1 Bitut 2
2
Kpang sucet bu ba̱zizrak ba̱nyet
1Rot a̱mi yi ya tun ka̱yat na̱kpot, i pfwi dira bu tyong a̱ssi bu swam, i ryok ba̱shwwang. 2Yi ya brak di na̱mawon ni; kozan ka̱ram yi kun a̱zizrak ba̱byyang ntswa nu, yi ku sswa i rai i gi shya sucet. 3Da̱ni di ba̱ryat Ka̱za ban hywa ni, “Yi wu ka̱n drak ka̱sak ka Ka̱za kan yet i.”
4Yi ba ka̱rek A̱gwam njit ka, a̱tuba nu a̱ yet kpang sucet ni, nying ji ba̱nyet ba rak di byyi kpungtun ni ba, ma nji Ka̱za ka tssa zi yet a̱tsatsak assi nka. 5Yi ba da̱ni kpang ji byyi sucet ni ba bu ya sook a̱ nok bat ntswa Ka̱za na, ka̱bvwa nu yi nin yya pfong a̱zizrak gado Ka̱za nyin na ni, i cong bu ba̱hyum ntswa nyin ba Ka̱za ka ni san a̱zi hywak Yesu Kristi ni. 6Rot ba̱ryat Ka̱za a̱ hywa,
“N tssa a̱tsatsak nkpang
nying ji n ta̱cik ka̱swang nkpang Sihiyona ni.
A̱yin nu a̱ ku san ni a̱ byyi kun dambvwo ba.”
7Nyin ba̱nyet ba wrak ndya nyin na ni, kpang ji ni ya byyi kpungtun; ma di ba̱nyet ba a̱ ku rak ni, to, nkpa ban hywa,
“Kpang ji ba̱nyet dinok ba rak ni
nji a̱mi wu cong bu yet a̱gba̱dang kpang ka̱gwut u.”
8Ba̱ryat Ka̱za a̱ bo hywa,
“Kpang iya a̱mi ni ba̱ tyyi digrap ti,
nji a̱mi ni ba̱ ba di dikpak ti.”
Ba grap rot ba rak san ba̱ryat ba; digrap ti ti yet kyang a Ka̱za ka cat da̱ mba ni.
9Ma nyin a̱mi yet wap a ba tssa ni, ka̱srong ba̱gado Ka̱za a̱gba̱dang A̱gwam, a̱zizrak ba̱nyet Ka̱za, ba̱nyet ba Ka̱za ka yei ba bu tyyei cet nka na ni, a̱ ba̱ yei ka̱yat ndyin a̱ ba mi i ka̱sham ka̱bvwa sai nka ka. 10Ka̱ram iyemi yi yin yet ba̱nyet Ka̱za ba, ma ba̱nyying yi yet ba̱nkaa. Ka̱ram iyemi yi yin bvwo dizot Ka̱za ti ba, ma ba̱nyying yi san dizot nka ti.
Ba̱kwwa Ka̱za
11N ya naai ba̱wumbeyang nzuk, di ba̱nyet ba a̱ shyi i dicen ni bu nrang ka̱sa kani ni, yi ryok wwon ndwam nyin na yya nkyang a na cat i ba, nna ni kwan kozan ka̱tuk bu tswa njit ji ni. 12Dolet a̱mi yi cong a̱zizrak ka̱cyet ka̱sak ka ko ba̱nyet cyi Ka̱za ba a̱ cat kyang ya pfwei di yi yya a̱ka̱tuk nkyang a̱ bu shya yi byyi a̱tsatsak mpfong, har a̱ dyep Ka̱za ka̱tuk ka ka nin ba ni.
13Yi wrak a̱ccu nyin rot Ka̱za di ba̱nyet ba a̱ byyi cet ka̱sa na ni: da̱ a̱gba̱dang A̱gwam Rom nu a̱ byyi a̱gba̱dang cet ni 14nta̱mak bu ba̱gwamna ba. Mba a̱mi na̱ tyyi ba nyep ba̱ka̱tuk ba̱nyet ba a̱ bo dyep ba̱nyet ba a̱ yya a̱tsatsak ni. 15Ka̱za a̱ cat a̱tsatsak nkyang u yi yya ni na muk na̱nu ba̱bvwon bu ba̱gbyik ba̱nyet ba. 16Yi swat di ba̱set ba̱nyet ni, ma yi ryok brak diset nyin ti i si tyyi ti kup a̱ka̱tukyya ba, ma yi swat di ba̱kwwa Ka̱za ni. 17Yi wrak sa̱rei ba̱nyet shii, i gwai sa̱rei ba̱nyet tssup ba, i tyong Ka̱za, i bu tyong a̱gba̱dang A̱gwam Rom nu.
Yi tssup a̱nyyan Yesu
18Nyin ba̱kwwa, dolet yi pfong ba̱nyet ka̱ryi nyin ba i ba̱ tyong, ba bu ba̱tsatsak ba̱nyet ba a̱ ya yya ansham ni ba, har bu ba̱ka̱tuk ba. 19Ki yi sswa ka̱bvung ka a̱ yet ka̱nyiin ni ba rot yi bvwo kyang a Ka̱za ka cat da̱ nyin ni yemi, to, ka ni ya wwon nda. 20A̱nzan a̱ yet kpungtun ji ki yi sseng ba ya tsot rot na̱kpot a yi yya ni? Ma ki yi sseng i sswa ka̱bvung a̱zi hywak a̱tsatsak nkyang u yi yya ni, Ka̱za a̱ ni hok ansham nyin. 21Nkpa yet yei a Ka̱za ka ya yei ni, rot Kristi ma diccu nu a̱ sswa ka̱bvung a̱zi hywak nyin a̱ ya wwon a̱nyyan nu na yin cong. 22A̱ yin byyi hywak ba, da̱ a̱yin na̱ hok dira ka̱nu nu ba. 23Ko ba yin ku pfwei ni, nu na̱ brak a̱yin ni di ditok ba. Ko ka̱yat ka̱bvung na̱n shyi a̱yin ba, ma a̱ tyyi rya nu na di Ka̱za, a̱ntyok shirya ka̱ryong. 24Kristi diccu nu a̱ cot a̱ka̱tukyya njit u ka̱yat rwam nu a̱ nat i tazwa ka̱teyang, a̱ka̱tukyya a̱ ga kwu ka̱yat ndwam njit zi nwa a̱zizrak swat. Nhwot nu na a̱mi tyyi yi creng. 25Yi yin dyi di bvon-tsaap ji brik ni, ma naani ba ya brek a̱ ba mi yi tssup A̱ntyok A̱tsaai ba̱ a̱tuba nu a̱ cam sso nyin ji ni.
Zur Zeit ausgewählt:
1 Bitut 2: kaj
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2011, Wycliffe Bible Translators, Inc. All rights reserved.
