2 REYES 2
2
Eliasta jahua pachaman apashcamanta
1Mandac Dios Eliasta acapana huairahuan jahua pachaman apagricucpimi, Eliasca Eliseohuan Gilgal puebloman shamurca. 2Chaipimi Eliasca, Eliseotaca:
—Ñucataca Mandac Diosmi Bet-el puebloman richun nin. Cunanca caipi saquirilla— nirca.
Shina nicpimi Eliseoca:
—¡Mandac Diospac shutipi, cambac shutipimi nini: Canllataca manatac saquishachu!— nirca.
Chaimantami Bet-el puebloman ishcaita urai rircacuna. 3Chaiman chayacpimi, Dios ima nishcata huillaccuna Eliseota tupangapac llucshishpaca:
—¿Mandac Dios canta mandacta quichushpa cunan apagricuctaca yachanguichu?— nirca.
Shina nicpimi Eliseoca:
—Ari, yachanimi, upalla cailla— nirca.
4Eliasca cutinmi Eliseotaca:
—Ñucataca Mandac Diosmi Jericó puebloman richun nin. Cunanca caipi saquirilla— nirca.
Shina nicpimi Eliseoca:
—¡Mandac Diospac shutipi, cambac shutipimi nini: Chaimanca mana cachashachu!— nirca.
Chaimantami Jericó puebloman ishcaita rircacuna. 5Chaiman chayacpimi, Dios ima nishcata huillaccuna Eliseota tupangapac llucshishpaca:
—¿Mandac Dios canta mandacta quichushpa cunan apagricuctaca yachanguichu?— nirca.
Shina nicpimi Eliseoca:
—Ari, yachanimi, upalla cailla— nirca.
6Eliasca Eliseotaca:
—Ñucataca Mandac Diosmi Jordán yacuman richun nin. Chaimanta cunanca, caipi saquirilla— nirca.
Shina nicpimi Eliseoca:
—¡Mandac Diospac shutipi, cambac shutipimi nini: Canllataca manatac saquishachu!— nirca.
Chaimantami ishcaita rircacuna. 7Chaiman chayashpaca, Jordán yacu ladopimi ishcaita shayarirca. Chaipi shayacucpimi, Dios ima nishcata huillaccunapac pichca chunga churicuna shamushpa, paicunamanta carupi shayarirca. 8Chaipimi Eliasca paipac jahualla churanata llucchishpa, patarishpaca yacupi huactarca. Shina huactacpimi, yacu caiman chaiman montonaricpi, paicunaca chaquishca allpata pasarca. 9Ña pasashpaca, Eliasca Eliseotaca:
—Cambac ladomanta ñucata manarac apacpi, canman imata ruhuachun ñucata mañailla— nirca.
Shina nicpimi Eliseoca:
—Cambac espirituta chaupihuan cuchun ninimi— nirca.
10Shina nicpimi paica:
—Mana cuipacllatacmi mañangui. Shina cacpipish, cambac ladomanta ñucata apacta ricushpaca chasquinguimi. Mana ricushpaca, mana chasquinguichu— nirca.
11Paicuna chashna parlanacushpa ricucllapitacmi, nina japiricuc caballocunaca nina japiricuc carretacunata aisashca shamushpa, paicunata chicanyachirca. Shina chicanyachicpimi, Eliasca acapana huairapi huichai rirca. 12Chashna ricta ricushpami Eliseoca: «¡Ñuca taitalla, ñuca taitalla! ¡Canca israelcunapac macanacuna carretacunapi, caballocunapi ric soldadocuna shinami cangui!» nirca.
Chai quipaca Eliastaca mana ashtahuan ricurcachu. Chai quipaca, paipac churanata japishpami ishcaipi lliquirca. 13Quipataca Eliaspac saquirishca jahualla churanata japishpami, Jordán yacullamanta cutishpa, yacu patapi shayarirca. 14Chaipi shayarishpami, Eliaspac saquirishca jahualla churanata japishpa yacupi huactarca. Chashna huactashpaca: «¿Eliasta Mandac Dios maipitac cangui?» nirca.
Chashna nishpa huactacpimi, yacuca uraman janaman montonarirca. Chashna montonaricpimi, Eliseoca pasarca. 15Jordán yacu chimbapi tiyac Jericó pueblopimi, Dios ima nishcata huillaccunapac churicunaca shayacurca. Chaipimi paicunaca: «¡Eliaspac espirituca Eliseopimi causacun!» nirca.
Shina nishpami, Eliseopacman rishpa, pambacaman cumurircacuna. 16Chashna cumurishpaca:
—Riqui, caipimi canta servic pichca chunga alli sinchi runacunaca shayacun. Paicunata canta mandac Eliasta mashcachun cachai. Eliastaca, Mandac Diospac Espirituca mai urcucunapi, mana cashpaca mai pambacunapimi shitashca canga— nircacuna.
Shina nicpimi Eliseoca:
—Ama pita cachaichicchu— nirca.
17Ashtahuanpish paicuna cachai nicucllapitacmi Eliseoca:
—Shina cashpaca cachaichic— nirca.
Shina nicpimi, paicunaca pichca chunga runacunata cacharca. Paicunaca quimsa punzhata Eliasta mashcashpapish mana tarircachu. 18Eliseoca Jericó pueblopimi saquirirca. Eliseopacman paicuna cutimucpimi, paica:
—¿Manachu ama richicchu nircani?— nirca.
19Jericó pueblopi causaccunami Eliseotaca:
—Riqui, cai puebloca ñuca amo ricushca shinallatac alli pushtupimi. Shina cashpapish yacuca mana allichu. Shinallatac allpapish mana pucuc allpachu— nirca.
20Shina nicpimi Eliseoca:
—Shuc mushuc mangata apamushpa, chaipi cachita churaichic— nirca.
Shina nicpimi, paicunaca apamushpa curca. 21Chaitami Eliseoca yacu junduman apashpa, chaipi cachita shitashpaca:
—Mandac Diosca: “Ñucami cai yacuta allichircani. Chaimanta cai yacupica huañuipish, ungüipish mana ashtahuan tiyangachu” ninmi— nirca.
22Shina nicpimi, chai yacuca alli tucushpa Eliseo nishca shina cunan punzhacaman alli can.
23Chai quipaca Eliseoca Bet-el pueblomanmi rirca. Pai ñanta huichai ricucpimi, chai pueblopi causac maijan huambracuna llucshishpaca: «¡Lluchu uma runami llucshicun! ¡Lluchu uma runami llucshicun!» nishpa burlarcacuna.
24Chaimantami Eliseo tigrarishpa paicunata ricushpa Mandac Diospac shutipi maldiciarca. Chashna maldiciacpimi, sachamanta ishcai huarmi oso llucshishpa, chai huambracunamantaca chuscu chunga ishcai huambrata pitinacushpa huañuchirca. 25Eliseoca chai pueblomantaca Carmelo urcumanmi rirca. Chaimantaca Samaria pueblomanmi cutirca.
Currently Selected:
2 REYES 2: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.