Énkjínkón 18
18
A ni xi nda ko̱e̱ꞌeé, axa̱ si̱ꞌanjeé, jí xí yé ji
1Xota̱ xi ndikonkoón,
ta̱ ni xi nda maá kuí tsí xi mongase,
kó chꞌo maa̱ nga tjín xí tsjaá ngo kjo̱a̱botíxoma xi nda.
2Xota̱ xi kitikjo̱a̱a̱ tsjajín maá kjo̱a̱kjínkoón,
ta̱kuítsí ni xi tsꞌénkjó kuí, xi mejeén bokó.
3Ni xi ndajiín, kjo̱a̱soboá tsjáná,
kó kjo̱a̱nkꞌakoo̱n boá xi tsꞌén nga ngiti̱ yandikónjínná.
4Én xí chji̱a̱ xotaa̱, xikónií ndáfoa xi tjín nínga ꞌniú na̱nga̱a̱,
ta̱nga kjo̱a̱kjínkoón, kuí boá xi xikoó ndáfoa xi jmíni̱xtjin fe.
5¡Ndajínkjiꞌi, nga kꞌuiyá nga jmíjéjiín, xota̱ xi ꞌniú ndajiín,
ko̱jo nga chje̱ꞌéxiín kjo̱a̱nda xi tjiín xota̱ xi kixi̱i̱!
6Kjiꞌanga chji̱a̱ xota̱ xi kitikjo̱a̱a̱, kjo̱a̱xti boá xi mongase,
kó kjo̱a̱a̱ ni xi chji̱a̱ boá nga ka̱ma kjoánií.
7Kjiꞌanga chji̱a̱ xota̱ xi kitikjo̱a̱a̱, ti̱kuíní yojoo̱ xi ndajín tjítsꞌeén,
kó kjo̱a̱a̱ kui nii̱, ti̱kuíní ini̱ma̱a̱ xi tsꞌénꞌbijñaá ngo chja̱ya̱.
8¡Xikó maá tsi ixi eén xota̱ xi see̱n ényaà,
ta̱nga ngaskande ngi̱jin ini̱ma̱ná fóchó!
9Xota̱ xi tsiꞌeé ko̱jo xota̱ xi tsꞌénkjátsón nii̱,
¡ngaskande xikó maá tsi ngo ntsꞌi̱e̱ ma xkjín!
10Jaꞌeén Néná, kuí boá xi xikoó ngo tarié xi ꞌniú tikón,
kó ki̱a̱ boá nínga fí manga manga xota̱ xi kixi̱i̱,
nga mongase nga ko̱si̱ko̱jo.
11Xota̱ xi cho̱o̱n tsꞌénkjó nga kjo̱a̱cho̱o̱n,
kuí boá xi xikoó ngo na̱xi̱ńdáꞌniú xí xó tjíchjáꞌyáni,
nínga jmíjín xi ni xi ndajín ka̱ma sa̱ꞌínjo̱.
12Kjo̱a̱nkꞌakoo̱n tsꞌénchájáná,
kó kjo̱a̱ni̱ma̱kjo̱a̱a̱ boá xi tsꞌén nga yandikónná.
13Kjo̱a̱chi̱ni ko̱jo kjo̱a̱soboá boá,
nga tjón ta̱xkiya ko̱ndókjo̱a̱ ngo ni ngindiee̱ nga ko̱nda̱ꞌyá.
14Xota̱ xi oo̱n, kjo̱a̱ꞌniútakoón boá xi sa̱ꞌínkjastjíe̱n,
ta̱nga xota̱ xi xkꞌién tsoꞌbaá, ꞌyá xí sa̱ꞌínkjastjíe̱n.
15Xota̱ xi makjiín sakoó kjo̱a̱kjínkoón,
kó xota̱ xi nda bosiénníjoón, tsie ngase ni xi ka̱makjiín.
16Tsi ngo ni xi ndakjiꞌi ta̱ tiboeꞌé jí,
ngayeje xotaa̱ nga tsja ka̱maa̱ nga sa̱ꞌínjo̱ꞌoo̱,
¡ngaskande xota̱ xi ꞌniú ndikoón,
skjíxꞌaá nga̱ntjo̱a̱ ndiꞌaa̱!
17Xota̱ xi tjón ꞌboxiéꞌá yojoo̱,
kjanyá nga kuí boá xi jmíjéjiín tsó,
ta̱nga nga fochó chistikoo̱,
kuí boá xi tsꞌentsíjen nga bo̱a̱jín kjiꞌi ni xi katsó.
18Kjo̱a̱chꞌáṉchaa̱ boá xi tsꞌenkjié kjo̱a̱xtii̱,
kó kuí nii̱ xi ko̱ko̱ó ni xi sa̱ꞌín xota̱ xi tjiín ngaꞌniuú.
19Kui ntsꞌie xi ndajín kasasiee̱n ngo ni, tajá ngase má, ta̱bo̱a̱jiín xoó ngo na̱xi̱ńdáꞌniú,
kjo̱a̱xtii̱ kja̱xín kja̱xín ꞌbijñáná, xikó maá nga̱ntjo̱a̱a̱ ngo ndo̱bo̱a̱xa̱á.
20Ni xi kjo̱tjoo̱ tsꞌoa xotaa̱, kuí boá ni xi sa̱ꞌíntsiee̱,
sa̱ꞌíntsie cha̱n cha̱a̱n ni xi ku̱i̱chji̱a̱.
21Najee̱n tjínrií ngaꞌniú
tsi̱ꞌe̱ nga tsjá kjo̱a̱mindyioo̱n, ko̱jo tsi kjo̱a̱bo̱yaa̱,
kó xota̱ xi tjó maá kui nii̱,
ti̱kuíní xi sa̱ꞌínjo̱ yojoo̱.
22Xi je kasakoo̱ chjo̱on xí tikónjo̱,
jè ngo ni xi nda je kasakoo̱,
¡kó ja̱ jè kasakoo̱ kjo̱a̱ndaa̱ Néná!
23Xota̱ xi ni̱ma̱a̱, ata̱ ni̱ma̱ tsó nga chji̱a̱,
ta̱nga xota̱ xi cho̱o̱n, achichí tajá chji̱a̱.
24Tjín amingo̱ xi jmí tsi amingo̱,
kó ti̱ tjín amingo̱ xi ta̱bo̱a̱jiín tsi ngo ntsꞌié má.
Currently Selected:
Énkjínkón 18: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014