1 REYES 21
21
Acabmantapish, Nabotpac uvas chagramantapish
1Chai quipaca, Jezreel pueblopi causac Nabotmi Samaria llactata jatun mandac Acab mandana huasi ladopi uvas chagrata charirca.
2Chaimantami Acabca Nabottaca:
—Cambac uvas chagrahuan cac allpata huertata ruhuangapac ñucaman cui. Ñuca huasi ladollapi cashcamantami cashna nini. Chai allpamantaca uvas tarpushca ashtahuan alli allpatami cusha. Mana cashpaca, cambac ashtahuan alli cana cacpica, mashna valishcata pagashallami— nirca.
3Shina nicpimi, Nabotca Acabtaca:
—¡Ñuca taitacuna saquishca allpata canman cunataca Diospish ama munachun!— nirca.
4Nabot: «Ñuca taitacuna saquishca allpata mana cushachu» nishcamantami, Acabca mai llaquirishpa piñarishcata ricuchishpa paipac huasiman rirca. Huasiman chayashpaca camapi siririshpa pirca ladota chapashpami micunatapish mana munarca. 5Chashna cacpimi, paipac huarmi Jezabel paipacman shamushpaca:
—¿Ima nishpatac cambac shungupica yallita llaquirishca cangui? ¿Micunatapish mana micusha ningui?— nirca.
6Shina nicpimi paica:
—Jezreel pueblopi causac Nabothuan parlashpami ñucaca: “Uvas chagra allpata ñucaman cui. Chai allpamantaca cullquita, mana cashpaca canman ashtahuan alli cana cacpica uvas tarpushcata shuctac allpata cushallami” nircani. Shina nicpimi paica: “Uvas chagrahuan cai allpataca mana cushachu” nircami— nirca.
7Shina nicpimi, paipac huarmi Jezabelca:
—¿Manachu canca Israel llactata jatun mandac cangui? Jatarishpa micushpa cushicui. Jezreel pueblopi causac Nabotpac uvas chagrataca ñucami cusha— nirca.
8Chashna nishpami chai huarmica Acabpac shutipi quillcashpa, paipac sortejasllahuantac sellota churashpa, Nabot causana pueblopi causac cunac yuyaccunaman, mandaccunamanpish cacharca. 9Chai quillcashcacunapica: «Mana micushpa cainangapac tucuita tandachichic. Chai quipaca, gentecunapac ñaupapi Nabotta tiyachichic. 10Chai quipaca: “Diostapish, jatun mandactapish, mana alli nishpami rimarcangui” nishpa, juchanchishpa huillachun ishcai millai runacunata, paipac ñaupapi tiyachichic. Paicuna cashna huillacpica, pueblomanta llucchishpa rumicunahuan shitashpa huañuchinguichic» nirca.
11Chaimantami Nabot causacuc pueblopi causaccunapish, cunac yuyaccunapish, mandaccunapish, Jezabel quillcashpa mandashca shinallatac ruhuarcacuna. 12Mana micushpa cainana punzhata ruhuashpami Nobottapish gentecunapac ñaupapi tiyachircacuna. 13Chaipi tiyacucpimi, chai millai ishcai runacuna shamushpa, paipac ñaupapi tiyarircacuna. Chai millai jatun runacunami Nabottaca: «Nabotca Diostapish, jatun mandactapish mana alli nishpami rimarca» nishpa juchanchishpa huillarcacuna. Shina huillacpimi, pueblomanta llucchishpa, rumicunahuan shitashpa huañuchirca. 14Chai quipaca: «Nabotta rumicunahuan shitashpami huañuchirca» nishpa, Jezabelman huillachun cacharcacuna. 15Nabotta rumicunahuan shitashpa huañuchishcata Jezabel yachashpami Acabtaca: «Jezreel pueblopi cac Nabotpac uvas chagrataca jatarishpa japigri. Chai allpataca cullquipipish mana catunata munarcachu. Nabotca mana causacunchu, ñami huañushca» nirca.
16Nabot huañushcata yachashpami Acabca Jezreel pueblopi cac Nabotpac uvas chagrata paipac cachun japingapac urai rirca. 17Shina cacpimi, tisbitapuramanta Eliasta Mandac Dios rimashpaca: 18«Israel llactata jatun mandac Acabhuan tupangapac urai ri. Paica Samaria pueblopimi causan. Cunanca, uvas chagrahuan cac Nabotpac allpata japingapacmi urai rishpa paica chaipi puricun. 19Paita rimashpaca: “Mandac Diosca: ‘¿Nabotta huañuchishca jahuachu allpatapish japicungui? Maipimi Nabotpac yahuarta allcucuna lambirca, chaillapitacmi cambac yahuartapish allcucuna lambinga’ ninmi” nigri» nirca.
20Acabca Eliasta ricushpaca:
—Ñucahuan mana alli cac runami caipi tupangapac shamushcangui— nirca.
Shina nicpimi Eliasca:
—Canllatac caturic shina, Mandac Diospac ñaupapi mana allita ruhuashcamantami canhuan tupangapac shamuni. 21Mandac Diosca: “Riqui, cunanmi jatun llaquita canman apamugrini. Cambac huahua huahuacunataca pichac shinami tucui tucuchisha. Cambac huahua huahuapurataca shucllatapish mana saquishpami, Israel llactapica servishpa causaccuna cacpi, mana servishpa causaccuna cacpipish tucui tucuchisha. 22Cambac familiataca Nabatpac churi Jeroboampac familiata shina, Ahiaspac churi Baasapac familiata shinami ruhuagrini. Ñucata mana cazushpa, llaquichishcamanta, israelcunatapish juchata ruhuachishcamantami chashnaca ruhuagrini” ninmi. 23Jezabeltapish Mandac Diosca: “Jezabeltaca Jezreelpac pambapimi allcucuna micunga. 24Acabpac huahua huahuacuna pueblopi huañucpica, allcucunami micunga. Pueblomanta canzha pambapi huañucpica, jahuata volac animalcunami micunga” ninmi— nirca.
25Acab shinaca Mandac Diospac ñaupapi millaita ruhuacca pipish mana tiyarcachu. Paitaca paipac huarmimi millaita ruhuachicurca. 26Paica amorreocuna shinami ruhuashcalla dioscunata catishpa, millanayaita ruhuashpa causarca. Amorreocunataca chashna millaita ruhuaccuna cacpimi, Mandac Diosca israelcunapac chaupimanta llucchishpa cacharca.
27Acab cai nishcacunata uyashpaca, paipac churanata lliquishpami sharpa churanata churarishpa, mana micushpa cainarca. Shungu llaquirishpa llaquilla cashpami, chai churanallahuantac sueñurca. 28Chashna puricucpimi, Mandac Diosca tisbitapuramanta Eliastaca:
29«¿Acab ñucapac ñaupapi mai llaquilla tucushcataca ricunguichu? Pai chashna mai llaquilla tucushcamantami pai causacui punzhapica mana llaquichishpa, ashtahuanpish paipac churi mandacui punzhacunapi paipac familiataca llaquichigrini» nirca.
Currently Selected:
1 REYES 21: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.