2 REYES 1
1
Ocozías huañushcamanta
1Acab huañushca quipaca Moab llactapi causaccunami israelcunata mana cazushpa cariyarca.
2Ocoziasca Samaria llactapi cac paipac huasi ventanamanta urmashpami yallita ungurca. Chaimantami maijan huillaccunata cachashpaca: «Ecrón pueblopi tiyac Baal-zebub diospacman rishpa, ñuca cai ungüimantaca alliyanata, mana alliyanata tapugrichic» nirca. 3Chaimantami Mandac Diospac ángel tisbitapuramanta Eliastaca: «Samaria pueblota jatun mandacpac huillaccunata tupangapac huichai ri. Paicunataca: “Ecrón pueblo Baal-zebub diosman tapungapac richunca Israel llactapica, ¿manachu Dios tiyan?” ningui. 4Chaimantami Mandac Diosca: “Can siricuc camamantaca mana uricunguichu, ashtahuanpish huañunguitacmi” ninmi nigri» nirca.
Chaimantami Eliasca tupangapac rirca. 5Huillaccuna jatun mandacpacman cuticpica, jatun mandacca:
—¿Imapactac cutimunguichic?— nirca.
6Shina nicpimi paicunaca:
—Shuc runami ñucanchic-huan tupashpaca: “Cancunata cachac jatun mandacpacman cutishpa, Mandac Diosca: ‘Ecrón pueblopi tiyac Baal-zebub diosman tapuchun cachachunca Israel llactapica, ¿manachu Dios tiyan? Chaimantami can siricuc camamantaca mana uricunguichu. Ashtahuanpish huañunguitacmi’ ninmi” nigrichic— nirca.
7Shina nicpimi, jatun mandacca:
—Cancunahuan tupashpa, chashna nic runaca, ¿imalayatac carcayari?— nirca.
8Shina nicpimi paicunaca:
—Chai runaca millmayuc cuerpo, cinturapica cara chumbihuan chumbillishcami ninmi— nirca.
Shina nicpi, jatun mandacca:
—Paica tisbitapuramanta Eliasmi— nirca.
9Chai quipami Ocoziasca pichca chunga soldadocunata paicunata mandac-huan Eliaspacman cacharca. Paicuna chayacpica, Eliasca urcu jahuapimi tiyacushca carca. Chaipimi soldadocunata mandacca:
—Diospac runalla, jatun mandacca: “Canta urai shamuchun” ninmi— nirca.
10Shina nicpimi, Eliasca pichca chunga soldadocunata mandactaca:
—Ñuca Diospac runa cacpica, jahua pachamanta nina shamushpa cantapish, cambac pichca chunga soldadocunatapish rupachishpa tucuchichun— nirca.
Shina nicpimi, jahua pachamanta nina shamushpa paitapish, paipac pichca chunga soldadocunatapish rupachishpa tucuchirca. 11Chaimantami jatun mandacca cutin pichca chunga soldadocunata paicunata mandac-huan Eliaspacman cacharca. Chaipimi soldadocunata mandacca:
—Diospac runalla, jatun mandacca: “Cantaca utca urai shamui” ninmi— nirca.
12Shina nicpimi Eliasca:
—Ñuca Diospac runa cacpica, jahua pachamanta nina shamushpa cantapish, cambac pichca chunga soldadocunatapish rupachishpa tucuchichun— nirca.
Shina nicpimi, jahua pachamanta nina shamushpa, paitapish, paipac pichca chunga soldadocunatapish rupachishpa tucuchirca. 13Cutinllatacmi pichca chunga soldadocunata paicunata mandac-huan cacharca. Caihuanca quimsa cutinmi cacharca. Quimsaniqui ric soldadocuna mandac Elías tiyacushcaman chayashpa cungurishpaca:
—¡Diospac runalla! ¡Ñuca causaipish, canta servic pichca chunga soldadocunapish cambac ñaupapi alli ricurishca cachun! 14Riqui, ñucapac punta shamuc cai pichca chunga soldadocunata mandaccunataca paicunapac pichca chunga soldadocunandimi jahua pachamanta nina shamushpa rupachishpa tucuchishca. ¡Cunanca, ñuca causaica cambac ñaupapi alli ricurishca cachun!— nirca.
15Chaimantami Mandac Diospac angelca Eliastaca: «Paihuan rilla, ama manchaichu» nirca.
Shina nicpi, Elías jatarishpa chai mandac-huan jatun mandacpacman 16rishpaca:
—Mandac Diosca: “Israel llactapi mana Dios tiyacpi shina Ecrón pueblopi tiyac Baal-zebub diosman tapuchun cachashcamantaca, can siricuc camamantaca mana uricunguichu, ashtahuanpish huañunguitacmi” ninmi— nirca.
17Mandac Dios Eliasta nishca shinallatacmi Ocoziasca huañurca. Ocoziasca mana churita charircachu. Chaimantami Israel llactaca Joram mandai callarirca. Josafatpac churi Joramca ishcai huatatami Judá llactataca mandarca.
18Ocoziaspac shuctac ruhuashcacunapish Israel llactata jatun mandaccuna imata ruhuashcacunata quillcashcapimi ashtahuan tiyacun.
Currently Selected:
2 REYES 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.