Matioo̱ 2
2
Bi̱ tsꞌén kijíkatsijee̱n já kjínkoón ndí ndí Kjisoo̱
1Ngije katsen Kjisoo̱ ki̱a̱ Belee̱n, ndí na̱xi̱ńdáꞌniú xí chji̱a̱ni nangi Jundea̱, ni̱xtjin nga atíxoma nda̱ re Erondee̱ ngayeje kui na̱xi̱ńdaá, jachó na̱xi̱ńdáꞌniú Jerusale̱n já kjínkón xi kjindibáni xtji̱e̱e̱n nínga fotjo tsꞌueé, 2kó bi̱ katsó nga asíyá:
–Ñá tikón re xi tsi̱ꞌe̱ xota̱ jundío̱ xi je katsee̱n. Ngatꞌa̱ kamáyà ji̱n nga jatjo ńñoo, xtji̱e̱e̱n nínga fotjo tsꞌueé, kuíni nga jéꞌe̱niꞌándikón ji̱n.
3Nga tsintꞌié kuí nii̱ nda̱ re Erondee̱, achichí nda̱ kamaá kui ko̱jo ngayeje xota̱ na̱xi̱ńdáꞌniú Jerusalee̱n. 4Kó ngije ítikó ngayeje já ngito̱ko̱o̱ chináꞌmii̱ ko̱jo já chji̱ni̱e̱kjo̱a̱kitii̱ na̱xi̱ńdáꞌniuú, asíyaá ñání bo̱a̱ nga katsen Kristoo̱. 5Kó kui jaá, bi̱ katsoó:
–Belee̱n boá nínga katsen, ndí na̱xi̱ńdáꞌniú xí chji̱a̱ni nangi Jundea̱, ngatꞌa̱ bo̱a̱ tsꞌén ítꞌa xo̱jo̱n nda̱chji̱ni̱e̱ꞌe̱én Néná, nga bi̱ katsoó:
6Kó ji Belee̱n, ndí na̱xi̱ńdáꞌniú xí chji̱a̱ni nangi Jundea̱,
jijín xi ꞌniú chichí ji ngi̱jii̱n xtitjón xi chji̱a̱ni nangi Jundáa̱.
Ngatꞌa̱ kꞌi̱e̱ kjo̱tjojii̱n ngo xi ko̱si̱e̱ntjón,
xi ku̱i̱e̱jeén ndi̱yà xota̱ na̱xi̱ńdána xi chji̱a̱ni Israee̱l.
7Kósꞌe̱ Erondee̱ tsíchji̱a̱ꞌmajo̱ já kjínkoón, kó asíyá cha̱n cha̱a̱n kui jaá ni̱xtjin nga kamáyà ńñoo, 8kó katsangiya kui jaá ndí na̱xi̱ńdáꞌniú Belee̱n, kó bi̱ katsoó:
–Tangínjnú ki̱a̱, kó tasíyàjnú ngayeje ni kjo̱a̱a̱ kui ndií, kó ngije xcha̱jnú tꞌíyájnúꞌun tsi̱ꞌe̱ nga ko̱jo an kjuíntsꞌendíkón án nga.
9Kó kui jaá ngije tsintꞌieé nda̱ ree̱, kijí. Kó ńño xi kamábe nga jatjo ki̱a̱a̱ kijítjoón, ngaskande nga kasasien kui ńñoo nínga tikón kui ndií. 10Nga kamábe kui ńñoo achichí tsja kamaá. 11Kó nga tsꞌasꞌien ngi̱yaa̱, kamábe ndí ndií ko̱jo na̱ Riya̱ na̱aa̱n ndií, kó asiéntikoó kui jaá, kó katsꞌéndikón, kó iskjíxꞌá koxa̱a̱, kó tsꞌaxié ni xi ndyi̱yaꞌaa̱ ndií:
Ngo xi yaꞌaa̱ to̱nsinié, ngo xi yaꞌaa̱ nisije̱n xi niꞌánkjién nga niꞌándikón Néná, ko̱jo ngo xi yaꞌaa̱ ndásíje̱n chjí xí ꞌmí mirra̱. 12Kó ngi̱jin ńjñaá kui jaá kiꞌmíyaà nga ngiti̱ ki̱a̱jín ko̱e̱je̱ nínga tikón nda̱ re Erondee̱, kósꞌe̱ kje̱ꞌe ndi̱yà kijí nga kijí nginí nangii̱.
Bi̱ tsꞌén kijíjo̱ xi xchaá Kjisoo̱ xtji̱e̱e̱n Ejipto̱
13Kó ngije kijí já kjínkoón, ngo ndítsjiee̱ Néná jeꞌechji̱a̱jo ngi̱jin ńjñaá Kosiee̱, kó bi̱ katsoó:
–Ti̱sítji̱n ji, kó ti̱yíje̱ ndií ko̱jo na̱aa̱n, kó tangínjnú nangi Ejipto̱, sꞌe̱ ki̱a̱ ti̱ndyiónjnú ngaskande nga an xi bo̱a̱ xian án, ngatꞌa̱ Erondee̱ ko̱ngase ndií tsi̱ꞌe̱ nga sa̱ꞌínkꞌién.
14Kó jastjíe̱n Kosiee̱, iskjíbé ndií ko̱jo na̱aa̱n, kó nga jñoó kijíjo̱ nangi Ejipto̱, 15kó ki̱a̱ kisꞌińdo ngaskande nga kꞌien Erondee̱, tsi̱ꞌe̱ nga jatjosón ni xi katsoó Néná nda̱chji̱ni̱e̱ꞌe̱én nga bi̱ katsó: Nangi Ejipto̱ tsíchji̱a̱ñàa̱ ndína.
Bi̱ tsꞌén katsangiya Erondee̱ nga kiniꞌánkꞌién jákjíndí xi̱xi̱i̱
16Kósꞌe̱ nga kamákjiín Erondee̱ nga tsꞌenṉcha̱jo já kjínkoón, achichí katsꞌénxchán, kó katsangiya tsi̱ꞌe̱ nga kiniꞌánkꞌién ngayeje jákjíndí xíꞌín xi ngindiee̱ nga jó noó, xi síndo ndí na̱xi̱ńdáꞌniú Belee̱n ko̱jo ngayeje ndí nangi xi síndotꞌa kui ngi̱ndiee̱, ngatꞌa̱ askosoón ni̱xtjin xikó katsoó kui já kjínkoón. 17Kósꞌe̱ bo̱a̱ tsꞌén jatjosón ni xi katsó nda̱ chji̱ni̱e̱ꞌe̱én Néná xi ꞌmí Jeremiyaa̱, nga bi̱ katsó:
18Ngo nda̱ kandaꞌyaá nangi Ramaa̱,
nda̱a̱ xi tsꞌénkjandá ko̱jo xi ni̱ma̱ tjítsó kjo̱a̱a̱ nga on kjimaa̱,
na̱ Rakee̱l boá xi tsꞌénkjandátjé ndií,
kó kamámejénjiín nga kiniꞌándajoo̱n
ngatꞌa̱ je jesón ndií.
19Ta̱nga ngije kꞌien Erondee̱, ngo ndítsjiee̱ Néná tsíchji̱a̱jo Kosiee̱ ngi̱jin ńjñaá ki̱a̱ nangi Ejipto̱, kó bi̱ katsoó:
20–Ti̱sítji̱n, chjábé jí ndií ko̱jo na̱aa̱n, kó tꞌenje̱ ji nangii̱ xota̱ Israee̱l, ngatꞌa̱ jè kꞌien ngayeje xi kamámejeén katsꞌénkꞌién kui ndií.
21Kó Kosiee̱ jastjíe̱n, kó kijíjo̱ ndií ko̱jo na̱aa̱n ki̱a̱ nangi Israee̱l. 22Ta̱nga nga tsintꞌié Kosiee̱ nga ndií Erondee̱ xi ꞌmí Arkelao̱ tikón ree̱ nangi Jundea̱, katsakjónní nga ki̱a̱ ko̱e̱je̱, kó ngije ja̱bo̱a̱ je katsóyaà Néná ngi̱jin ńjñaá, ta̱sá nangi Ngalilea̱ kijí. 23Kó nga jachó ki̱a̱a̱, ki̱a̱ kisꞌińdo ndí na̱xi̱ńdáꞌniú Nasaree̱t, tsi̱ꞌe̱ nga jatjosón ni xi katsó jáchji̱ni̱e̱ꞌe̱én Néná nga bi̱ katsó: Nda̱ xi chji̱a̱ni Nasaree̱t kꞌuin.
Currently Selected:
Matioo̱ 2: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014