1 Bitut 3
3
Ba̱ntyok bu ba̱nyring
1A̱mi meyang nyin ba̱nyring yi pfong ba̱ntyok nyin ba, rot ki ba̱yanyet a̱n shyi ka̱yat mba a̱ tssup ba̱ryat Ka̱za ba, taka̱i ka̱cyet a yi cong ni a̱ ni ba̱ kwwat ba bu wrak ka̱ryong. Ba dolet se yi bu krang kyang ba, 2rot ba ni ryi a̱zizrak swat nyin nu bu ka̱sak ka yin pfong ka̱wun Ka̱za ni. 3Yi ryok tyyi ka̱ssi nyin bu an gugwai a̱ta̱sa ba, da̱ni di bat diccu ko na̱nrang ko ba̱tro ba yi tssup i, 4seko shisham nyin ji i shyi ka̱yat ndya nyin ka. Shisham iya nji yet a̱shushwon hali nyin nu di zi byyi kop ba. Nu a̱mi a̱ yet a̱gba̱dang kyang u assi Ka̱za. 5A̱mi ba̱nyring tssup nyyai ba a̱ yin tyyi ndya mba na i tssup Ka̱za ni, ba ri jyi shisham mba ji i pfong ba̱ntyok mba ba. 6Saraya a̱ yin yya a̱mi, a̱ pfong Ibrahim a̱ ku yei “A̱ntyok ka̱ryi”. To, nyin ki yi yya ansham i pfong ka̱wun kyang ba yi ni yet na̱won nu.
7Nyin meyang, ba̱ntyok ba, yi swrang bu ba̱nyring nyin ba ka̱yat bvwo di ba̱nyet zzak ncet ni; rot a̱mi yi ba̱ cyang ba maai ba̱nyet, rot mba meyang ba ma̱ ni ssang sucet a Ka̱za ka ya nang ni ba̱ nyin. Yi yya a̱mi ho kyang bu nwa n ya bvwo a̱duwa nyin nu.
Sswa ka̱bvung i hywak ka̱ryong
8A̱ngbom kyang u n ni hywa ni, yi tung a̱ccu nyin tyyi ndung. Yi gwai ba̱yaan di ba̱wumbeyang ni, i pfong dizot ba̱yaan, i ryok yet a̱ccu nyin ba. 9Ka̱ a̱yin a̱ ya yya ka̱tuk yi ku yya ka̱ta̱nom; ka̱ ya shyi, yi ku pfwa nda; rot Ka̱za a̱ yin ya yei yi yya nkyang ani i gi shya ka̱nu-a̱tan nu ka yin dop a̱ ni ya ryi ni. 10Da̱ni di ba̱ryat Ka̱za ban hywa ni,
“A̱yin nu a̱ cat hok ansham swat ka̱sa nu ni
a̱ si bo cat ryi a̱tsak ka̱ram ni,
dolet na̱ cam ka̱nu nu i ryat a̱ka̱tuk ba̱ryat
a̱ ryok bvei dira.
11Dolet na̱ wwon yya na̱kpot a̱ yya a̱tsatsak.
Dolet na̱ cat tsswa nda a̱ bo na̱ tssup.
12Rot A̱gwam Ka̱za a̱ cam ba̱nyet ba a̱ cong a̱zizrak ka̱cyet i,
kozan ka̱ram ka pfong a̱duwa mba nu.
Ma ba̱nyet ba a̱ yya a̱ka̱tuk ni
a̱mi Ka̱za ka rak.”
13A̱nyan a̱ ni ya bvwa, ki yi cat yya kyang a myim ni? 14Ma ki yi sswa ka̱bvung rot a̱tsatsak ka̱cyet nyin nu, to, kyang gwai a̱mi. Yi ryok hok ka̱wun ko yi dam a̱yin ba. 15Ma yi tyong Kristi ka̱yat ndya nyin ka i ku breng da̱ A̱gwam nyin ni. Kozan ka̱ram yi swat cam; ka̱ a̱yin a̱ ya zzim kyang a yin sak ndya nyin na ni yi ku tyyei. 16Ma yi yya a̱mi ba̱shinshwon, i bu ryok ku byai ba. Se yi swat ba̱ a̱zizrak ndya, rot ka̱ram ka ban ya byat a̱tsatsak yya nyin nu di ba̱nyet tssup Kristi ni, mba ba̱nyet ba a̱ ryat ni ma a̱ hok nsum nkyang a ba ryat ni. 17Ki ku myim Ka̱za, ku ran a̱yin a̱ sswa ka̱bvung a̱zi hywak a̱tsatsak nkyang a na̱ yya ni, di na̱ sswa ka̱bvung a̱ka̱tuk kyang. 18Yesu diccu nu a̱ yin yet a̱zizrak a̱yin, ma a̱ tyyi diccu nu a̱ ga kwu a̱n za cii a̱ka̱tukyya nu, njit ba̱ka̱tuk ba̱nyet. A̱ yin yya a̱ ga nat ba̱ njit di Ka̱za. A̱ yin kwu i rwam, Ka̱za a̱ ku shyek an tswa. 19Ka̱yat ntswa iya na̱ yin nat a̱ sin yya wa'azi ji di tswa zaan ji ba hweyak a̱ tyyi a jaru ni, 20wato, tswa ba̱nyet ji yin dak hok Ka̱za ni, ka̱ram ka ka yin ba̱ tot bu hakuri ni, ka̱ram ka Nuhu na̱ yin shyi nok jirgi ba̱shekwot a ni. Ba̱nyet ba a̱ yin nwa jirgi na ni ba yin shii ba, bu ba̱nyet a̱ninai mba a̱mi a̱ yin kaat i ba̱shekwot ba. 21A̱ yemi a̱ yin yet ba̱ a̱lama baptisma nu a̱ ya san ni. Ba tssu a̱shishik ndwam njit u a̱mi ba cyang ba, ma zi naai Ka̱za ka za ryi a̱zizrak a̱huhwa. A̱mi yi nin kaat rot ta̱za Yesu Kristi na nyyai a̱yabyen ka. 22Nu a̱mi a̱ nat Tazwa a̱ shyi swat mbvuk yak Ka̱za a̱ breng dityok ba̱pfong Ka̱za bu kozan cet na shyi Tazwa ni sa̱rei.
Zur Zeit ausgewählt:
1 Bitut 3: kaj
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2011, Wycliffe Bible Translators, Inc. All rights reserved.