Luka 9
9
1E AME hawâ ûkhacaköuâ hnyat a twelv, kʼ ame ham ködrin man, ke he ka muso ta je demoni, ke he ka ohia ta je mok. 2Me e ame kunʼ ödrin he ka khetâ dokhu dokhon Khong, me he ka omelö tavat ae hu mok gadra. 3Ke e ame ha ködrin, ka habe, Ca hom bi ke ûnyi hobi kâu bunyen, ke ca me hom je uci, me tang, me kamec, me mone; ke ca ûsa lo bi ûkot. 4Ke haba uma öbun e he ka dit ka hnyin, laba ju e ke ne o but öbun e he but. 5Haba at ame ca he ka kop öbun, kʼ öbun ka he but ûnyi hnyi taun eling, me jijingâ but kânâiny je hnyeûcabun hnân ohnatho ködrin. 6Me ödrin e he but, me he hnyi wanben je taun, me ödrin e khetâ ûthumetu ae so, me omelö tavat ae hu mok gadra.
7Ke a long ut Heroda than ta je ûnyi adre me ânyâ: me ame hlohlo, anyin ame ha keihen a ga möt hmetu thö Ioane ûnyi hnyi hna mok; 8ke haingen keihen a ga manen dut Elia; ke haingen keihen a ga o hmetu thö ke perofeta kâû adrem. 9Ke haingö Heroda, ka habe, Oge hia but subâ nyi Ioane: ke ie at ang a oge me long gan ta je ûnyi eling? Me e ame elâm he ka iouny mē.
10Ame o hmetu but ta je aposetolo, me ödrin e thumeto e ge ta je ûnyi hia ödrin e mâdrâ. Me e ame hawʼ ödrin, me hum ödrin ka hnyi taun Bethesaida ien. 11Ke e khana but tavat me adre me he hoton: me e ame kap soi ödra, me ha kodra dokhu dokhon Khong, me omelö tavat a ödra mok. 12A sahac ut; me ame o but kâu laten a twelv, haingödrin, ka habe, Kunâ thö tavat ae se hia, mʼ adre me he ka he hnyi je taun, ke ta hnyei igigilo, me mokut, me heleû jeû: anyin a ota ang hnyi hnyebuba. 13Ke e ame ha ködrin, ka habe, Ha ö ʼdra bi öbun. Me ödrin e ha, ka habe, E ba jeû gahmun, ke thabûng thibi ta areto, ke lo li wâ; ohmun a mē he ka ûcû jeû hobi kâu tavat ang ae se hia. 14Anyin a helâ me faiv thauzan obaga. Ke e ame ha ka laten, ka habe, Olabʼ ödra ju helâ me ûsa fifite. 15Me ödrin e ânyâ helâe, me olabʼ ödra hia ju. 16Ke e ame hom je areto a thabûng me li wâ, me bwela hnyi dranyai, me oleâ, me thuthu, me ham ka laten he ka ip hnyi hnyimakan tavat. 17Me adre me han, me ame sekudra hia thö: ke ödrin e hom dö je kolon hna han unyidra, twelv je tang a unöngöt.
18Ke hake e biju ame hic, ke tha e mē laten: me e ame hnei ödrin, ka habe, Haba hna ha hnen tavat gak, me iny ia? 19Ödrin e thu, ka habe, Ioane Bapataiso; ke haba keihen adre me ha, Elia; ke haingen keihen a tot hmetu thö ke perofeta kân adrem. 20E ame ha ködrin, ka habe, Haba ifucibun gak mʼiny ia? Peteru ame thu, ka habe, Keriso a Nokon Khong. 21Ke e ame hûna ködrin me ha, ka habe, Ca ha bi ka ke at ûnyi e; 22e ame ha, ka ʼ habe, Hanymen Nokon at he ka hokhnyokâ ta je ûnyi hia, ke ame he ka hûkötiâ hnen wahingat, me je taben tavat bihut, me hnyat sihnalimen, ke adre me he ka hlingâ, ke ame he ka möt hmetu thö hnyi bong a kuniny. 23Ke e ame ha kodra hia, ka habe, A ne ke at ame weny he ka he hotuk, e so e ame ka hing hokhnyok, me hom anyin satauro hnyi je bong, me he hotuk. 24Anyin a haba at ame beomelö anyin möt, me ame he ka hia e; ke haba at ame hna but anyin möt can inya, me adre me he ka omelö e. 25Anyin a ieû troban ka at, ame ne hu kâu hmeledrany hia, ke ame ka degec me ohia e bi? 26Ke haba at ame he ka hmehma gak me hok ta je hofuc, me ame he bi Nokon at ka hmehma gan, e ka tha o me anyin hing hmanenang, me hmanenanginy Kamen, me ta je angela ae kap. 27Ke e hnathu inya oge me ha köbun, haba keihen adre me tot ang, adre me ca he ka mē mok ke ne o but adre me wâ thö dokhu dokhon Khong.
28Hwaban ta je hofuc eling, ame ne eit ut ta bong, e ame hum Peteru, me Ioane, me Iakobo, kʼ ame ölö hnyi bucen he ka hic. 29Ke e ame tiga hic, me ame ke bongon dut hnyimakan, kʼ ame hau me hadröngöc ûkhaûen. 30Ke wâ bi, li at ödru me ûhnenamö mē, wale Mose me Elia; 31ödru me o hnyi hmanenang, me ûhnenamö anyin mok adre me he ka ohwâdâ hnyi Jerusalema. 32Ke ame ti bemokut Peteru, mödru minya unyin: ke ödrin e hmak hmetu thö, me ödrin e wâ anyin hmanenang, me li at minya ödru me tha tot mē. 33Ke ödru me tiga he but ûhedru unyin, me haingö Peteru ame ha kö Iesu, ka habe, Than lö, e so otin e laba ju ang: ke ohmun e he ka otilâ ke je uma menâ a kun; haba khaca, me hnân hobi köu, ke hobi kö Mose khaca, ke hobi kö Elia khaca: ke ca khanö Peteru bongon hnen hna ha. 34E ame tiga ha hofuc eling, me ame o but ûlâ me tubi ödrin: ke ödrin e ot hnyi ûen ödrin e dit ka hnyi ûlâ. 35Me ame o but hwan hofuc ûnyi hnyin ûlâ ame ha, ka habe, Wale Nokuk a ûcanök: long ju öbun kâu. 36Ame o thö hwan hofuc, me ödrin e hake ō Iesu thiju. Ke ödrin e hnyibi ju me ca ha bi ka ke at hnyi je bong eling ûnyi ödrin e wâ.
37Ke haba nyi, ödrin e hia but utut ûhedrin hon bucen, me ame ûkhane mē, tavat ae se hia hmonyin. 38Ke wâ bi, ame hongot ke at unyin tavat ae se me ha, ka habe, At Ûne lö, inya oge me khöû köu he ka mē wâ nokuk da, anyin ae khaca thibi nokuk: 39ke wâ bi ame kât e hnen hanu me e ame ie hongot hwege; kʼ ame osesebila e, me e ame hûlûhangöc dö, kʼ ame ka bec ut, kʼ ame ca ie didrut gan, me ame ti okongoâ e. 40Ke oge me khöûâ ka lâtâm, mʼ ödrin e he ka obâ e: ke ca khanʼ ödrin bi. 41Haba Iesu ame thu, ka habe, E, dö ame ca labageju bi ke hwali, oge me he ka tha laba möbun, ke hokhnyoki öbun ke ne o but kehö? Hom but jem nokom. 42Ke e ame tiga he, me haba diabolo ame osesebila e me sa hmonyinâ. Me Iesu ame thawâ hanu ae kong, me osoâ da, me ham hmetu e ka kamen. 43Ke haba ödra hia adre me lâiâ man ae gan hmâ maniny Khong.
Ke ödre hia adre me tiga lâiâ ta je ûnyi hia e ame ânyâ me e ame ha ka laten, ka habe, 44E so e didrut je hofuc ang ka hnyi je hnyikönyöbun: anyin adre me he ka hna Nokon at ka hnyi je hnyamen tavat. 45Ke ödrin e ca wâûnykûme bi hofuc eling, ke adre oiyongâ ködrin, wale me me ca khanʼ ödrin: ke ödrin ot he ka hnö e ge hofuc eling.
46Me ame kû thö ivinö gadrin, ia la gadrin ame ho ka beönua. 47Ke haba Iesu ame wâhmakhmeto ûnykûmenen je hnyekudrin, e ame hom dö wanakat me otilâ unyin, 48me ha ködrin, ka habe, Haba at ame he ka kap wanakat ang hnyi iök, me e ame kop nya: ke haba at ame he ka kop nya, ame kap at a kunö nya: anyin a haba at ae ûhnyûkong gabun hia thithö, wale at ae gan.
49Ke haba Ioane ame ha, ka habe, Than lö, ohmun e wâ but ke at ame obâ je demoni hnyi iâm; ke ohmun e thawâ e, anyin a e ame ca he hotutin. 50Ke haba Iesu ame ba kâu, ka habe, Ca thawâ bi e: anyin a haba at ame ca iwahnaihmiony möbun, ame tha hien möbun.
51Ke ame hwân ka o but ûen adre me he ka kap e goranyai, me e ame hwege thö he ka he Jerusalema ai, 52me kunâ je ûthumetu he ka he hnyi hnyimakan: me ödrin e he me o hnyi ke taun anyin at Samaria he ka penapena halubahingen. 53Ke adre me ca kap e, anyin a e ame be he hwege but Jerusalema ai. 54Ke a wâ but e hnen li laten, jia Iakobo me Ioane, me ödru me ha, ka habe, Than lö, e wem ohmu me he ka hawâ meic he ka utut ûnyi hnyi drany he ka thong degeci ödra? 55Ke e ame hwio thö me thawʼ ödru. 56Me ödrin e he but ka hnyi ke taun.
57Ke ödrin e tiga he eû hnyi gethen, haba ke at ame ha kâu, ka habe, Oge me he ka he hotom ka hnyi je dok hia u me he ka he ka hnyin. 58Ke haba Iesu ame ha kâu, ka habe, Haba ta je alope, e hu umo dra op hnyi kânâ, he haba ta je meno ethö e hu hâûödra; ke haba bi Nokon at, me ca hu bi hnân hunen ban. 59Ke e ame ha ka ke at, ka habe, He hotuk. Ke haingen ka habe, Than lö, mē hnö nya thö inye mē he ka konim cica. 60Ke e ame ha kâu, ka habe, Hna but ta je komok he ka konâm je kokidrin; ke he bi thö u ka khetâ dokhu dokhon Khong. 61Haingen ke at, ka habe, Than lö, oge me he ka he hotom; ke mē hnö nya but inye mē he ka ûhûne me anyik lap. 62Haba Iesu ame ha kâu, ka habe, E ba at ame he ka ûcû ka hnyi dokhu dokhon Khong, ame inâ hnyamen ka hnyi hon ûnyi hnân wia kânâ, ke hwio hmetu bi.
Currently Selected:
Luka 9: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society