ROMANOS 15
15
Manarac sinchi criccunata ayudanamanta
1Ñucanchic sinchi criccunaca manarac sinchi criccuna pandaricpipish ayudanami canchic. Mana quiquinlla alli canata munanachu. 2Tucuimi shuctac criccuna crishpa catichun, paicunapac allipac ruhuana canchic. 3Cristopish mana quiquinlla alli canata munarcachu, ashtahuanpish Dios quillcachishcapica: «Canta camishpa rimashpaca, ñucatami riman» nishcami. 4Ñaupa quillcashcacunaca ñucanchicta yachachingapacmi quillcashca. Chai quillcashcami cushicushpa, mana piñarishpa shuyanata yachachin. 5Mana piñaric, ashtahuanpish cushichic Dios, Jesucristo causashca shina, shuc yuyailla causanata yachachichun. 6Tucui mashna shuc yuyailla, ñucanchic Apunchic Jesucristopac Diosta alli nichunmi munani.
Alli huillaica mana israelcunamanpish cashcamanta
7Cristo ñucanchicta Dios alli nishca cachun chasquishca shina, cancunapish caishuc chaishucta chasquichic. 8Cristoca, Dios ñaupa taitacunaman cusha nishcata pactachic cashcata ricuchingapacmi israelcunata servingapac shamurca. 9Cristoca Dios quillcachishcapi nishca shina, mana israelcunatapish Diosta alli nichunmi shamurca. Dios quillcachishcapica:
«Chaimantami tucui
llactacunapi canta pagui nisha.
Cambac shutitapish
cantashami» ninmi.
10Cutinllatac Dios quillcachishcapica:
«Tucui llactacuna,
¡Dios acllashcacunahuan cushicuichic!» ninmi.
11Cutinllatac Dios quillcachishcapica:
«Tucui llactacuna
Mandac Diosta alli nichic.
Tucui aillucuna,
Diosta jatunyachichic» ninmi.
12Cutinllatac Dios ima nishcata huillac Isaiasca:
«Isaipac huahua huahuapuramantami
llactacunata mandangapac jatarimunga.
Chaimantami paita
cushicushpa shuyacuncuna» ninmi.
13Diospac Espíritu crishpa, shuyana yuyaita yallita charichun, Diosllatac cushichishpa, crishpa cushi causaita cuchun. Diosca shuyana yuyaita cucmi.
Apóstol Pablo imata ruhuashcamanta
14Cuyashca criccuna, cancuna yallita cuyac cashcatapish, alli yachac cashcatapish, caishuc chaishucta cunac cashcatapish yachani. 15Shina cacpipish, cancuna ama cungarichunmi maijan rimaicunata sinchita rimashpa quillcani. Dios cuyashcamantami, 16mana israelcunapac allipac Jesucristota servichun acllarca. Chaimantami cashna quillcani. Chaica, mana israelcunata Diospac Espíritu Diospacllata ruhuachun, paicuna mishquilla ashnacuc ofrenda shina cachunmi quishpirinamanta alli huillaita huillashpa Diosta servicuni.
17Jesucristota crishcamanta Diosta servishpaca, yallitami cushicuni. 18Chaica, mana israelcuna Diosta cazuchun, Cristo ñucata imata ruhuashcallatami rimasha nini. Chaitaca mana rimarcanillachu, ashtahuanpish ruhuarcanimi. 19Chashnami poderyuc Diospac Espirituhuan mancharinacunatapish, milagrocunatapish ruhuashpa, Jerusalén pueblomantaca Iliria llactacaman maipipish Cristomanta alli huillaita huillarcani. 20Cristomanta pi mana huillashca llactacunapi huillanatami ashtahuan munarcani. Shuccuna Cristomanta huillashpa, criccunata callarichishca jahuapi callarichinataca mana munarcanichu. 21Chaipac randica, Dios quillcachishcapi:
«Jaicapi paimanta mana
uyaccunaracmi paita ricungacuna.
Paimanta jaicapi mana
uyaccunami entendingacuna»
nishca shinami ruhuarcani.
Roma puebloman Pablo rinata yuyarishcamanta
22Tauca cutin ricungapac risha nishpapish, mana ri pudishcanichu. 23Cunanca, cai llactacunapi imata ruhuana mana tiyacpimi, tauca huatacunata ricungapac rina munaita charishcamanta, 24España llactaman rishpaca, ima shinapish cancunata ricuna yuyailla cani. Cancunata asha punzhacunata compañashca quipa, ñuca ricushcaman chayangapac ayudachunmi munani. 25Cunanca Jerusalén pueblopi causac criccunata ayudangapacmi rigrini. 26Acaya llacta, Macedonia llacta criccunami cushilla ofrendata tandashpa, Jerusalén huaccha criccunata ayudachun cacharca. 27Chai shina, paicunapac munaimanta ruhuashpaca, allitami ruhuashcacuna. Mana israelcunapish cric israelcunamanta Dios cushcata chasquishpaca, paicunatapish ayudanami can. 28Ñuca imata ruhuasha nishcata tucuchishpa, ofrendatapish cushpaca, España llactaman rishallami. 29Cancunapacman rishpa, Cristopac alli huillaimanta (achca bendicionhuan) chayanatami yachani.
30Cuyashca criccuna, Apunchic Jesucristomanta, Diospac Espiritupac cuyaimantami ñucamanta Diosta mañachun mañani. 31Judea llactapi causac mana criccunamanta Dios huacaichichun, Jerusalén criccuna ñuca apashca ofrendata alli chasquichun Diosta mañaichic. 32Chashna ruhuacpimi, Dios munacpica, cancunapacman alli chayashpa, cushilla samarisha. 33Cushi causaita cuc Dios tucui cancunahuan cachun. Chashna cachun.
Currently Selected:
ROMANOS 15: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.