Énkjínkón 21
21
Ngatꞌiéná kjo̱a̱ni̱ma̱takón ngindyi̱ko̱n Néná
1Ngi̱ya tsja Néná, ini̱ma̱a̱ ree̱, xikónií ngo ndejèꞌ,
xi fí ndi̱yà xí mejeén Néná nga ko̱e̱je̱.
2Xota̱ nga̱sondiee̱ sꞌijin maá nga ndakjiꞌi ngayeje ni xi tsꞌén,
ta̱nga Néná boá xi kotsijee̱n ni xi mejeén sa̱ꞌín.
3Kixi̱ ti̱ꞌin ji, ko̱jo kixi̱ ti̱ꞌinje̱ ji xotaa̱,
ngatꞌa̱ kuí nii̱ xi tsja ma ngasee̱ Néná,
ta̱bo̱a̱jiín kjo̱a̱tjó xi niꞌánkꞌasꞌiee̱n kui.
4Jé boá kui nii̱:
nga nkꞌakon ko̱ꞌna̱xié yojoná,
nga kjínkón ko̱ꞌna̱xié yojoná,
ko̱jo nga si̱ꞌankjó xikoó xota̱ xi ꞌniú ndajiín.
5Tsi nda si̱ꞌinkjé jí ni xi si̱ꞌin ji,
achichí ni xi nda kꞌuieé,
ta̱nga tsi ta̱xkiya si̱ꞌin ji ngo ni,
ni̱ma̱ tsꞌén ku̱i̱ndyin ji.
6Kjo̱a̱cho̱n xi kasako ta̱ngatꞌanii̱ nga ikꞌíndisoo̱,
ta̱ ni xi tsꞌénkjiín kjo̱a̱kjínkoón
xota̱ xi mongase kjo̱a̱bo̱yaa̱ tsí bo̱a̱.
7Xota̱ xi ꞌniú ndajiín, ti̱kuíní ni xi ndajín xi ndyi̱tsꞌèn xí sa̱ꞌínkjié,
ngatꞌa̱ kamámejénjiín nga ni xi kixi̱ sa̱ꞌín.
8Ndi̱ya̱à xota̱ xi ꞌniú ndajiín, ńkjá ngájén,
ta̱nga ndi̱ya̱à xota̱ xi kixi̱i̱, kixi̱ boá.
9Ndakjiꞌi ngase nga ngo ngi̱ndyióngi̱nijoo̱n ndi̱tsee̱n ku̱i̱ndyión,
ta̱bo̱a̱jiín tsi ngo chjo̱on xí tamá
ku̱i̱ndyionjo̱ ngo ngi̱ya ndiꞌa xi tiyá.
10Ini̱ma̱ xi ꞌniú ndajiín ta̱ngongá ni xi ndajín xi mejeén sa̱ꞌín xi tsꞌénkjó,
kó nde ni̱ma̱jín maa̱ xota̱ xi ngasee̱.
11Kjiꞌanga niꞌánjeé xota̱ xi mojnókiee̱,
xota̱ xi chi̱nii̱, xota̱ xi kjínkón má,
kó kjiꞌanga niꞌánchji̱ni̱e̱ xota̱ xi kjínkoón,
ta̱tra maa̱ ni xi bokoyaá.
12Xota̱ xi kixi̱i̱, kotsijee̱n
ndiꞌaa̱ xota̱ xi ꞌniú ndajiín,
kó be kótsꞌèn ni xi ndajiín tsꞌenkjié.
13Xota̱ xi tsꞌensénjiín xota̱ ni̱ma̱ xi ni̱ma̱ tsó nga ko̱si̱ko̱joo̱,
ti̱nde kui si̱ꞌansénjiín kjiꞌanga kui ku̱i̱ꞌa nga ko̱siko̱jo.
14Kjiꞌanga ngo ni xi ta̱ boeꞌéná,
kó nga ꞌma boeꞌéná, tsꞌénkꞌíxió ngaskande kjo̱a̱tamá xí ꞌniuú.
15Achichí tsjá maá xota̱ xi kixi̱i̱
kjiꞌanga kixi̱ tsꞌén niꞌánseén xotaa̱,
¡ta̱nga xota̱ xi ꞌniú ndajiín ngaskande fotsiéndíkón má!
16Xota̱ xi ꞌbijñámasien kjo̱a̱kjínkoón,
ki̱a̱ kjo̱chó ngi̱jii̱n xota̱ xi je jesoón.
17Xota̱ xi ta̱soboá sꞌué, ko̱jo ndásíje̱n, ko̱jo kjo̱a̱chꞌi̱ tsꞌénkjó,
achichí ni̱ma̱ tsꞌén kꞌuijñá, kó jmíni̱xtjin ka̱macho̱n.
18Ni xi ndajín xi ka̱maa̱ xota̱ xi kixi̱i̱, xota̱ xi ꞌniú ndajiín boá xi ku̱i̱ꞌíchjí,
kó kjo̱a̱ni̱ma̱ xi tsoboaá xota̱ xi kixi̱i̱, xota̱ xi ꞌniú ndajiín boá xi ꞌbókanieé.
19Ndakjiꞌi ngase nga ku̱i̱ndyion so̱bo̱a̱ ngo ngi̱ndie xi kixí,
ta̱bo̱a̱jiín tsi ngo chjo̱on xí tamá, ko̱jo xi kjo̱a̱xti tsja̱aná xí ku̱i̱ndyionjo̱.
20Ndiꞌaa̱ xota̱ xi kjínkoón, tjín kjo̱a̱cho̱n ko̱jo ndásíje̱n,
ta̱nga ndiꞌaa̱ xota̱ xi chi̱nii̱, ta̱ tjíniꞌánkjatsón kjo̱a̱nda ni.
21Xota̱ xi fítji̱ngi kjo̱a̱kixi̱i̱ ko̱jo kjo̱a̱ni̱ma̱takoón,
kuí boá xi sa̱ko̱ó kjo̱a̱mindyion,
ko̱jo kjo̱a̱kixi̱ ko̱jo kjo̱a̱yandikón.
22Nda̱ xi kjínkoón tsꞌéntsi̱ꞌe̱ na̱xi̱ńdáꞌniú xí nda tjíchjáꞌyaá,
kó ꞌbojmi xó xí tjíchjáꞌyáni xi kjimaꞌniátakón kui xotaa̱.
23Ini̱ma̱ xi koo̱n tsꞌoa ko̱jo na̱je̱n,
jmíni̱xtjin kꞌuieé kjo̱a̱xti.
24Xota̱ xi mojnókie ꞌmií, xota̱ xi nkꞌakoo̱n ko̱jo xi je ꞌboxié yojoo̱,
kui xi je jaꞌatjoón nga nkꞌakon ma.
25Xota̱ xi tsiꞌeé ngayeje ni xi mejeén,
ta̱nga mejénjiín tsꞌénxá.
26Tjín xota̱ xi nga ngo ni̱xtjii̱n nga mejeén ngo ni,
kó xota̱ xi kixi̱i̱, nde onjín maá nga tsjá ngo ni.
27Achichí chꞌoó Néná kjo̱a̱tjó
xi tsꞌenkꞌásꞌién xota̱ xi ꞌniú ndajiín,
kó ngase má nga ndajín tsꞌén tsꞌenkꞌásꞌién.
28Xi ntꞌieé chistiko̱ ndisoo̱, si̱ꞌankjie,
ta̱nga xi ntꞌieé kjo̱a̱botíxoma xi ndaa̱,
ngatsjéni̱xtjin kꞌuijñá.
29Xota̱ xi ꞌniú ndajiín ja̱ma xi nda síndo maa̱ kui,
ta̱nga ta̱kuítsí xota̱ xi kixi̱i̱ xi ja̱koxi̱ nga nda ꞌbíndo.
30Ngindyi̱ko̱n Néná jmíjín ngo kjo̱a̱kjínkón xi chjínií,
ko̱jo tsi ngo kjo̱a̱kjíntakón, ko̱jo tsi ngo kjo̱a̱botíxoma.
31Jájuún boá xi tsoboaá nga ku̱i̱ꞌíndonda ndi̱je̱ kjo̱a̱xcha̱án,
ta̱nga Néná boá xi bo̱a̱ ka̱tso̱, ꞌyání xi tsja̱á nga kui xi sa̱ꞌín.
Currently Selected:
Énkjínkón 21: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014