ECLESIASTÉS 3
3
Tucui ruhuaipac punzha tiyashcamanta
1Cai pachapica tucui ruhuaipacmi punzha tiyan. Tucui ruhuaicunami quiquin horasta charin.
2Huacharingapacpish, huañungapacpish
punzha tiyanmi.
Tarpungapacpish, chai tarpushcata
pilangapacpish punzha tiyanmi.
3Huañuchingapacpish, jambingapacpish
punzha tiyanmi.
Tuñingapacpish, pircangapacpish
punzha tiyanmi.
4Huacangapacpish, asingapacpish
punzha tiyanmi.
Duelo cangapacpish, bailangapacpish
punzha tiyanmi.
5Rumicunata shic-huangapacpish,
montonangapacpish
punzha tiyanmi.
Ucllangapacpish, mana ucllangapacpish
punzha tiyanmi.
6Mashcangapacpish, chingachingapacpish
punzha tiyanmi.
Huacaichingapacpish, shitangapacpish
punzha tiyanmi.
7Lliquingapacpish, sirangapacpish
punzha tiyanmi.
Upallangapacpish, rimaringapacpish
punzha tiyanmi.
8Cuyangapacpish, piñangapacpish
punzha tiyanmi.
Macanacungapacpish, alli tucungapacpish
punzha tiyanmi.
9Yallita shaicushpa trabajashcamantaca ¿imatatac japin? 10Diosca huañuclla runacunaman ima ruhuanacunata cushpaca, chaicunata ruhuashpa causachun cushcatami ricuni. 11Diosca tucui imatapish ruhuana punzhallapitacmi sumacta ruhuashca. Shinallatac cai pachapi causaccunapac shungupica huiñaita causachunmi churarca. Shina cacpipish, gentecunaca callarimanta tucuricaman Dios imata ruhuashcataca mana entendinchu.
12Ñucaca runa causashcacamanca cushicushpa, sumacta causana ashtahuan alli cashcatami ricuni. 13Shinallatac tucui runacuna imata ruhuashcamantaca micushpa, ubiashpa, cushicushpa causachun Dios cushcatami yachani. 14Tucuita Dios ruhuashcaca huiñaipac cashcatami yachani.
Pai ruhuashcacunataca imata mana yapachina,
imata mana anchuchinachu.
Diosca, gentecuna paipac ñaupapi
manchachunmi ruhuashca.
15Tucui imapish ñaupaman
tiyashcallatacmi tiyan.
Quipaman ima tiyana cashcapish
ña tiyashcallatacmi.
Diosca utcaman tiyashcatami cutichimucun.
Allita ruhuanapac randica mana allitaruhuashcacuna tiyashcamanta
16Shinallatac inti achicyachicuc cai pachapi,
allita ruhuanapac randica,
millaita ruhuac cashcatami ricuni.
Cashcata ruhuanapac randica,
mana allita ruhuac cashcatami ricuni.
17Chaimantami ñuca shungupica: «Tucui imata ruhuashcata ricungapacpish punzhaca tiyanmi. Cashcata ruhuactapish, paita mana manchactapish Diosmi taripanga» nircani.
18Chaimantami runacunamanta ñuca shungupica: «Paicunallatac animalcuna shina cashcata yuyarichunmi Diosca chashna ruhuashpa ricucun» nishpa yuyarcani. 19Chaica gentecunapish, animalcunapish chai shinallatacmi tucurincuna. Gentecunapish, animalcunapish huañunmi. Causaita cuc samaitapish tucuimi charin. Ima shina causashcapish yangallami. Chashna cashcamanta gentecunaca mana animalcunamanta yallichu.
20Tucuimi chai pushtullamantac rincuna.
Animalcunapish, gentecunapish
allpamantami ruhuashca.
Chaimantami allpallatac tucuncuna.
21¿Pitac gentecunapac alma jahua pachaman ric cashcata, animalcunapac samaica allpa ucuman ric cashcata yachanyari? 22Cai pachapi causaccuna huañushca quipa ima tucuna cashcataca pi mana huillai pudinchu. Chashna cashcamantaca quiquin trabajomanta alli cushicushpa causanami alli. Ñucanchicpac caipica chailla tiyashcatami ricuni.
Currently Selected:
ECLESIASTÉS 3: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.