ECLESIASTÉS 4
4
1Tigrarishpa ricushpaca cai pachapi tucuita ruhuashpa, yallita llaquichicuctami ricurcani. Llaquihuan huacacucpipish pi mana cushichircachu. Poderta chariccunapish llaquichiccuna parte carca. Cushichiccunaca shucllapish mana tiyarcachu. 2Chaita ricushpami huañuccunaca causaccunata yalli alli cashcata yuyarcani. 3Shina cacpipish, inti achicyachicuc cai pachapica manarac huacharishca cashpa, chai llaquicunata manarac ricuc gentecunami ashtahuan alli yuyarcani.
4Shinallatac achcata trabajashpa tucui imatapish alli ruhuacpica, shuccunaca envidiashpa piñac cashcatapish ricurcanimi. Shinaca alli canapish, huairata caticushca shina yangallami.
5Yuyai illac runaca,
maquita cruzashpami tiyarin.
Chaita ruhuashpaca
paillatacmi llaquita apacun.
6Llaquita trabajashpa,
ishcai maquipi imata charinapac randica,
ashallata trabajashpa,
shuc maquillapi imata charinami
ashtahuan alli.
7Cutin tigrarishpa cai pachapi inti achicyachicta ricushpaca imapish yanga cashcatami ricurcani. 8Maijan sapalla runaca ricsishcacunatapish, huahuacunatapish, huauquillatapish mana charinchu. Pai charishcata piman saquina mana tiyacpipish, manatac samarinchu. Mashnata charishpapish mana cushicunchu. Shinallatac: «¿Piman saquingapactac chashna mana samarishpa trabajacuni, imamantatac ñuca almataca yallita shaicuchini?» nishpapish mana tapurinchu. Chaipish yangallami. Shinallatac llashacta aparishca shina llaquimi.
9Shuclla causanapac randica, ishcai tucushpa causanami ashtahuan alli. Ishcai cashpami trabajashpapish allita japincuna. 10Shuc urmacpica, caishucmi jatarichin. Ashtahuanpish ¡aij shuclla causac runalla, paitaca pitac jatarichingayari! 11Camapi sueñushpapish ishcai cashpami cunurincuna. Ashtahuanpish shuclla cashpaca ¿pihuantac cunuringayari? 12Maijan macashpaca shucllataca mishai pudinmi, ishcai cashpaca mishacta mana saquinchu. Quimsamanta tursishca huascaca mana utca pitirinchu.
13Yuyai illac, yuyac,
imatapish mana entendic mandacpac randica,
huaccha huambra cashpapish,
yachac huambrami ashtahuan alli.
14Pai carcelmanta llucshishca cashpapish,
mana cashpaca huaccha cashpapish,
jatun mandacmi tucurca.
15Jatun mandacpac randi mandangapac yaicuc huambrataca llactapi causac tucui gentecuna jatun mandac cachun chasquictami ricurcani. 16Paita chasquiccuna yallita achca cacpipish, paicunapac huahuacunaca ña mana munangacunachu. Jatun mandac canapish huairata caticushca shina yangallami.
Currently Selected:
ECLESIASTÉS 4: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.