Luka 10
10
1HWABAN ta je ûnyi eling, haba Than ame ûca keihen tavat a sevente, me kunʼ ödrin, a ödrin ûcû lo he ka bödra ka hnyi ta je taun, me ta je dok e ame he ka he hnyin. 2E ame ha ködrin, ka habe, E gan hmâ widrany ke wakhalet thibi tavat adre me huliwan: anyin a wale hic ju öbun ka Thaniny widrany, me me he ka kunâ tavat he ka huliwan anyin widrany. 3He thʼ öbun: wâ bi, inya oge me kunʼ öbun helâ me lakon mamoe hnyi wanben ta je luko. 4Ca hom bi tang mone, me tang, me taben hnyeûca, ke ca italofa bi me ke at eû hnyi gethen. 5Ke haba uma öbun e he ka dit ka hnyin, mē ha thö, ka habe, E so e hnahic ut uma ang. 6Ke a ne e bi ling at ame he ka hnahic, me ame he ka o kâu hnahic ûnyi gabun: ke a ne ba, me ame he ka hmetu köbun. 7Laba ju hnyi uma eling, ke han me ijem ta je ûnyi ödrin e ham: anyin a haba at huliwa me ûcû me hwaban. Ca dit ûnyi hnyi ke uma me dit ka hnyi ke uma. 8Ke haba taun öbun e he ka o ka hnyin, ke at ka kop öbun, me an ju ta je ûnyi adre me ip hnyi hnyimaköbun: 9ke omelö tavat eling ae hu mok gadra, ke ha kodra, ka habe, E hakekeny jut köbun dokhu dokhon Khong. 10Ke haba taun öbun e he ka o ka hnyin, ke adre me ca köp öbun, me he thʼ öbun ka hnyi getheniny me ha, ka habe, 11Haba kânâiny anyibun taun wale ame kece ka hnyi je hnyeûcahmun, me ohmun e kot ut köbun: ke so bi, khanʼ öbun dö ûnyi ang, ae hakekeny jut dokhu dokhon Khong. 12Inya oge me ha köbun, a gʼ ame he ka hâhâ ka Sodoma hnyi bong eling hon taun e. 13Ekölö gam Korazin! ekölö gam Bethesaida! anyin adre ne ânyâ hnyi Turo me Sidona ta je huliwa ae man adre ânyâ eang unyibun, adre me ne hia but ietra me laba me ecmano ae gan nân me hnabadröu. 14Ke so bi ame he ka hâhâ ka Turo me Sidona hnyi hna owisa, hubun. 15Ke haba u Kaperenauma, hawa, adre me he ka ogoranyi u ka hnyi drany? adre me he ka ohnyikânâi u ka hnyi Hedis. 16Haba at ama ling öbun e ame ling nya; ke haba at ama hûköti öbun, e ame hûkötiö nya; ke haba at ama hûkötiö nya, e ame hûkötiâ at a kunö nya.
17Ke ame o hmetu but tavat a sevente me senyin, me ha, ka habe, Than lö, ame ling ohmun ta je demoni hnen iâm. 18E ame ha ködrin, ka habe, Oge me ö Satana ame utut ûheny hnyi drany helâ me hucuce. 19Wâ bi, oge hia but ham köbun man he ka uto ta je on me ta je sekopio, me maniny hia thithö iwahnaihmiony: ke ba ke ûnyi ame he ka okongu öbun. 20Ke ca senyin bi ge hna ling öbun hnen ta je hanu; ke senyin dö ge hna sihnalimen je iöbun ethö hnyi drany.
21Haba hnyi ûen eling e ame senyin hnyi Hanu Kap me ha, ka habe, Inya oge me ole köu Cica, Tuhan drany me hmeledrany, anyin a u je ikhâlâ ta je ûnyi eang ge tavat ae metâ ke tavat wâ bongon, me adre omanenâ ka ta je mendreng: eke, Cica, anyin a wale wem. 22A ham könya ta je ûnyi hia thithö hnö Cica: ke ba at ame wâhmakhmetoâ Nokon, ke Kamen thibi; ke ba at ame wâhmakhmetoâ Kamen, ke Nokon thibi, me at minya hnen Nokon hna weny he ka omanenâ kâu. 23Ke e ame hwio ka laten me ba duöngâ, ka habe. Hnahic hnen ta je ecmak adre me wâ ûnyi öbun e wâ: 24anyin a inya oge me ha köbun e se hia ta je perofeta me ta je than adre me bewâ ta je ûnyi öbun e wâ, kʼ adre me ca wâ bi; me belöng ta je ûnyi öbun e long, kʼ adre me ca long bi.
25Ke wâ bi ame todrö ke at ûnö hnanyibu, me cubec e, ka habe, At Ûne lö, ieû hanymök oge me he ka ânyâ e me hu the könya möt ame ca ba balua? 26Ke o ame ha kâu, ka habe, Ieû hna sihnalimen hnyi hnanyibu? hawa ge hnâm hna aû! 27Ke e ame thu, ka habe, U me he ka hnyok ka Than a Khongom ge hnyekom ae bekhöt, me hanom ae bekhöt, me tang hwegiâm ae bekhöt, me oûnykûmâm ae bekhöt; ke u me he ka betenge ge at ae hakekeny köu helâ me u bi. 28Ke e ame ha kâu, ka habe, E wisa hnâm hna thu, mâdrâ thö e, ke u me he ka möt. 29Ke e ame weny he ka hai wisa e bi, me e ame ha kö Iesu, ka habe, Ie at ae hakekeny könya? 30Haba Iesu ame thu, ka habe, Ame he ke at Jeriko ai ûheny Jerusalema; me ame ûkhane me tavat venöu, ke adre me uny jut anyin je ûkhaû, me kot e, me hna ju e, a gʼ ame he but ka mok. 31Me ame he hnyi gethen eling ke at bihut: ke e ame wâ e, me e ame saû thö ka he hnyi ke baten gethen. 32Ke helâe minya ke at Levi, e ame o but kâ e me wâ, me e ame he minya hnyi baten gethen. 33Me ame he but minya ke at Samaria, me o kâu: ke e ame wâ e, me e ame betenge gan, 34me hakekeny kâu, me lan hnân je aat, me hû ge wakaco me waina; ke e ame ip e hon haleny meno, me hom e ka hnyi omtabaga, me ûâ e. 35Ke haba bong nyi, e ame hom li denari, me ham ka at ae tren uma me ha ka habe, U ma tuö e; ke haba hnâm hna he ka ûcû hanen hon e, oge me he ka bi hwaban köu, iny ka o hmetu thö. 36Ûnykûme ju, ia gadrin hnyat a kun ame hakekeny ka at eji a ûkhane me tavat venöu? 37Ke e ame ha, ka habe, Wale at ame betenge gan. Haba Iesu ame ha kâu, ka habe, He thö ka mâdrâ helâe.
38Ke ödrin e he but, me e ame dit ka hnyi ke taun: ke wale ke momo Maretha ien, ame kap e ka hnyi umen uma. 39E hu keiny jia Maria, ke e ame laba hnyi hmele li ca Iesu me long hwan hofuc. 40Ke haba Maretha ame hmak hnyekon ge ta je huliwainy uma; me e ame he kâu me ha, ka habe, Than lö, u me ca ûhykûme bi a ga hia but keik hnö nya he ka hake huliwa? ha thö kâu me me he ka hadruo nya. 41Ke haba Than ame thu kâu, ka habe, Maretha, Maretha lö, u me kong hnyekom me hmak ge ta je ûnyi ae se hia: 42khaca thibi ûnyi ae ûnyi hnathu: ke haba Maria ame hia but ûca ke keihen ae so, wale a gʼ adre me ca he ka hom hmetu gan.
Currently Selected:
Luka 10: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society