ROMANOS 16
16
Pablo paipac ricsishcacunata saludashcamanta
1Cencrea pueblo tandanacushca criccunata ayudac, ñucanchic pani Febe huarmita alli chasquichunmi mañani. 2Paica ñucatapish, shuccunatapish ayudacmi carca. Chaimanta criccunapura ima shina chasquic shina, Apunchic Jesuspac shutipi chasquishpa, pai ima minishtishcata cushpa ayudanguichic.
3Ñucahuan pacta Apunchic Jesusta servic Priscila huarmitapish, paipac cusa Aquilatapish saludanguichic. 4Paicunaca huañunata mana manchashpami, ñucata ayudarca. Chaimantami pagui nini, ashtahuanpish caishuc cric mana israelcunapish pagui nincunami. 5Shinallatac paicunapac huasipi tandanacuc criccunatapish saludanguichic. Ñucahuan mai apanacuc Epenetotapish saludanguichic. Paimi Asia llactapica Jesucristota punta cric carca. 6Cancunata yallita ayudac Mariatapish saludanguichic. 7Ñuca llacta Andronicotapish, Junias huarmitapish saludanguichic. Paicunami ñucahuan carcelpi carcacuna. Paicunaca Apostolcunapurapi alli nishcacunami, ñucapac ñaupa criccunami.
8Jesusmanta yallita ñucahuan apanacuc Ampliastapish saludanguichic. 9Jesucristota servinata ayudac Urbanotapish, ñucahuan yalli apanacuc Estaquistapish saludanguichic. 10Cristota sinchita catic Apelestapish saludanguichic. Aristobulotapish, paipac familiacunatapish saludanguichic. 11Ñuca llactamanta Herodiontapish, Apunchic Jesusta cric Narcisotapish, paipac familiacunatapish saludanguichic. 12Apunchic Jesusta servic Trifenatapish, Trifosatapish saludanguichic. Ñucahuan yallita apanacuc Persidetapish saludanguichic. Paica yallitami Apunchic Jesusta servishpa trabajarca. 13Apunchic Jesusta yallita servic Rufotapish, paipac mamatapish saludanguichic. Paipac mamaca ñucapac quiquin mama shinami cashca.
14Asincritotapish, Flegontetapish, Hermestapish, Patrobastapish, Hermastapish, paicunahuan cac criccunatapish saludanguichic. 15Filologotapish, Juliatapish, Olimpastapish, Nereotapish paipac panitapish, paicunahuan cac criccunatapish saludanguichic.
16Chuya shunguhuan muchashpa, caishuc chaishuc saludanacuichic. Cristota cric tucui tandanacushca criccunapish saludachun nishpami cachan.
17Cuyashca criccuna, cancuna yachacushcamanta shuctaclayata yachachishpa chicanyachiccunamanta cuidaringuichic ninimi. Chashna yachachishpa pandachiccunamanta cuidaringuichic. 18Chai shina yachachic runacunaca paicunapac munaillata ruhuashpami, Apunchic Jesustaca mana servincuna. Paicunaca mishquilla, uyanalla rimaicunata rimashpami, manarac alli yachac gentecunata pandachincuna. 19Cancuna Diosta cazuccuna cashcataca tucuimi yachancuna. Chaimantami yallita cushicuni. Allita ruhuangapacca, alli yachaccuna, millaita ruhuangapacca mana yachaccuna cachunmi munani. 20Chashnami cushi causaita cuc Diosca Satanasta mishashpa, cancunapac chaqui sarunapi ñalla churanga. Ñucanchic Apunchic Jesuspac cuyai tucui cancunahuan cachun.
21Ñucata ayudac Timoteopish, ñuca llactamanta Luciopish, Jasonpish, Sosipaterpish saludancunami.
22Pablo rimashcata quillcac Terciopish, Apunchic Jesuspac shutipimi saludani.
23Shinallatac ñucatapish, tandanacushca criccunatapish pozachic Gayopish saludanmi. Cai pueblopac cullquita japic Erastopish, Jesusmanta huauqui Cuartopish saludanmi. 24Ñucanchic Apunchic Jesucristo tucui cancunaman sumac cuyaita cushca cachun. Chashna cachun.
Tucuchingapac Diosta mañashcamanta
25Alli huillaita ñuca huillashca shina, Jesucristomanta yachachishca shina, cai pachata manarac ruhuashca punzhamanta pacha pacashcata ricuchishca shina, alli caticta ruhuangami. ¡Chaimanta Diosta alli nishunchic! 26Huiñaita causac Dios mandashca shinami, cunanca chai pacashcataca Dios ima nishcata huillaccuna quillcashca shina ricuchin. Cai pacashcatami tucui cai pachapi causaccuna crishpa cazuchun ricuchishca.
27¡Tucuita yachac, shuclla Dios Jesucristomanta huiñai huiñaita sumacyachishca cachun! Chashna cachun.
Currently Selected:
ROMANOS 16: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.