1 REYES 22
22
Acab llaqui tucunamanta Micaías huillashcamanta
(2 Cr 18.1-34)
1Siria llactahuan, Israel llactahuanca quimsa huatatami mana macanacurca. 2Ashtahuanpish quimsa huata tucucpimi, Judá llactata jatun mandac Josafatca Israel llactata jatun mandacta ricungapac rirca. 3Chashna ricpi, Israel llactata jatun mandacca paita serviccunataca:
—¿Galaad llacta Ramot pueblo ñucanchicpac cashcataca manachu yachanguichic? ¡Siria llactata jatun mandacpac maquimanta chai pueblota quichungapacca imata mana ruhuashcanchicchu!— nirca.
4Chashna nishpami Josafattaca:
—¿Galaad llactapi cac Ramot pueblomanta macanacungapac ñucanchic-huan risha ninguichu?— nirca.
Shina nicpimi, Josafatca Israel llactata jatun mandactaca:
—Ñucapish, ñuca gentecunapish cambac maquipimi canchic. Ñuca caballocunapish cambacllatacmi— nirca.
5Shinallatac Josafatca Israel llactata jatun mandactaca:
—Imata manarac ruhuashpa Mandac Dios ima nishcata yachangapac paimanrac tapui— nirca.
6Shina nicpimi, Israel llactata jatun mandacca Diosmanta huillac chuscu patsac runacunata tandachishpaca:
—¿Galaad llacta Ramot pueblopi causaccunahuan macanacungapac rishachu, mana cashpaca saquishachu?— nirca.
Shina nicpimi paicunaca:
—Rilla, Mandac Diosca chai pueblopi causaccunataca jatun mandacpac maquipimi churanga— nirca.
7Shina nicpimi Josafatca:
—Ñucanchic tapungapacca, Mandac Dios ima nishcata huillac shuctac runaca, ¿manachu caipi tiyan?— nirca.
8Shina nicpi, Israel llactata jatun mandacca Josafattaca:
—Mandac Dios ima nishcata huillac shuc runaca tiyanracmi. Paica Imlapac churi Micaiasmi. Paica allitaca mana huillanchu ashtahuanpish mana allitami huillan. Chaimantami paitaca mana ricunayan— nirca.
Shina nicpimi Josafatca:
—Jatun mandac, ama chashna nichu— nirca.
9Shina nicpimi, Israel llactata jatun mandac paita servic shuc mandacta cayashpaca: «Imlapac churi Micaiasta utca pushamugri» nirca.
10Israel llactata jatun mandacpish, Judá llactata jatun mandac Josafatpish, mandaccuna churarinata churashcami Samaria puebloman yaicuna pambapi tiyacurca. Huillaccunaca tucuimi paicunapac ñaupapi huillacurca. 11Quenaanapac churi Sedequiasca fierromantami gachucunata ruhuachishca carca. Chashna ruhuachishpami paica: «Mandac Diosca: “¡Cai gachucunahuanmi siriocunataca sacmashpa tucuchingui!” ninmi» nirca.
12Tucui huillaccunami chai shinallatac huillashpaca: «Mandac Diosmi chai pueblopi causaccunataca jatun mandacpac maquipi churashpa mishachinga. Chaimanta Galaad llacta Ramot puebloman huichai rilla» nirca.
13Micaiasta cayangapac ric runaca:
—Riqui, tucui huillaccunami jatun mandacman alli canata shuclla shina huillacuncuna. Chaimanta canpish paicuna shinallatac alli canata huillaiyari— nirca.
14Shina nicpipish Micaiasca:
—¡Mandac Diospac shutipimi nini: Ñucaca pai ima nishcatami huillasha!— nirca.
15Micaías jatun mandacpacman chayacpimi, jatun mandacca:
—Micaías, ¿Galaad llacta Ramot pueblopi causaccunahuanca macanacungapac rishunchu, mana cashpaca saquishunchu?— nirca.
Shina nicpimi paica:
—Rilla, Mandac Diosmi jatun mandacpac maquipi churanga. Chaimanta canca atinguimi— nirca.
16Shina nicpimi, jatun mandacca:
—¿Mashna cutin mana llullashpa chashna canatatac Mandac Diospac shutipi huillai nicushayari?— nirca.
17Shina nicpimi paica:
—Tucui israelcunatami michicta mana charic ovejacuna shina, tucui urcucunata shic-huarishpa rishcata ricurcani. Shina cacpimi, Mandac Diosca: “Paicunaca mana mandacta charinchu. Chaimanta mana manchashpa, huasicunaman cutichiclla” ninmi— nirca.
18Shina nicpimi, Israel llactata jatun mandacca Josafattaca:
—¿Manachu paica ñucamanta allita huillanapac randica llaquita huillanga nircani?— nirca.
19Chai quipami Micaiasca:
—Mandac Dios ima nishcata uyai. “Ñucaca Mandac Diostaca pai tiyarinapi tiyacuctami ricurcani. Paipac ladopica jahua pacha angelcunami paipac alli ladomanpish, lluqui ladomanpish shayacurca. 20Chaipimi Mandac Diosca: Acab, Galaad llactapi cac Ramot pueblopi causaccunahuan macanacushpa, llaqui tucuchunca ¿Pitac umangapac risha ninguichic? nirca. Shina nicpimi, caishuc chaishuc, caita, chaita nircacuna. 21Shina cacpimi, shuc espíritu Mandac Diospacman shamushpaca: ‘Ñuca umagrisha’ nirca. Shina nicpi, Mandac Diosca: ‘¿Ima shinatac umagringui?’ nirca. 22Shina nicpi, chai espirituca: ‘Ñuca rishpaca, paipac tucui huillaccunapimi llullashpa huillana yuyaita churasha’ nirca. Shina nicpimi, Mandac Diosca: Canca umanguimi, can nishca shinata ruhuangapac rilla” nirca. 23Riqui, Mandac Diosmi tucui cambac huillaccunapac shimipi llullac espirituta churashca. Chashnami Mandac Diosllatac can llaqui tucuchunca mandashca— nirca.
24Shina nicpimi, Quenaanapac churi Sedequías Micaiaspacman cuchuyashpa ñahuipi huactashpaca:
—Mandac Diospac espirituca ¿Maijan ñantata ñucamanta anchurishpaca canman huillangapacca rircayari?— nirca.
25Shina nicpimi Micaiasca:
—Riqui, huasiman yaicushpa, shuc ucumanta shuc ucuman miticushpa puricui punzhami yachangui— nirca.
26Shina nicpi, Israel llactata jatun mandacca:
—Micaiasta prezushpa, pueblota mandac Amonpacman, shinallatac ñuca churi Joaspacman apaichic. 27Paicunataca: “Jatun mandacca: ‘Cai runata carcelpi churashpa asha tandata, asha yacuta cushpa, ñuca allilla cutingacaman llaquichishpa charicuichic’ ninmi” nigrichic— nirca.
28Shina nicpimi Micaiasca:
—Mana ima tucushpa cushilla cutishpaca, ñucaman Mandac Dios mana huillachishcachu canga— nirca.
Shinallatac: «¡Tucui gentecuna uyaichic!» nirca.
29Shinami Israel llactata jatun mandacca Judá llactata jatun mandac Josafathuan Galaad llactapi cac Ramot puebloman rirca. 30Chaipimi Israel llactata jatun mandacca Josafattaca: «Ñucaca shuctac churanata churarishpami, macanacungapac risha. Canca cambac churanata churarishpa ri» nirca.
Acab huañushcamanta
31Shina cacpimi, Siria llactata jatun mandacca macanacuna carretapi puric soldadocunata mandac quimsa chunga ishcai soldadocunataca: «Cancunaca uchillahuanpish, jatunhuanpish ama macanacunguichicchu. Ashtahuanpish Israel llactata jatun mandacllahuan macanacunguichic» nirca.
32Carretapi cac soldadocunata mandac Josafatta ricushpaca: «¡Chaimi israelcunata jatun mandac!» nirca.
Chashna nishpaca, paita macangapacmi cuchuyarca. Shina cuchuyacpimi, Josafatca caparirca. 33Chashna caparicpimi, carretacunapi cac soldadocunata mandacca, mana Israel llactata jatun mandac cashcamanta imatapish mana ruhuashpa rircacunalla. 34Ashtahuanpish shuc soldadomi arcohuan pucllashpalla shitashpa Israel llactata jatun mandactaca macanacungapac sinchi churanata churarishcata pasachishpa chugrichirca. Chaimantami paica carretata apactaca: «¡Carretata muyuchishpa, cai macanacuimanta llucchi. Ñucaca chugrishcami cani!» nirca.
35Chai punzhaca yallitami macanacuica sinchiyarca. Chaimantami Israel llactata jatun mandacca Siriocunapac ñaupapi paipac carretapi shayarishpa, tucui punzha cainarca. Shina cashpapish, chishipacca ña huañurcami. Paipac chugrimanta yahuar llucshishpaca carreta cajonpimi cuchayarca. 36Ña inti tigracucpimi, carpa huasicunamanta caparishpaca: «¡Tucui gentecuna cancunapac pueblocunaman, llactacunaman cutichic! 37Jatun mandacca huañurcami» nishpa uyarirca.
Pai huañucpica, Samaria puebloman apashpami chaipi enterrarca. 38Chai carretataca Samaria pueblopi cac yacu junduman apashpami jahuarcacuna. Chai jundupimi cullquimanta huainayac huarmicunaca jahuari carcacuna. Mandac Dios nishca shinami paipac yahuartaca allcucuna lambirca.
39Acabpac shuctac ruhuashcacunapish marfilmanta huasita ruhuashcapish, tucui pueblocunata ruhuashcapish Israel llacta jatun mandaccuna imata ruhuashcacunata quillcashcapimi tiyacun. 40Acab huañushpaca paipac ñaupa taitacunahuanmi tandarigrirca. Paipac randica paipac churi Ocoziasmi mandarca.
Josafat ima shina mandashcamanta
(2 Cr 20.31-37)
41Asapac churi Josafatca Israel llactata jatun mandac Acab chuscu huatata mandacucpimi, Judá llactata mandai callarirca.
42Josafatca quimsa chunga pichca huatayuc cashpami mandai callarirca. Paica ishcai chunga pichca huatatami Jerusalenpi mandarca. Paipac mamaca Silhipac ushi Azubami carca.
43Paica, paipac taita Asa shinallatacmi Mandac Diosmanta mana anchurishpa, imatapish cashcata ruhuashpa, Diospac ñaupapi causarca. Shina cashpapish, lomacunapi tiyac altarcunataca mana anchuchircachu. Shina cacpimi, gentecunaca animalcunata huañuchishpa, inciensota rupachishpa catircacuna. 44Shinallatac Israel llactata jatun mandac-huan mana piñanacushpa causangapacmi Josafatca ari nirca.
45Josafatpac shuctac ruhuashcacunapish, jatun mandac tucushcapish, macanacuicunata ruhuashcapish Judá llacta jatun mandaccuna imata ruhuashcacunata quillcashcapimi tiyacun. 46Paimi paipac taita Asa mandacuc punzhacunapi saquirishca altarcunapi caripura huaclliric gentecunataca tucui tucuchirca.
47Chai punzhacunapica Edom llactata jatun mandacca mana tiyarcachu. Jatun mandacpac randi churashca mandacllami tiyarca.
48Josafatca Tarsis llacta jatun barcocuna shinatacmi Ufir llactamanta curita apamungapac jatun barcocunata ruhuarca. Shina cacpipish, chai barcocunaca mana rircachu. Ashtahuanpish Ezión-geber llactapimi paquirishpa tucurirca. 49Shina cacpimi, Acabpac churi Ucoziasca Josafattaca: «Ñucata serviccuna cambac serviccunahuan barcopi richun» nirca. Shina nicpipich, Josafatca mana uyarcachu.
50Josafat huañushpaca paipac ñaupa taitacunahuanmi tandarigrirca. Paitaca paipac taitacunata enterrashcallapitacmi Davidpac pueblopi enterrarca. Paipac randica paipac churi Jorammi mandarca.
Israel llactata Ocozías mandashcamanta
51Judá llactata jatun mandac Josafat chunga canchis huatata mandacucpimi, Acabpac churi Ocoziasca Israel llactata Samaria pueblopi mandai callarirca. Paica ishcai huatatami Israel llactata mandarca. 52Paica, taita mama causashca shinami Mandac Diospac ñaupapica mana allita ruhuashpa causarca. Nabatpac churi Jeroboamca mana allita ruhuashpami israelcunatapish juchallichirca. 53Paica, paipac taita mana allita ruhuashcata shinallatacmi Baal diosta servishpa, adorashpa israelcunata jatun Mandac Diostaca yallita piñachirca.
Currently Selected:
1 REYES 22: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.