ECLESIASTÉS 2
2
Cushicunaca yangalla cashcamanta
1Ñuca shungupica: «Cunanca allita causangapacca cushicushpa ricusha» nircani. Ashtahuanpish caicunapish yangallami carca. 2Chaimantami asictaca: «¡Locomi cangui!» nircani. Shinallatac cushicuctaca: «¿Caica imapactac servinyari?» nircani.
3Ñuca yuyaipi allita entendishpapish ñuca cuerpotaca vinota ubiashpami cushichisha nircani. Chashnami huañuclla runa causacuc tucui punzhacunapi paiman ima alli cashcata, imata ruhuana cashcata yachanata munarcani.
4Ñucaca jatun ruhuaicunatami ruhuachircani. Huasicunatapish shayachircani. Uvas chagracunatapish tarpurcani. 5Huertacunatapish, jardincunatapish ruhuarcani. Granota pucuc yuracunatapish tarpurcani. 6Huiñac yuracunata parcungapacpish yacu huacaichina tanquecunatami ruhuarcani. 7Servic caricunatapish, huarmicunatapish randircani. Ñuca huasipi huacharishca serviccunatapish charircani. Shinallatac Jerusalenpi punta causaccunata yallimi vacacunatapish, ovejacunatapish charircani. 8Curitapish, cullquitapish, jatun mandac charinacunatapish achcatami tandachircani. Cantac caricunatapish, huarmicunatapish, tocanacunatapish tucuitami charircani. Chashnami ñucaca gentecuna cushicuna cashca shina, yallita cushicushpa, huarmicunata catipi charircani. 9Ñucaca Jerusalenpi punta causaccunataca yalli charicmi carcani. Tucuipac alli alli nishcami carcani. Yachaipish ñucamantaca mana anchurircachu. 10Ñuca shunguca tucuita ruhuashcahuanmi cushicurca. Chaimantami ñuca ñahui imata munashcata ruhuarcani. Ima shina cushicunata munashpaca chashnatacmi cushicurcani. Chaicunataca ñuca shunguhuan ruhuashpatacmi yallita cushicurcani. 11Chashna cushicushca quipami achca shaicuihuan ñuca maqui imallata ruhuashcacuna imapac cashcata alli yuyarircani. Chashna yuyarishpami tucui chaicunaca yangalla cashcata, shinallatac huairata caticushca shina cashcata yacharcani. Chashna cashcamantaca inti achicyachicuc cai pachapica imapish yangallami.
Gentecuna ruhuashcaca yangalla cashcamanta
12Chai quipaca alli yachaitapish, loco shina canatapish, yuyai illac canatapish cutinmi yuyarircani. Quipa jatun mandacca ña ruhuashcamanta ashtahuan mushuctaca ¿imatatac ruhuai pudingayari? nishpami yuyarcani. 13Chashna alli yuyarishpami achicca tutata achicyachic shinallatac, yuyai illactaca alli yachai atic cashcata yacharcani.
14Alli yachac runaca
allita ricushpami purin.
Ashtahuanpish mana entendic
runaca purapi shinami purin.
Shina cacpipish tucuripica tucuimi chashnallatac tucuna cashcatami entendircani.
15Chaimantami ñuca shungupica: «Mana entendic runa ima shinami tucugrin, shinallatacmi ñucapish tucusha. Shina cashpaca, ¿imapactac ashtahuan yachacurcani?» nircani. Chaita yuyarishpami ñuca shungupica: «Caicunapish yangallami» nircani. 16Yachac runapish, mana entendic runapish huañungallatacmi. Yachac runatapish, mana entendic runatapish asha huatacuna quipaca pi mana yuyaringachu. 17Inti achicyachicuc cai pachapi tucui imalla ruhuashcaca umata nanachinmi. Chaimantami ñuca causaitapish mana ricunayachini. Tucui chaicunata alli yuyaricpica, huairata caticuc shinami yangalla. 18Shinallatac inti achicyachicuc cai pachapi tucui imatapish ruhuashcataca piñarcanimi. Chaicunataca ñucapac quipa mandaccunami japina carca cani. 19Chai mandac alli yachac cactapish, mana cashpaca yuyai illac cactapish, ¿pitac yachan? Shina cashpapish alli yachaihuan inti achicyachicuc cai pachapi imatapish yallita ñuca ruhuashcataca japingami. Chaicunapish yangallami.
20Inti achicyachicuc cai pachapi imata yallita ruhuashcapish, yanga cashcata yuyarishpami, ñuca shungu upayarca. 21Chaica shuc alli yuyaihuan allita ricushpa, alli yachaihuan ruhuashcataca manapish imata trabajac runami japin. Chaica yangallami, shinallatac jatun mana allimi. 22Chai runa inti achicyachicuc cai pachapi uma nanaihuan paipac shungupi shaicucta imatapish ruhuashcamantaca, ¿imatatac japin? 23Tucui paipac causai punzhami llaquillata, mana allillata apan. Imata ruhuashcapish paillatatacmi llaquichin. Paipac yuyaica tutapish mana samarinchu. Chaipish yangallami.
24Runamanca micuna, ubiana shinallatac paipac trabajomanta paipac shungu munashcata ruhuashpa cushicunami ashtahuan alli. Chashna cushicunatapish, Diosllatac cuc cashcatami ricurcani. 25Mana paihuan cashpaca, ¿pitac yallita micunyari? ¿Pitac cushicunyari? 26Diosca, paipac ñaupapi alli causac runallamanmi alli yuyaita, alli yachaita, cushicuita cun. Ashtahuanpish juchayuc runamanca charishca jahuapish, ashtahuan tandachichunmi cun. Chai huacaichishcacunataca Diospac ñaupapi alli causac runaman cungapacmi chashnaca cun. Chaicunapish huairata caticuc shina yangallami.
Currently Selected:
ECLESIASTÉS 2: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.