ROMANOS 14
14
Shuccunata mana juchanchina cashcamanta
1Manarac sinchi criccunata chasquishpaca, ama caita chaita ninguichicchu. 2Maijancunaca: “Imatapish micunallami” nincunami. Manarac sinchi criccunaca: “Llullu micunallatami micuna” nishpami yuyancuna. 3Chaimanta tucuita micucca, mana tucuita micucta piñanachu, mana tucuita micucpish mana tucuita micucta piñanachu. Chaica, Diosca tucuitami chasquishca. 4Shucpac serviccunata juchanchingapacca, ¿pitac canca cangui? Amomi servic alli cashcata, mana alli cashcata ninga. Poderyuc Apunchic Jesusmi imatapish allita ruhuachun sinchiyachinga.
5Maijan criccunaca: “Shuc punzhami caishuc punzhamanta ashtahuan alli” nincunami. Cutin maijan criccunaca: “Tucui punzhacunami chai shinallatac” nincunami. Tucuimi quiquin imata yuyashcataca alli cashcata yuyana can. 6Maijanpish shuc punzhata chicanyachishpaca, Apunchic Jesusta alli ningapacmi chicanyachin. Shinallatac tucuita micucpish, Apunchic Jesusta alli ningapacmi Diosta pagui nishpa micun. Mana tucuita micucpish, Apunchic Jesusta alli ningapacmi Diosta pagui nishpa, mana chashna micun.
7Maijanpish mana quiquinpacllachu causanchic. Huañushpapish, mana quiquinpacllachu huañunchic. 8Chaimanta causashpapish, Apunchic Jesuspacmi causanchic. Huañushpapish, Apunchic Jesuspacmi huañushun. Shinaca causashpapish, huañushpapish Apunchic Jesuspacmi canchic. 9Chaipacmi Apunchic Jesusca huañurca, shinallatac causarirca. Chashnami tucuipac Mandac cangapac causarirca.
10Shina cacpica, ¿ima nishpatac shuctac cricta juchanchingui? ¿Ima nishpatac caishuc cricta mana valichingui? Tucuimi Diospac ñaupapi taripashca cangapac ricurishun. Paimi allitapish, mana allitapish ninga. 11Dios quillcachishcapica:
«Mandac Diosca:
“Tucuimi ñucapac ñaupapi
cunguringacuna.
Tucui rimaipimi ñucataca
‘canca Diosmi cangui’
ningacuna” nin» ninmi.
12Chaimanta tucui ñucanchicmi imata ruhuashcacunata Diosman ricuchigrina canchic.
Shuctac criccunata mana pandachinamanta
13Chaimanta ñucanchicca mana shuctac cricta juchanchinachu canchic. Chaipac randica, ama pandarichunmi, ima millaita mana ruhuanata yuyana canguichic. 14Mana imapish paillatac mapaca tiyanchu. Apunchic Jesusmantami chashna nini. Ashtahuanpish maijan mapa cashcata yuyacpica, paimanmi mapa can. 15Can imatapish micushpa, shuctac criccunata llaquichishpaca, mana cuyac cashcatami ricuchingui. Can micushcallamanta pacta shuctac criccuna chingarinman. Paicunamantapishmi Cristoca huañurca. 16Pacta cancunaman allita causacushpaca, shuccunaman mana allita ruhuacunguichicman. 17Dios mandashca causanaca mana ubianata, micunata yuyashpalla causanachu, ashtahuanpish Diospac Espíritu ayudacpi, cashcata ruhuashpa, cushilla causanami. 18Chai shina Cristota servishpami, Diosta cushichishpa, runacunapacpish alli nishca causan.
19Chaimanta shuctac criccunahuan cushilla causashpa, Jesusta criccunata sinchiyachishunchic. 20Dios imata ruhuasha nicushcataca ama micushcallamanta yangapi churaichu. Tucui micuimi micunalla, ashtahuanpish micushpa shuctac criccunata juchapi urmachinami mana alli. 21Shuctac criccunata pandachinapac randica, aichatapish mana micuna, vinotapish mana ubiana, ima shuctaccunatapish mana ruhuanami ashtahuan alli. 22Can imata crishcataca canllatacmi Diospac ñaupapi charina cangui. Maijanpish paipac yuyaipi mana juchanchishca cashcamanta alli yuyacmanca, ¡mai cushicuimi! 23Ashtahuanpish “¿cai micunaca allichu, mana allichu?” nishpa micucca juchallinmi. Pai crishca shina mana micushpaca juchayucmi tucun.
Currently Selected:
ROMANOS 14: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.