Énkjínkón 20
20
Néná boá xi tsoꞌbátjónná
1Binoo̱ ko̱jo xaán kjo̱a̱xti ꞌboxiéná,
kó ta̱ꞌyaní xi ta̱ngatꞌanii̱ kui nii̱ nga ndajín sa̱ꞌín,
jmí tsi xota̱ xi kjínkón xi bo̱a̱ sa̱ꞌiín.
2Kjiꞌanga tsꞌénxchán nda̱ ree̱, xikó maá nga kjandayà ngo xandi̱je̱,
kó xi ta̱ngatꞌanii̱ kui nga tsꞌénxchán, yojoo̱ boá xi tsꞌénjo̱.
3Xota̱ xi chꞌoo̱ kjo̱a̱xtii̱, achichí yandikón,
ta̱nga xota̱ xi kitikjo̱a̱a̱, kuí boá tsjaa kjo̱a̱xtii̱.
4Xota̱ xi tsiꞌeé tsꞌénxájín ni̱xtjin nga ma cho̱nchꞌàn,
kó nga fochó cho̱ndoboaá sakójiín nichinie.
5Ni xi tsꞌénkjó ngi̱jin ini̱ma̱a̱ xotaa̱,
xikó maá nínga na̱nga̱a̱ ndáchíkoón,
kó ta̱ ngo tsí xota̱ xi kjínkoón xi ka̱maa̱ sku̱i̱e̱ kui nii̱.
6Achichí má xi xota̱ xi ndaxota̱ ndyi̱tsoó yojoo̱,
ta̱nga nde ngojín xi sa̱ko̱ó xota̱ xi ka̱ma ka̱maꞌniátakón.
7Xota̱ xi kixi̱i̱, tsjie tsꞌén síndo,
kó achichíra̱ tsjaa̱ ndí xi ki̱a̱ ndyi̱fítji̱ngii̱ ni xi tsꞌén.
8Kjiꞌanga nda̱ ree̱ ꞌbíjñasón yáxíríe̱ nínga ꞌbítꞌajé xotaa̱,
ta̱ kotsijen tsí kó tsꞌenkjié ni xi ndajiín.
9Nde ngojín xota̱ xi ka̱ma bo̱a̱ ka̱tso̱
nga je katsꞌéntsjie ini̱ma̱a̱ ko̱jo nga jmíjéjiín.
10Jó má ni xi achichí chꞌoó Néná:
baskula̱ chejeé,
ko̱jo ni xi chꞌíchi̱bo̱a̱ xi bo̱a̱jín kjiꞌi.
11Ta̱ngatꞌanii̱ ni xi tsꞌén ngo nda̱
nga yà tsi kixi̱ ko̱jo tsi tsjie tikón.
12Jó má ni xi katsꞌénda xi katsjáná Néná:
tji̱bo̱a̱nijón tsi̱ꞌe̱ nga ku̱i̱ntꞌiè,
ko̱jo ndyikón tsi̱ꞌe̱ nga sku̱i̱e̱.
13Tsi ta̱soboá tsjáfé jí, ni̱ma̱ tsꞌén ku̱i̱ndyin ji.
Ta̱sá tindyie ndyikin, kó jmíni̱xtjin xcha̱jaa̱ nichinie.
14Xota̱ xi ꞌbotsie nii̱, ndajín ni xi tsꞌatsie an tsó,
kó ngije tsꞌatsie kui nii̱, achichí tsjá maá kjo̱a̱a̱ ni xi tsꞌatsie.
15Achichí to̱nsinié ko̱jo ndi̱jo̱ tsjakon tjín kuí nga̱sondiee̱,
ta̱nga jmíjín ingo ni xi ꞌniú chjínií,
xikoó kjo̱a̱bokoyaá xota̱ xi kjínkoón.
16Chjábée̱ ńjño xi ku̱i̱ꞌíjñangini
ngo xi tsja̱a tsꞌoa nga kui ku̱i̱ꞌíchjí
to̱n xi ntsjieén ngo xota̱ xi kje̱ꞌe,
kó kui ńjñoo̱ xi ngasꞌijñangini kui to̱o̱n.
17Achichíra̱ nda xi̱ni̱e̱e̱ nichinie
xi katsꞌén ngo nda̱ nga tsꞌenṉcha̱,
ta̱nga nga fetꞌani xikoó tsi tsomí ka̱ma ngi̱ya tsꞌoa.
18Ngo kjo̱a̱botíxoma xi nda tꞌentji̱ngi ji, kjiꞌanga kꞌuínde ngo ni,
kó tsi̱ꞌe̱ nga xcha̱jàjín ji ngo kjo̱a̱xchán, tꞌínde ji kótsꞌèn nga si̱ꞌinni ji.
19Xota̱ xi see̱n ényaà, tsóyà ngo ni xi tjiꞌmá,
ngatꞌa̱ ki̱a̱jín niꞌínkamaje̱ ji xota̱ xi see̱n ényaà.
20Kui ndí xí chꞌo ka̱tso̱o̱ na̱ꞌmii̱ ko̱jo na̱aa̱n,
bo̱a̱ ka̱maa̱ xikoó ngo ndiꞌí xí inda inda ꞌbo nínga jñoó.
21Kjo̱a̱cho̱n xi tsá ko̱jo xi niꞌínjín sakóná nga tjón tjón,
jmí kjo̱a̱tsja tsjájínná nga fetꞌanii̱.
22Ngata̱ bo̱a̱jín sé nga ji xi si̱ꞌingojo ji,
ta̱sá chiyée̱ nga Néná xí bo̱a̱ sa̱ꞌín,
kó kuí boá xi kꞌo̱xiéꞌaá.
23Néná achichí chꞌoó baskula̱ chejeé
kó nisochi̱bo̱a̱ chejeé, ndajínkjiꞌi.
24Néná boá xi tjiyátsjà ndi̱ya̱à kjo̱a̱mindyioo̱n xotaa̱,
kó xotaa̱ kótsꞌèn ka̱makjínnii̱ kui ndi̱ya̱à.
25Ndikón kjíꞌí nga xotaa̱ tsá ku̱i̱chji̱a̱
ngo ni xi sa̱ꞌínkjatjosoón Néná,
ngatꞌa̱ jaskan sa̱ꞌínkjó, kó sa̱ꞌínkjatjosónjín.
26Nda̱ re xi kjínkoón ki̱a̱ ꞌbojmi nínga ꞌyo
to ndso̱ko̱a̱n ṉño̱paa̱n xota̱ xi ꞌniú ndajiín,
kósꞌe̱ tsꞌénkjáꞌanié ndi̱jo̱je ńtsoó molinoo̱.
27A̱siénni̱xtjin xi Néná katsjaá xota̱ nga̱sondiee̱,
kuí boá xi xikoó ngo ndiꞌí xí tsꞌénkjién Néná
nga kotsijennii̱ ngaskande ngi̱jin ini̱ma̱a̱ xotaa̱.
28Nda̱ ree̱ achichí ꞌniú ꞌbíjñá xá xí tjiín,
kjiꞌanga kixi̱ tikón ngindyi̱ko̱n Néná,
ko̱jo kjiꞌanga nda tsꞌénjo̱ xota̱ na̱xi̱ńdaá.
29Ngaꞌniú xí tjiín jáxóngo̱ó boá xi kjo̱a̱nkꞌakoo̱n,
ta̱nga tsja̱ tiboaa̱ xota̱ xi xchaá boá xi kjo̱a̱yandikoón.
30Nga foáná, tsꞌénꞌónná, ta̱nga foaꞌáxín ni xi ndajiín,
kó kjo̱a̱botíjeé boá xi tsꞌéntsjie ini̱ma̱a̱.
Currently Selected:
Énkjínkón 20: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014