Énkjínkón 19
19
Xota̱ xi kjínkoón ntꞌieé kjo̱a̱botíxoma
1Chjí ngasenii̱ nga xota̱ ni̱ma̱ xi kixi̱ ka̱má,
ta̱bo̱a̱jiín tsi xota̱ xi kitikjo̱a̱ ko̱jo tsi xi ta̱xkiya chji̱a̱ ka̱má.
2Ndajín kjiꞌi kjo̱a̱a̱ ini̱ma̱ xi jmíjiín kjo̱a̱kjíntakoón,
kó kjiꞌanga xi tsá xi boaꞌa niꞌán ngo ni, ndajín fotjo.
3Kjo̱a̱kitikjo̱a̱a̱ boá xi tsꞌénchájá ndi̱ya̱à xotaa̱,
kósꞌe̱ Néná tsꞌénxchánjo̱ nga bósieén ni xi maa̱ ngijee̱.
4Xota̱ xi cho̱o̱n achichí amingo̱ ꞌbeé,
kó xota̱ xi ni̱ma̱a̱ ngaskande xota̱ xi amingoo̱ fotjoxíntꞌaa̱.
5Chistiko̱ ndisoo̱, chjiéngá ka̱majeé,
kó xota̱ xi éndísó chji̱a̱a̱, kjo̱tjongijiín yojoo̱.
6Achichí má xota̱ xi mongase kjo̱a̱ndaa̱ xota̱ xi nda ini̱ma̱a̱,
kó ngayeje xotaa̱ xi mongase nga nda ko̱a̱ꞌa, nda̱ xi tsie ni tsjaá.
7Ngayeje já ntsꞌi̱e̱ xi xota̱ xi ni̱ma̱a̱ tsꞌenchꞌó, ngatꞌa̱ jmí to̱njiín
¡kó ngaskande já amingoo̱ tsꞌénkjin yojoo̱!
Mongase kó ka̱tso̱o̱ tsi̱ꞌe̱ nga kji̱ndi̱bá nginí, ta̱nga ngiti̱ jmí én sakójiín.
8Xota̱ xi tjiín kjo̱a̱kjíntakón, tjórií ini̱ma̱a̱,
xota̱ xi chíyájiín ni xi je akakoyaá, achichí nda kꞌuijñá.
9Chistiko̱ ndisoo̱, chjiéngá ka̱majeé,
kó xota̱ xi éndísó chji̱a̱a̱, si̱ꞌankꞌien.
10Xikótsꞌèn ndajín ya nga ngo nda̱ kitikjo̱a̱ kꞌuijñá xikoó tsi cho̱n,
ti̱ bo̱a̱ ti̱ tsꞌén ndajín ya nga ngo moso̱ ko̱tíxomaa̱ ree̱.
11Kjiꞌanga nda tsꞌénkjó ngo xota̱,
kuí boá kui nii̱ xi tsꞌénkjáꞌajenda kjo̱a̱xcha̱án,
kó kjo̱a̱yandikoón kjo̱a̱niꞌánjetakoón boá.
12Kjiꞌanga tsꞌénxchán nda̱ ree̱, xikó maá nga kjandayà ngo xandi̱je̱,
kó kjo̱a̱ndaa̱, xikónií xoño xi bixó ngi̱jin kꞌijñaá.
13Ndí xí kitikjo̱a̱a̱ achichí kjo̱a̱ni̱ma̱ tsꞌénkjáꞌa na̱ꞌmii̱,
kó ínchjín xí kjánjo̱ xi̱ꞌii̱n, xikó maá ngo ni xi tjítín síkijí.
14Ndiꞌaa̱ ko̱jo kjo̱a̱cho̱o̱n, ni xi ꞌbijñáná xi xcháná boá,
ta̱nga kui chjo̱on xí kjínkoón, ni xi ta̱ katsjáná Néná boá.
15Kjo̱a̱tsiꞌeé tsꞌénkáfétjénná,
kó ini̱ma̱ xi tsiꞌeé kjindiá kjo̱a̱ꞌa.
16Xota̱ xi tsꞌénkjátjosón kjo̱a̱botíxomaa̱, ini̱ma̱a̱ xí tsꞌénjo̱,
kó xi kónjiín ni xi tsꞌén, ko̱yà.
17Xota̱ xi tsꞌénkíyaà to̱n xota̱ xi ni̱ma̱a̱,
xikónií tsi Néná xí tjítsꞌénkíyaá.
¡Kó kui kjo̱a̱ndaa̱ Néná ku̱i̱ꞌíchjí nginií!
18Ti̱ꞌinchji̱ni̱ ji ndíi̱ tji̱e̱nga ka̱ma ngase si̱ꞌanchji̱ni̱e̱,
ta̱nga ini̱ma̱a̱ ngata̱ tsꞌenkꞌiénjín nga bo̱a̱ sa̱ꞌín.
19Xota̱ xi ꞌniú tsꞌénxchaán, ku̱i̱ꞌíchjí kuí nii̱,
ka̱májín si̱ꞌankjaꞌajenda,
ngatꞌa̱ ta̱sá má ꞌniú ngase sa̱ꞌínxchán.
20Tasínijìi̱n kjo̱a̱botíxomaa̱,
kó tsjangatamaa̱ nga si̱ꞌanchji̱ni̱e̱e̱,
tsi̱ꞌe̱ nga xota̱ xi kjínkón ka̱ma ji nga ka̱maxchá jí.
21Achichí má ni xi ꞌbínda nga sa̱ꞌín ngo xota̱,
ta̱nga kjo̱a̱botíxomaa̱ Néná boá xi kꞌuijñá ngatsjéni̱xtjin.
22Achichí tsjá maa̱ xota̱ xi tjiín kjo̱a̱ni̱ma̱takón,
chjí ngasenii̱ nga xota̱ xi ni̱ma̱ ka̱má,
ta̱bo̱a̱jiín tsi xota̱ xi ndiso ka̱má.
23Tsi ndyi̱yandikón Néná, kuí nii̱ xi tsja̱aná kjo̱a̱mindyion,
kó tsjatsꞌèn ku̱i̱ndyión nga jmí ni ka̱májínná.
24Xota̱ xi tsiꞌeé tsangijin tsja ngi̱ya ti̱bo̱a̱a̱,
kó ngaskande é maá nga skji̱ni̱e̱ nichiniee̱.
25Ti̱ꞌinjée̱ xota̱ xi mojnókiee̱, kó bo̱a̱ tsꞌén nga tsjièndíkón xota̱ xi chi̱nii̱,
kó tsi si̱ꞌinchji̱ni̱ ji xota̱ xi kjínkoón, kꞌuié ngasee̱ kjo̱a̱kjíntakón.
26Ndí xí tsꞌénchéjeé na̱ꞌmii̱, ko̱jo xi mongatji̱ngii̱ na̱aa̱n,
ndí xí tsjá kjo̱a̱soboá, ko̱jo xi ndajín boá.
27Ji ndí, tsi si̱ꞌinsénjín nga tjín xí sa̱ꞌinchji̱ni̱e̱e̱,
tiniꞌínkjinríi̱ yojòo̱ kjo̱a̱botíxoma xi tsjá kjo̱a̱kjínkoón.
28Chistiko̱ xi ꞌniú ndajiín, mojnókie kjo̱a̱kixi̱i̱,
kó én xí chji̱a̱ xota̱ xi ꞌniú ndajiín ko̱óꞌmá ni xi ndajiín.
29Jè tikónda kjo̱a̱botíjé tsi̱ꞌe̱ xota̱ xi mojnókiee̱,
kó ti̱ jè tikónda ńꞌniú xí kjónié nga̱xto̱n xota̱ xi kitikjo̱a̱a̱.
Currently Selected:
Énkjínkón 19: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014