Jeremías 6
6
Jerusalén'na ba nechjen be'nn ka' llwiere le aken
1Le wxhonjdo, xhi'nn Benjamín,
lewayirj ga lljakoachre, lewaxhonj Jerusalén'na,
lewkoell Trompeten gan nzi Tecoa,
le wlis to sen gan nzi Bet-haquérem,
le to da nxhullraz xhen
za rale na llcheben.
2Xhi'nn Sión'na, nake nbaraz ke to rach ga de yix ga da kweyi,
3gan llaj gup bayix ka' kone bayix ke ake' ka',
llajsu ake' to lloarawe
na to kwen wej bayix ka' llaw akba ke'ke akba.
4Be'nn ka' llwiere le aken ne ake':
Lewaze xnid nench'na tilrenlen.
Leda, na wawill'na llajtilrenllon.
Axha wakazdan,
banak bawlle, na baza llal.
5Kerbigundan tllele llajtilrenllon,
na wlleyillo ze war ke ake' ka'.
6Xanllon nap doxhente yelwaken ba bnee kan gaken:
Le llajzoy yay, na legun ga chepre
nench'na llajtilrenle Jerusalén'na.
Yell xhen'na banaken de'e, na sakzin,
le naken wednay alezerawze.
7Jerusalén'na llojen damaren,
ke to bej, ga lloj nis.
Welse llenello llakdilren loellj ake',
nakteze nak ake' we, na lleyllra ake'.
8Bayo nez Jerusalén,
llebraz ba llaklla rwe', nench ke wabiya kwiton chetka,
na wayuna rwe' to latj dach yu bill,
ga nullno be'nn cha rawen.
Llixjwere kan sakzi aken
9Xanllon nap doxhente yelwaken ba nee:
Be'nn Israelitas ka'
wayirj ake' le ake', natell wayirj ake' le ake' yeto,
kan llun ake' llayirj ake' raw xhos lba uvas ka',
xte ni tich uvas ka' bill yega'n.
10Nada' bnia: ¿Nuxha wzenayse kia nada',
cha wne' ake', na chixjoe akre?
Ba nseij nay ake', Xana,
na bill llzenay ake',
lltitj akre lloa xtillon,
bi llazrall aken.
11Llruka kan llun akre rwen Xana,
to ba jachiera kwis.
Na Xanllon gulle'e nada':
Bsan yel llruk ko'on kull bidao ka' zjada tnezen,
na gan sjalla bi weo ka'.
Na wche ake' be'nn biew ka' ba nchayna, na xhor ake' ka' lo rill ya,
na lekse ka' be'nn gur ka' ba bzo zan iz.
12Yo' ke ake' ka', na lix ke ake' ka', na xhor ake' ka'
be'nn yub akre suren le ake'.
Le wlisa takan
nench'na wsakzia be'nn ka' zajzu latj yell-li'on.
Nada' Xanle ba bnia ka'.
13Yoy akte, ke be'nn gur na ke bidao,
tuze ke llun ake' xbab, zerall ake' da binak ke ake',
ka llun be'nn ka' llayixjwe xtill Diozen, na bxus ka',
yoy akte ziye ake'.
14To rawzen llun ake' rmell raw we ke be'nn yell kian,
na ne ake' yoyten zajzen wen,
le ziye akzen bitbi wen zu ake'.
15Llayal wayie akre kan llun aken
le dan llun aken bill zoeran.
Axha bikse llaye akre,
bill numbie aksre yel'sdon.
Kelen'na keten wsakzia le aken,
lljachew ake', na llajyal ake' ke be'nn ka' yela.
Nada' Xanle ba bnia ka'.
Yel wednay ke Israelen
16Xanllon lle'e be'nn yell ke'en.
Le llajse tnez ka' na le wia,
na lewnabe be'nn gur ka',
garen zajze nezen nak wen'na,
na le na'on, na wallelere yel wxhirallen.
Na le aken ne ake': Ka' bi lleneto nawton.
17Xanllon bzoe'e be'nn ka' llap raw yellen, na gulle'e be'nn yellen.
Lewzenay ke da nxhollen ba zan.
Axha be'nn yell ka' bnee ake'. Ka, bi lleneto wzenayto.
18Kelen'na ne Xanllon:
Lewzenay re' sjalla latj yell-liw ake',
le ne'ze kan gak ke yell kian.
19Bzenay yell-liw:
Wsana de'n raw yellen
xtole xbab xhinj ke ake' ka',
le bi bzenay ake' lloa xtillan,
na bi biazrall ake' dan ba bdichjbian.
20¿Bixhchen lladwarizre rawa lleen yar dan za Sabá,
na yay yej da la xhixh da za zit?
Nada' bi llawera bayix ka' llzeyren,
ni da ka' yela lladwaren.
21Kelen'na ne Xanllon:
Nada' guna nench'na yellni lljacheon na yalen.
Xa' ake', na xhi'nn ake', na be'nn wrill ke ake', na be'nn ka' nllie akre,
yoy akte kweyi ake'.
Bazak be'nn ka' za rale nench'na llajlan ake' ga binak ke ake'
22Xanllon nee:
Bazak be'nn ka' zajzu ralte,
na nak ake' be'nn zan kwis, na nap ake' yelwak.
23Nox ake' xhis waxit, na spad ake',
nak ake' alezerawze be'nn wen damar, na bi llayachrall ake',
to llusia ake' kan llun nista'on llusian,
na zak ake' llia akte kabay.
Nench'na tilren ake' rwe' Jerusalén.
24Na be'nn ka' sjalla Jerusalén'na ne ake':
Ba beneto ke di'll ka',
na dan llcheben ba nutzin neto',
zuyachto na lleyllrato,
ke to nor be'nn le sute xhi'nn.
25Bi chajre lixen,
bi chajre tnez ka'.
Be'nn ka' llwieren nox ake' ya,
gateze baze da nxhollen.
26Guk rall zech, yell kia
na wroen ke lljelero,
bdul lo den,
na bzu da zdeb, na bllell yiach,
ke be'nn ba gut xhi'nne tich,
le le'en baze wlleyie'e lliw
to setegaze yede'e.
27Xanan gulle'e nada': Rallnao llkoana' be'nn yell kian nench'na wiao kan llun aken.
28Yoy akte Xana, nak ake' be'nn wednay kwis,
nak ake' be'nn wao di'll, na be'nn sban,
sjanak ake' war ke ya ka' nzi bronce na hierro.
29Ket dan llrub llebrazen,
llunen nench'na llasonen yan nzi plomo,
na nike bi zakzen'na llayak ake' yall,
le be'nn wednay ka' bi llaran akse.
30Na ye ake' le ake', ya plat da ba nzanlall,
le rwe' Xana, ba bllonlall akoe.
Zur Zeit ausgewählt:
Jeremías 6: ZPUPAT
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Bible Society of Mexico
Mehr über die Be'nnka'be Xti'll Dios erfahren