẹgua? Yi we roro nẹ a cha vwẹ imẹjẹ rẹ Ọrovwohwo na je ọdẹ. 8Ọke rẹ ovwan da vwẹ eranvwe ro rhuẹro vwo ze izobo ye, ọye na rha dia oruchọ-ọ? kẹ ovwan da rha vwẹ eranvwe rọ mwa ọga, eyẹ ọro bru obọ eyẹ asan ọfa vwọ ze izobo, ọye na rha je dia ogbeku-u? Gba vwẹ emu ọtiọye na ru ẹse kẹ osun rẹ ovwan, kọ ghọghọ nẹ wo ru ẹse kẹ ọye, gbenẹ kẹ o yere ovwan? eriyin Ọrovwohwo tare. 9Asakiephana gba guọnọ aroesiri rẹ Ọghẹnẹ, rere o ni arodọvwẹ rẹ avwanre. Wa da vwẹ emu ọtiọye na yọnrọn obọ rhe ko ni arodọvwẹ rẹ ovwan we roro? eriyin Ọrovwohwo rẹ otuofovwi na tare. 10E mani kẹ a sa mrẹ ohwo ọvo vwẹ ohri rẹ ovwan na rọ kanre echẹ na, rere we vwo jẹ erhanre rẹ ogbarogba ekoko phihọ agbada mẹ na. Ivun re ovwan gbe vwerhovwẹ-ẹ, eriyin Ọrovwohwo rẹ otuofovwi na tare, me cha reyọ ẹkpẹvwẹ rẹ ovwan na-a. 11Kidie nẹ evacha rẹ ọnre re te eshe kpotọ rọye odẹ mẹ re cha rho vwẹ ohri rẹ ẹgborho na ejobi, vwi kasan kasan ejobi ọye a da torhẹ insẹns kẹ odẹ mẹ, kugbe omamọ rẹ ẹkpẹvwẹ rọ fonrọ; kidie odẹ mẹ ọrhuarho vwẹ ohri rẹ ẹgborho na, eriyin Ọrovwohwo rẹ otuofovwi na tare. 12Ẹkẹvuọvo wo miovwiro siẹ ro wọ da ta nẹ imẹjẹ rẹ Ọrovwohwo na e gbereku kugbe emu re mu kpahọ na ejobi a jẹ ayen fia. 13Ọna kẹ ukpokpoma, eriyin ovwan ta na? We mi mua inwe phihọ ovwẹ, eriyin Ọrovwohwo rẹ otuofovwi na tare. Wo mu eranvwe rẹ ugborho rhe vwe, eyẹ ọ ro kpono eyẹ ọ rọ mwa ọga, kọna we vwo rhe vwe nẹ ẹkpẹvwẹ! Me gba reyọ ọyena mie we? eriyin Ọrovwohwo tare. 14Ekan kẹ ohwo rọ ghwa ihwo ria ro vwo egbo vwẹ ohri rẹ igode rọye, rọ nabọ ve ive nu, ọ da ra reyọ eranvwe ro vwo ẹgua vwo ze izobo kẹ Ọrovwohwo na; kidie mẹvwẹ Ovie rode, eriyin Ọrovwohwo rẹ otuofovwi na tare, ihwo rẹ akpọ na ejobi djẹ oshọ kẹ odẹ mẹ.
Currently Selected:
Malakae 1: UBV77
Highlight
Share
Copy
Want to have your highlights saved across all your devices? Sign up or sign in
Bible in Urhobo © United Bible Societies, 1977.