Luka 11
11
1KE e ame hic hnyi ke dok, kʼ ame um dö, me ame ha kâu ke laten, ka habe, Than lö, ö u nʼ ohmun dö he ka hic, helâji me hnö Ioane hna nâ laten. 2Me e ame ha ködrin, ka habe, Öbun ka he ka hic, me ha thö, ka habe, Cica lö, E so e ka kap iâm. E so e o but dokhom dokhu. 3Ham kohmun hnyi je bong jeû ae ûcû ka hnyi bong bi. 4Thang ut ta je monu gahmun; anyin a ohmun e thang minya tavat adre me okongu ohmun. Ca hum ohmun ka hnyi ûcûbic.
5Ke e ame ha ködrin, ka habe, Ia gabun ae hu hanen, ke ame he ka he kâu hnyi wanbenset me ha kâu, ka habe, Hanok lö, mē ham dö könya kun ta areto; 6anyin ame o but könya ke hanok hnyi anyin bunyen, ke ba jeû gak he ka han; 7ke e ame thu hmetu eiö hnyin uma, ka habe, Ca thaluö nya: adre hia but hlöng hwanuma, ke lakuk dö ang unyik hnyi hna mokut; e ca khanö nya he ka tot me ham köu? 8Haba inya, oge me ha köbun, ka habe, E ka ca he bi ka tot me ham kâu anyin a e hanen, me e ame he bi ka tot me ham kâu ta je ûnyi hia e ame weny, can a gʼ ame sumâtâ ûjengoâ. 9Ke haba inya oge me ha köbun, ka habe, Sumâtâ thö, me adre me he ka ham köbun; elâm dö, me öbun e he ka wâ; seseto thö, mʼ adre me he ka khong ut köbun. 10Anyin ame he ka hu ka tavat adre me sumâtâ; ke haba tavat adre me elâm, me adre me he ka wâ; ke adre me he ka khong ka tavat adre me seseto. 11Ie ke kamen gabun, kʼ ame sumâtâ areto ge nokon, me ame he ka ham bi kâu veto? kʼ ame ne sumâtâ wâ, me ame he ka ham bi kâu on? 12Ke ame ne sumâtâ wakuniny khoto, me ame he ka ham bi kâu sekopio? 13Anyin a wale, a ne mabun tavat ae monu he ka wâhmakhmetoâ hna he ka ham ta je ûnyi ae so ka lakubun, awe, ame ca he bi Kamöbun ethö hnyi drany ka ham Hanu Kap ka tavat adre me sumâtâ e?
14Ke e ame obâ demoni ae hum. Ke ame didrut demoni, me ame fuc dö hum; me ame lâiâ tavat ae se hia. 15Ke haba keihen gadra, adre me ha, ka habe, E ame obâ ta je demoni ûnyi ga Belezebuba, tuhan ta je demoni. 16Ke haba keihen adre me cubec e, me elâm gan ke haten ûnyi hnyi drany. 17Ke e ame wâ ûnykûmen-ödrin, me e ame ha kodra, ka habe, Haba je dokhu ame imouköu, ame he ka ba wan; ke ame he ka kong ut lap ame imouköu. 18A ne imouköu Satana ame he ka kâmâu ka tethmâ dokhon dokhu? anyin a öbun e ha, ka habe, Inya oge me obâ ta je demoni ûnyi ga Belezebuba. 19Ke oge ne obâ ta je demoni ûnyi ga Belezebuba, me ûnyi ga ia ame obʼ ödrin minya hnen lakubun? waleling, mʼ adre me he ka owisʼ öbun. 20Ke oge ne obâ ta je demoni ge banyen Khong, awe, a o but köbun dokhu dokhon Khong. 21A ne tot metâ at ae hwege he ka tuö umen uma, ame he ka mokut wia anyin ta je ûnyi: 22ke e ka o at ae hwege hon e, me ngâ e, me e ame he ka hûgûnâ gan anyin ûnyi hnân vat, waleji e ame labageju kâu, me khenâ anyin ta je ûnyi. 23Haba at ame ca tha hien mönya, me, iwahnaihmiony mönya; ke haba at ame ca tha ûkhöûnâ mönya, me ame vese but. 24E ka didrut hanu ae kong ûheny hnyi hnyin at, e ame he hnyi wanben je dok ae mada, ame heleû hna menâ; ke a ne ca wâ bi, haingen ame ha, ka habe, Oge me he ka hmetu ka hnyi umök uma, waleji oge didrut ûhek hnyin. 25Ke e ame o but, me ame wâ adre hia but aba wia me ave. 26Me e ame he but me bi hanen ge ta je hanu ae kong hon e a seven; ke ödrin e didro me laba eling: ke haba obiny ka at eling ame he ka kong hon a bân. 27Ke e ame tiga ha ta je hofuc ang, me ame fuc hwege ke momo unyin tavat ae se hia me ha kâu, ka habe, Hnahic hnen hnyok adre hnöku u hnyin, me li bai u je ijem. 28Ke e ame ha, ka habe, E beönua bi hnahic hnen tavat adre me long hofuc hwan Khong me vheno e.
29Ke ame hwân ka ûkhacaköu thö tavat ae so hia, me e ame hwân he ka ha, ka habe, Haba dö ang, me dö ae kong: kʼ adre me elâm haten; ke ba haten adre me he ka ham kodra, ke so thibi haten anyi Jona perofeta. 30Anyin a haba Jona, me haten ka at Nineve, kʼ ame he Nokon at ka helâe ka dö ang. 31Ame he momo than hnyi hwaiöu ka tha tot me dö ang hnyi bong owisa, me ha hnaûhangʼ ödra: anyin a e ame he but ûheny hnyi can hmeledrany he ka long metâ anyi Solomona; ke wâ bi, wale bi ang at ae beönua hu Solomona. 32Ame he at Nineve ka tha tot me dö ang hnyi bong owisa, me ha hnaûhangʼ ödra: anyin adre me ietra hnyi hna khetâ hnö Jona; ke wâ bi, wale bi ang at ae beönua hu Jona.
33E ba at ame vâc lamepa, me he bi ka ip e hnyi dok ae iyong, ke hmelen kumete, ke so ame ip hon taben me me wâ thö melaminy tavat adre me didro. 34Haba emâkâm, me lamepainy unyâm: e ka so emâkâm, me ame he ka tha melam hia unyâm; ke e ka kong, me ame he ka tha menekholom unyâm. 35Anyin a wale wâ wia ju wâ e nye lidrut melam eû hnyi hnyekom. 36Anyin a wale, a ne tha melam unyâm, ke a ne ba ke dok ae lit, awe, ame he ka tha melam hia thithö, helâ me lamepa aö umumelam hmonyin ame omelami u. 37Ke e ame tiga fuc me ame hawâ e hnen ke Faresaio he ka tha han mē: me e ame didro, me laba ju. 38Ke haba Faresaio ame wâ, me e ame lâiâ, anyin a ca bân ka soû hnyi ûen ame he ka han. 39Haba Than ame ha kâu, ka habe, öbun je Faresaio, öbun e ânyâwia hoton utkaia me mini; ke haba je hnyekubun, me unöngöt dö ge venöu me ta je monu. 40Öbun je monu, haba at ame mâdrâ hoton, hawa ame ca mâdrâ minya hnyin? 41Ke so bi öbun e ne ham onyen hnyi betenge; awe, ame he ka so ta je ûnyi hia unyibun.
42Ekölö gabun ta je Faresaio! anyin a öbun e ham je ke keihen a libenyitainy minet, me ru, me ta je ûö ae ometu, ke öbun e hna biju hna owisa, ke hnyok ka Khong: e ûcû öbun e ânyâ ta je ûnyi eling, ke ca hna but ta je ûnyi ang. 43Ekölö gabun ta je Faresaio! anyin a webun je taben lap ae nua hnyi ta je sunago, ke he ka nom köbun hnyi ta je hna ûcû. 44Ekölö gabun anyin a öbun ûcû rae ta je erkemok ae iyong, kʼ ame he tavat hon, ke ca khanʼ ödra bi.
45Me ame thu kâu hnen ke at ûnö hnanyibu, ka habe, At Ûne lö, u me ha helâe, me u me haikongu ohmun minya. 46Ke e ame ha, ka habe, Ekölö gabun minya hnyat ûnö hnanyibu! anyin a öbun e ip hon tavat je hok ae hmak he ka hijen, ke haba öbun, me öbun e ca mâdrâ bi ge ke banyöbun a khaca. 47Ekölö gabunʼ anyin a öbun e up veten je erkemok hon ta je perofeta, ke a hlingʼ ödrin hnen lakam-öbun. 48Awe, öbun e ohnathoâ, me ogâ hwakecin lakamöbun: anyin adre me hlingʼ ödrin, ke öbun e otilâ ta je hudrin. 49Anyin a wale, ame ha hnen metâ anyin Khong, ka habe, Oge me he ka kunâ kodra ta je perofeta me ta je aposetolo; ke adre me he bi ka hlingâ me okongoâ keihen; 50mʼ adre me he ka hnö dren ta je perofeta hia thithö unyin dö ang, waleji adre me hingâlâ hwân hnyi hna bi taben hmeledrany; 51hwân ge drö Abela ke ne o but ka dro Zakaria, at adre me hlingâ hnyi wanben taben hut me dok ae kap: eke, inya oge me ha köbun, adre me he ka hnö e unyin dö ang. 52Ekölö gabun hnyat ûnö hnanyibu! anyin a öbun e hia but hom kiiny metâ: kʼ öbun e ca dit bi ka hnyin, ke öbun e thawâ minya tavat adre me ke ka didro.
53E ame didrut ûheny e, ke haba tavat sihnalimen ke ta je Faresaio adre me hwân he ka ûjengö e, me hnö hmönyinâ e ge ta je ûnyi ae se hia; 54adre me tuö e, mʼ adre me he ka kât ge ke hofuc ûnyi hnyi hnyimen.
Currently Selected:
Luka 11: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society